కరెన్సీ చుట్టూ తిరిగే 'జీబ్రా'.. ఇంట్రెస్టింగ్ గా ట్రైలర్!

టాలెంటెడ్ యాక్టర్ సత్యదేవ్ వైవిధ్యమైన కథలు, విలక్షణమైన పాత్రలతో తనకంటూ ప్రత్యేకమైన గుర్తింపు తెచ్చుకోడానికి కష్టపడుతున్నారు. ఓవైపు హీరోగా లీడ్ రోల్స్ చేస్తూనే.. మరోవైపు అవకాశం వచ్చినప్పుడల్లా మంచి సపోర్టింగ్ క్యారెక్టర్స్ తో అలరిస్తున్నారు. కన్నడ నటుడు డాలీ ధనుంజయతో కలిసి సత్యదేవ్ హీరోగా నటించిన లేటెస్ట్ మూవీ ''జీబ్రా''. 'లక్ ఫేవర్స్ ది బ్రేవ్' అనేది దీనికి ట్యాగ్‌లైన్. రిలీజ్ కు రెడీ అయిన ఈ సినిమాకు సంబంధించిన ప్రమోషన్స్ మొదలయ్యాయి. ఇందులో భాగంగా గ్రాండ్ గా నిర్వహించిన ట్రైలర్ లాంచ్ ఈవెంట్ కు మెగాస్టార్ చిరంజీవి చీఫ్ గెస్టుగా హాజరయ్యారు. ట్రైలర్ ను విడుదల చేసి చిత్ర బృందానికి తన బెస్ట్ విషెస్ అందజేశారు.

'జీబ్రా' ట్రైలర్ లోకి వెళ్తే.. ''ఈ ప్రపంచంలో ట్రస్ట్ ఎట్ ఫస్ట్ సైట్ అనే కాన్సెప్ట్ సూట్ అయ్యేది ఒక్క బ్యాంక్ కు మాత్రమే'' అంటూ సత్యదేవ్ చెప్పే డైలాగ్ తో ప్రారంభం అవుతుంది. కథంతా డబ్బు చుట్టూనే తిరుగుతుందని ట్రైలర్ లోనే స్పష్టం చేసారు. అయితే బ్యాంక్ ఫ్రాడ్స్ కు కామెడీ, థ్రిల్స్, సస్పెన్స్, క్రైమ్, లవ్ స్టోరీ వంటి అంశాలను జోడించి ఆసక్తికరంగా తీర్చిదిద్దే ప్రయత్నం చేసారు. ఇందులో సత్యదేవ్, హాస్యనటుడు సత్యలు బ్యాంకును స్కామ్ చేసే వ్యక్తుగా కనిపించారు. ఇద్దరికీ డబ్బు అవసరం అవ్వడంతో ఏదో ఫ్రాడ్ చేసి సంపాదించాలని ప్లాన్ చేసుకున్నారు.

అయితే డబ్బే అందర్నీ ఆడిస్తుందని నమ్మే సత్యదేవ్ కు.. ఆ డబ్బును ఆడించే మనిషి డాలీ ధనుంజయ ఎదురైన తర్వాత అతని లైఫ్ వేరే విధంగా టర్న్ తీసుకున్నట్లు తెలుస్తోంది. డాలీ సీన్ లోకి ఎంట్రీ ఇచ్చిన తర్వాత, ఒక సంఘటన కారణంగా అతను డేంజరస్ సిచ్యుయేషన్ లో ఇరుక్కుపోయినట్లు ట్రైలర్ లో చూపించారు. ధనుంజయ లాంటి భయంకరమైన పవర్ ఫుల్ విలన్ ను ఎదుర్కొని, దాన్నుంచి సత్యదేవ్ ఎలా బయటపడ్డాడనేది ఈ కథలో ఆసక్తికరమైన పాయింట్.

'జీబ్రా' సినిమాలో సత్యదేవ్, డాలీ ఇద్దరూ తమ బెస్ట్ పెర్ఫార్మెన్స్ ఇచ్చారని ట్రైలర్ ను బట్టి చెప్పొచ్చు. దీంట్లో ప్రియా భవానీ శంకర్ హీరోయిన్ గా నటించింది. సునీల్, సత్యరాజ్, జెన్నిఫర్ పిచ్చినాటో ఇతర ప్రధాన పాత్రలు పోషించారు. ట్రైలర్ వరకూ ఇంట్రెస్టింగ్ గానే ఉంది. దర్శకుడు ఈశ్వర్ కార్తీక్ ఎంగేజింగ్ థ్రిల్లర్‌గా ఈ చిత్రాన్ని రూపొందించే ప్రయత్నం చేసారు. సినిమాటోగ్రాఫర్ సత్య పొన్మార్ విజువల్స్ ఆకట్టుకుంటున్నాయి. కెజిఎఫ్, సలార్ ఫేమ్ రవి బస్రూర్ అందించిన బ్యాగ్రౌండ్ స్కోర్ ట్రైలర్ లో ప్రధాన ఆకర్షణగా నిలిచింది. డబ్బు నేపథ్యంలో మీరాఖ్ రాసిన డైలాగ్స్ అలరిస్తున్నాయి.

పద్మజ ఫిలింస్ ప్రైవేట్ లిమిటెడ్ & ఓల్డ్ టౌన్ పిక్చర్స్ బ్యానర్లపై ఎస్ ఎన్ రెడ్డి, ఎస్ పద్మజ, బాల సుందరం, దినేష్ సుందరం ఈ చిత్రాన్ని నిర్మిస్తున్నారు. ఎస్ శ్రీలక్ష్మి రెడ్డి సహ నిర్మాతగా వ్యవహరించిన ఈ సినిమాకి అనిల్ క్రిష్ ఎడిటర్ గా వర్క్ చేసారు. ''జీబ్రా'' మూవీ నవంబర్ 22న వరల్డ్ వైడ్ గా రిలీజ్ కాబోతోంది. మరి ఈ క్రైమ్ యాక్షన్ ఎంటర్‌టైనర్‌ ఎలాంటి విజయాన్ని అందుకుంటుందో చూడాలి.