దిల్​రాజు పక్కా ప్లాన్​.. రియాలిస్టిక్​గా 'సెల్ఫిష్'

స్టార్​ ప్రొడ్యూసర్ బ్రాండ్​తో టాలీవుడ్​లో కొనసాగుతున్న దిల్ రాజు భుజంపై మరో భారం ఉన్న సంగతి తెలిసిందే. బడా హీరోలకు భారీ హిట్​ ఇవ్వడం, ప్రొడక్షన్​ను పాన్ ఇండియా రేంజ్​కు తీసుకెళ్లడంతో పాటు తన ఫ్యామిలీ హీరో ఆశిష్​ను ఇండస్ట్రీలో మంచి స్థాయిలో నిలబెట్టడం.

ఇప్పటికే తొలి ప్రయత్నంగా ఆశిష్​తో తెరకెక్కించిన 'రౌడీ బాయ్స్'.. మిక్స్​డ్​ టాక్ తెచ్చుకుంది. కమర్షియల్​ హిట్​ అందుకోలేదు. దీంతో ఇప్పుడు ఆశిష్​ రెండో చిత్రం 'సెల్ఫిష్' విషయంలో మరింత జాగ్రత్త పడుతున్నారు దిల్​రాజు. ఈ రెండో చిత్రంతో అతడిని ప్రేక్షకులకు బాగా దగ్గర చేయాలని ప్రయత్నాలు చేస్తున్నారు. అందుకే ఈ రెండో చిత్రాన్ని కొత్త దర్శకుడు కాశి చేతిలో పెట్టినప్పటికీ.. సినిమా మొత్తం ఆయన హ్యాండోవర్​లోనే నడుస్తున్నట్లు ఇప్పటికే వార్తలు వచ్చాయి. సినిమాకు సంబంధించి అన్నీ ఆయనే డిసైట్​ చేస్తున్నట్లు ఆ మధ్యలో కొన్ని కథనాలు కూడా వచ్చాయి.

అయితే తాజాగా మూవీటీమ్​.. సినిమాకు సంబంధించి రెండు కొత్త పోస్టర్లను కూడా రిలీజ్ చేసింది. ఓ పోస్టర్​లో ఆశిష్​ హీరోయిన్​ ఇవానా వెనక నడుస్తున్నట్లు చూపించారు. మరో దాంట్లో ఓ హోటల్​ మెట్లపై హీరో కూర్చొని ఉండగా హీరోయిన్​ మెట్లు దిగుతూ ఆందోళనగా వెళ్తున్నట్లు కనిపించింది. ఈ పోస్టర్లలోని బ్యాక్​గ్రౌండ్​ చూస్తుంటే ఎంతో నేచురాలిటీగా కనిపించింది.

అలానే మూవీటీమ్​ కూడా ఈ చిత్రాన్ని హైదారాబాద్​లోని రియల్ లొకేషన్స్​లో చిత్రీకరిస్తున్నట్లు తెలిపింది. ప్రస్తుతం షూటింగ్​ శరవేగంగా జరుగుతుందని, ఇవానా, ఆశిష్​పై కొన్ని కీలక సన్నివేశాలను తెరకెక్కిస్తున్నట్లు వెల్లడించింది. అలాగే ఫ్రమ్​ బస్ట్లింగ్​ మార్కెట్స్​ టు బేర్ స్ట్రీట్స్​ అని క్యాప్షన్ కూడా రాసుకొచ్చింది. అంటే రద్దీగా ఉండే ప్రాంతాలతో పాటు క్లాస్ అండ్ కామ్​గా ఉంటే​ ఏరియాస్​లో.. ఒరిజినల్​ లొకేషన్స్​లోనే సినిమాను చిత్రీకరిస్తున్నట్లు చెప్పింది.

ఇకపోతే ఇప్పటికే ఈ చిత్రంలో చైత్ర అనే ఫైనాన్సియల్‌ ఎనలిస్ట్‌గా ఇవానా కనిపించనుందని, ఆశిష్‌ రెడ్డి ఓల్డ్‌ సిటీ కుర్రాడిగా ఓ మాస్‌ పాత్ర పోషిస్తున్నారని మూవీటీమ్​ తెలిపింది. వీరిద్దరి మధ్య నడిచే ప్రేమకథతోనే సినిమా తెరకెక్కించబోతున్నట్లు పేర్కొంది.

అందుకు తగ్గట్టుగానే ఇప్పుడు మాస్​ ఏరియాస్​లో అలానే క్లాస్​ ఏరియాస్​లోనూ రియాలిస్టిక్​గా సినిమాను చిత్రీకరిస్తున్నారు. ఇక ఈ చిత్రానికి ఎన్నో సూపర్ హిట్ ఆల్బమ్స్ ఇచ్చిన మిక్కీ జే మేయర్ సంగీతం అందిస్తున్నారు. ఈ చిత్రాన్ని దిల్​ రాజుతో పాటు సుకుమార్‌ రైటింగ్స్‌ కూడా నిర్మిస్తోంది.