మత్తు వదలరా సీక్వెల్.. వచ్చేది ఎప్పుడంటే..

మత్తు వదలరా.. ఐదేళ్ల కిందట వచ్చిన ఆ సినిమా ఎలాంటి హిట్ అయిందో అందరికీ తెలిసిందే. ఎటువంటి అంచనాలు లేకుండా ప్రేక్షకుల ముందుకు వచ్చిన ఆ క్రైమ్ కామెడీ మూవీ.. ఆడియన్స్ నుంచి అదిరిపోయే రెస్పాన్స్ అందుకుంది. ఊహించని ట్విస్ట్ లతో సినీ ప్రియులను కట్టిపడేసింది. ఆ సినిమాతో ప్రముఖ సంగీత దర్శకుడు ఎం ఎం కీరవాణి చిన్న కుమారుడు శ్రీసింహా హీరోగా పరిచయమయ్యారు. డెబ్యూ మూవీతో మంచి హిట్ అందుకున్నారు ఆయన.

రితేష్ రానా దర్శకత్వం వహించిన ఆ సినిమాలో శ్రీసింహాతోపాటు సత్య కీలకపాత్ర పోషించారు. తెలుగులో థ్రిల్లర్ మూవీస్ కు ఓ కొత్త అర్థం తీసుకొచ్చిన మత్తు వదలరా మూవీ 2019 డిసెంబర్ లో విడుదలైంది. అయితే కొన్ని నెలల క్రితం ఆ సినిమాకు సీక్వెల్ ను అనౌన్స్ చేసిన విషయం తెలిసిందే. ప్రస్తుతం శరవేగంగా షూటింగ్ జరుపుకున్న సీక్వెల్ కు సంబంధించి క్రేజీ అప్డేట్ ఇచ్చారు మేకర్స్. శ్రీ కృష్ణ జన్మాష్టమి పండుగ సందర్భాన్ని పురస్కరించుకుని రిలీజ్ డేట్ ను అనౌన్స్ చేశారు.

సెప్టెంబర్ 13న థియేటర్లలో రిలీజ్ చేయనున్నట్లు సోమవారం ప్రకటించారు. దాంతోపాటు రెండు పోస్టర్లను కూడా రిలీజ్ చేశారు. వాటి ద్వారా సినిమాను ఎక్స్ప్లెయిన్ చేశారు. ఫస్ట్ పోస్టర్ లో శ్రీసింహా, సత్య డైనమిక్ గా కనిపిస్తున్నారు. ప్రత్యర్థులపై తుపాకీలతో విరుచుకుపడుతున్నట్లు చూపించారు. బ్యాక్ గ్రౌండ్ లో హై ఎమర్జెన్సీ టీమ్ అని రాశారు మేకర్స్. మరో పోస్టర్ లో సీక్వెల్ కోసం యాడ్ చేసిన క్రైమ్ ఎలిమెంట్స్ ప్రతిబింబించేలా డిజైన్ చేశారు. ప్రస్తుతం అవి నెట్టింట వైరల్ గా మారాయి.

అయితే డైరెక్టర్ రితేష్ కు మత్తు వదలరానే డెబ్యూ మూవీ. కానీ సూపర్ స్క్రిప్ట్ వర్క్ తో ఆయన అప్పుడు అదరగొట్టేశారు. ఇప్పుడు సీక్వెల్ ను కూడా అదే స్థాయిలో తెరకెక్కిస్తున్నారని తెలుస్తోంది. ప్రత్యేక టాస్క్‌లతోపాటు మరిన్ని ట్విస్ట్ లను యాడ్ చేసి మెప్పించనున్నారని సమాచారం. ఈసారి మత్తు వదలరా టీమ్ లోకి క్యూట్ హీరోయిన్ ఫరియా అబ్దుల్లా కూడా చేరింది. సునీల్, వెన్నెల కిషోర్, అజయ్, రోహిణి, రాజా చెంబోలు, ఝాన్సీ, శ్రీనివాస్ రెడ్డి తదితరులు కీలక పాత్రల్లో నటిస్తున్నారు.

ప్రతి పాత్ర కూడా వేరే లెవెల్ లో డిజైన్ చేసినట్లు వినికిడి. అయితే సీక్వెల్ ను ప్రముఖ మైత్రీ మూవీ మేకర్స్ సమర్పణలో క్లాప్ ఎంటర్టైన్మెంట్ బ్యానర్‌ పై చిరంజీవి (చెర్రీ), హేమలత పెదమల్లు నిర్మిస్తున్నారు. కీరవాణి మరో కుమారుడు, యంగ్ సింగర్ కాల భైరవ సంగీతం అందిస్తున్నారు. సురేష్ సారంగం సినిమాటోగ్రాఫర్ గా, కార్తీక శ్రీనివాస్ ఆర్ ఎడిటర్ గా వ్యవహరిస్తున్నారు. మరి మత్తు వదలరా సీక్వెల్ బాక్సాఫీస్ వద్ద ఎలాంటి హిట్ అవుతుందో వేచి చూడాలి.