'సాహో' బ్యూటీ అరుదైన వంద రికార్డ్‌

ప్రభాస్ హీరోగా నటించిన సాహో సినిమాలో హీరోయిన్‌ గా నటించిన ముద్దుగుమ్మ శ్రద్దా కపూర్‌. సాహో సినిమా తెలుగు లో పెద్దగా ఆడకున్నా కూడా హిందీలో భారీ వసూళ్లను దక్కించుకుంది. దాంతో సాహో సినిమా దాదాపుగా రూ.150 కోట్ల వసూళ్లు నమోదు చేసింది. ఈ మధ్య కాలంలో హీరోలు వరుసగా వందల కోట్ల వసూళ్లు రాబడుతున్నారు. కానీ హీరోయిన్స్‌ లో ఒక్కరు ఇద్దరు మాత్రమే వందల కోట్ల క్లబ్‌ లో ఉన్నారు. కానీ శ్రద్దా కపూర్ మాత్రం ఏకంగా తాను నటించిన ఏడు సినిమాలతో వంద కోట్లు, అంతకు మించి వసూళ్లు సాధించి రికార్డ్‌ సృష్టించింది.

తాజాగా విడుదల అయిన స్త్రీ 2 సినిమా ఇండియాతో పాటు, విదేశాల్లో కూడా భారీ వసూళ్లను రాబడుతూ దూసుకు పోతుంది. ఇప్పటి వరకు దాదాపుగా రూ.400 కోట్ల వసూళ్లను ఈ సినిమా రాబట్టిందని బాలీవుడ్‌ మీడియా వర్గాల ద్వారా సమాచారం అందుతోంది. రాజ్ కుమార్‌ రావు హీరోగా నటించిన స్త్రీ 2 సినిమాకు బాక్సాఫీస్ వద్ద నమోదు అవుతున్న వసూళ్లు చూసి ఇండస్ట్రీ వర్గాల వారు కూడా ఆశ్చర్యం వ్యక్తం చేస్తూ ఉన్నారు. బాలీవుడ్‌ లో ఈ ఏడాది సాలిడ్‌ హిట్ లేదు అనుకుంటున్న సమయంలో అనూహ్యంగా ఈ విజయం నమోదు అయ్యింది.

సాహో, స్త్రీ 2 సినిమాలతో పాటు ఇంకా చిచ్చోరే సినిమా కూడా శ్రద్దా కపూర్ కి వంద కోట్లకు పైగా వసూళ్లు ఇచ్చింది. సుశాంత్‌ సింగ్ రాజ్ పూత్‌ హీరోగా నటించిన ఆ సినిమా విమర్శకుల ప్రశంసలు అందుకుని దాదాపుగా రూ.150 కోట్ల వసూళ్లు సాధించింది. ఈ అమ్మడు నటించిన మరో చిత్రం తూ జూటీ మై మక్కర్ చిత్రం కూడా ప్రపంచ వ్యాప్తంగా దాదాపుగా రూ.145 కోట్ల వసూళ్లు నమోదు చేసినట్లుగా తెలుస్తోంది. ఈమె చేసిన లేడీ ఓరియంటెడ్ సినిమాలకు కూడా ఈ స్థాయిలోనే వసూళ్లు నమోదు అవ్వడం జరిగింది.

ఏక్‌ విలన్‌, స్త్రీ, ఏబీసీడీ, భాగీ 3 సినిమాలు కూడా శ్రద్దా కపూర్ ని వంద కోట్ల క్లబ్‌ లో నిలిపాయి. రికార్డ్‌ స్థాయిలో ఏకంగా ఏడు సినిమాలతో వంద కోట్లు, అంతకు మించి వసూళ్లు సాధించడం ద్వారా శ్రద్దా కపూర్ ఖాతాలో అరుదైన రికార్డ్‌ నమోదు అయ్యింది. ప్రస్తుతం చేస్తున్న రెండు సినిమాలు కూడా కచ్చితంగా వంద కోట్లు, అంతకు మించి వసూళ్లు చేస్తాయని, ప్రస్తుతం బాలీవుడ్ లో అత్యధిక క్రేజ్‌ ఉన్న హీరోయిన్స్ జాబితాలో శ్రద్దా కపూర్ ముందు వరుసలో ఉందని ఆమె అభిమానులు సోషల్ మీడియా ద్వారా కామెంట్స్ చేస్తున్నారు.