బాలయ్య కోసం వెంకీ బ్యూటీ...?

వరుస విజయాలతో దూసుకు పోతున్న నందమూరి బాలకృష్ణ ప్రస్తుతం బాబీ దర్శకత్వంలో ఒక సినిమాను చేస్తున్న విషయం తెల్సిందే. ఆ సినిమా షూటింగ్ మొదలు అయ్యి ఇప్పటికే చాలా రోజులు అయ్యింది. అయితే ఇప్పటి వరకు హీరోయిన్ విషయమై క్లారిటీ ఇవ్వలేదు.

బాలయ్యకు సరి జోడీ హీరోయిన్ కోసం చాలా రోజులుగా అన్వేషిస్తున్న దర్శకుడు బాబీకి చివరికి హీరోయిన్ చిక్కిందట. ఇండస్ట్రీ వర్గాల ద్వారా అందుతున్న సమాచారం ప్రకారం బాలయ్య కు జోడీగా శ్రద్ధా శ్రీనాధ్ ను ఎంపిక చేసినట్లు తెలుస్తోంది. ఈ మధ్య కాలంలో ఈ అమ్మడు తెలుగు ప్రేక్షకుల ముందుకు రెగ్యులర్ గా వస్తూనే ఉంది.

మొన్న సంక్రాంతికి విడుదల అయిన వెంకటేష్ సైంధవ్‌ సినిమాలో కూడా నటించిన విషయం తెల్సిందే. ఆ సినిమాలో వెంకీకి సరి జోడీగా శ్రద్దా శ్రీనాథ్‌ అనిపించడం వల్లే బాబీ కూడా ఆమెను సెలక్ట్‌ చేశాడనే వార్తలు వస్తున్నాయి. త్వరలోనే బాలయ్యకు జోడీగా శ్రద్ధ అంటూ అధికారికంగా ప్రకటన వచ్చే అవకాశాలు ఉన్నాయి.

నందమూరి ఫ్యాన్స్ మాత్రం శ్రద్దా శ్రీనాథ్ కంటే మరెవ్వరైనా ఫేమస్ హీరోయిన్ అయితే బాగుంటుందనే అభిప్రాయం వ్యక్తం చేస్తున్నారు. బాలయ్య తో పాటు సీనియర్ హీరోలు అందరు కూడా హీరోయిన్స్ కొరత వల్ల ఇబ్బందులు ఎదుర్కొంటున్నారు. అందుకే బాలయ్యకు తప్పని పరిస్థితుల్లో శ్రద్ధా ను ఎంపిక చేసి ఉంటారు అనేది కొందరి అభిప్రాయం.

మెగాస్టార్ చిరంజీవి తో వాల్తేరు వీరయ్య సినిమా ను చేసిన దర్శకుడు బాబీ ఇప్పుడు అదే తరహా మాస్ మసాలా సినిమాను బాలయ్య తో రూపొందిస్తున్నాడనే వార్తలు వస్తున్నాయి. ఈ ఏడాదిలోనే విడుదల చేసే విధంగా బాబీ శరవేగంగా షూట్‌ చేస్తున్నాడు. వేసవి చివర్లో లేదా దసరా కి వీరి కాంబో మూవీ వచ్చే అవకాశాలు ఉన్నాయి.