'డీజే టిల్లు' సైలెంట్​గా మరో కొత్త సినిమా షురూ..

'డీజే టిల్లు' చిత్రంతో సెన్సేషనల్ హిట్ అందుకున్న సిద్ధు జొన్నలగడ్డ.. ప్రస్తుతం టాలీవుడ్ మోస్ట్ వాంటెడ్ హీరోగా మారిపోయారు. ఆయనకు వరుసగా ఆఫర్లు వస్తున్నాయి. కానీ తొందరపడి వేటిని ఓకే చేయకుండా ఆచితూచి మరి కథలను ఎంపిక చేసుకుంటున్నారు. తాజాగా ఇప్పుడు మరో కొత్త సినిమాను ఎటువంటి అనౌన్స్​మెంట్​ లేకుండానే సైలెంట్​గా సెట్స్​పైకి తీసుకెళ్లారు.

బొమ్మరిల్లు భాస్కర్ దర్శకత్వంలో సిద్ధు ఈ సినిమా చేయనున్నారు. తాజాగా ఈ చిత్రం పూజా కార్యక్రమాలు గ్రాండ్​గా లాంఛ్ అయింది. SVCC బ్యానర్ పై బివిఎస్ఎన్ ప్రసాద్ ఈ సినిమాను నిర్మించబోతున్నారు. ఈ ఓపెనింగ్​ లాంఛ్ ఈవెంట్​కు ప్రముఖ నిర్మాతలు దిల్ రాజు, అల్లు అరవింద్, దర్శకుడు కార్తీక్ దండు గెస్ట్​లుగా హాజరయ్యారు. నిర్మాత దిల్​రాజు కెమెరా స్విచ్ ఆన్ చేయగా, అల్లు అరవింద్ క్లాప్ కొట్టారు.

ఇంకా ఈ ఈవెంట్​కు నిర్మాతలు రవి శంకర్​, వంశీ, మిర్యాలా రవీందర్ రెడ్డి, దర్శకులు నందిని రెడ్డి, రాధా మోహన్​, కార్తిక్ వర్మ, సుబ్బు, రైటర్ కోనా వెంకట్​, నీరజ్ కోణా, దామోదర్ రెడ్డి సహా తదితురులు కూడా హాజరయ్యారు.

ఇకపోతే లవ్ అండ్ ఫ్యామిలీ స్టోరీస్​ను అద్భుతంగా తెరకెక్కించడంలో బొమ్మరిల్లు భాస్కర్ ప్రత్యేకత గురించి తెలిసిందే. చివరిగా ఆయన అఖిల్ అక్కినేనితో కలిసి 'మోస్ట్ ఎలిజిబుల్ బ్యాచిలర్' సినిమా తీసి సినీ ప్రియులను అలరించారు. దీంతో ఇప్పుడు ఆయన సిద్ధుతో చేయబోయే సినిమాపై కూడా మంచి అంచనాలే నెలకొన్నాయి.

ఇప్పుడిప్పుడే మంచి ఫాలోయింగ్​ను సంపాదించుకుంటున్న సిద్ధు కెరీర్​కు బొమ్మరిల్లు భాస్కర్ చేయబోయే సినిమాకు బాగా ప్లస్​ అయ్యే అవకాశం ఉందని కూడా మాట్లాడుకుంటున్నారు. త్వరలోనే ఈ సినిమా రెగ్యులర్ షూటింగ్ ప్రారంభించుకోనుంది. ఇకపోతే ఈ చిత్రంలో మోస్ట్ వాంటెడ్ అండ్ సెన్సేషనల్ బ్యూటీ శ్రీలీలను హీరోయిన్ తీసుకుంటారని ప్రచారం సాగుతోంది. త్వరలోనే ఇతర నటీనటుల వివరాలను అధికారికంగా తెలియజేయనున్నారు.

ఇకపోతే సిద్ధు ప్రస్తుతం.. తనకు స్టార్ డమ్​ను అందించిన రొమాంటిక్ క్రైమ్ కామెడీ ఎంటర్టైనర్ డీజె టిల్లుకు సీక్వెల్​గా 'టిల్లు స్క్వేర్' సినిమా చేస్తున్నారు. ఇందులో అనుపమ పరమేశ్వరన్​ హీరోయిన్​గా నటిస్తోంది. డబుల్ ఎంటర్టైన్మెంట్​తో ఈ చిత్రం సెప్టెంబర్​లో ప్రేక్షకుల ముందుకు రానుంది. తొలి భాగానికి విమల్ కృష్ణ దర్శకత్వం వహించగా.. సీక్వెల్​కు మాత్రం మల్లిక్ రామ్ డైరెక్ట్​ చేస్తున్నారు.