'కంగువా' శివ తర్వాత ఆ హీరోతో..!

సూర్య హీరోగా శివ దర్శకత్వంలో రూపొంది ఇటీవల ప్రేక్షకుల ముందుకు వచ్చిన 'కంగువా' సినిమాకు ఆశించిన స్థాయిలో ఫస్ట్‌ డే కలెక్షన్స్ నమోదు కాలేదు. పైగా సినిమాకి నెగటివ్ రివ్యూలు వచ్చాయి. సినిమాలో కథ లేదని, స్క్రీన్‌ ప్లే సరిగా లేదు అంటూ పెద్ద ఎత్తున విమర్శలు చేస్తూ తమిళ సినీ రివ్యూవర్స్‌తో పాటు అన్ని భాషల రివ్యూవర్స్‌ అభిప్రాయం వ్యక్తం చేశారు. సోషల్‌ మీడియాలో కంగువా సినిమాపై విపరీతమైన ట్రోల్స్ వస్తున్నాయి. ఈ సమయంలో శివ తదుపరి సినిమా ఏ హీరోతో అనే చర్చ సైతం మొదలు అయింది. ఇంతకు ముందు ఆయన తీసిన సినిమాలు మంచి విజయాన్ని సొంతం చేసుకోగా ఈ సారి కంగువా ఫలితం తారు మారు అయింది.

గతంలో అజిత్ తో పలు సినిమాలు చేసి సూపర్‌ హిట్స్‌ను అందుకున్న శివ తన తదుపరి సినిమాను మళ్లీ ఆయనతోనే చేయాలని ఫిక్స్ అయ్యాడు. కంగువా సినిమా పూర్తి కాకముందే వీరి కాంబో మూవీ ఫిక్స్ అయ్యిందని సమాచారం అందుతోంది. ఇటీవల నిర్మాత జ్ఞానవేల్‌ రాజా ఒక ఇంటర్వ్యూలో మాట్లాడుతూ శివ తన తదుపరి సినిమాను అజిత్‌ తో చేస్తారు. ఆ సినిమా వచ్చే ఏడాదిలో ఉంటుంది. ఆ తర్వాత కంగువా పార్ట్‌ 2 ని ప్రేక్షకుల ముందుకు ఆయన తీసుకు వస్తారంటూ చెప్పుకొచ్చాడు. కంగువా పార్ట్‌ 2 ఆలోచన ఇప్పుడు కూడా ఉందా అంటూ కొందరు నిర్మాతను ప్రశ్నిస్తున్నారు.

సాధారణంగా ఒక సినిమా హిట్‌ అయితేనే దానికి పార్ట్‌ 2 తీసే ధైర్యం చేస్తారు. కానీ కంగువా సినిమాకు నెగటివ్‌ టాక్‌ వచ్చింది. దాంతో ఈ సినిమాకు సీక్వెల్‌ ఉండే అవకాశం ఉందా అంటూ కొందరు అనుమానాలు వ్యక్తం చేస్తున్నారు. కంగువా సినిమాను దాదాపుగా రూ.300 కోట్ల బడ్జెట్‌తో నిర్మించిన జ్ఞానవేల్‌ రాజా సీక్వెల్‌ను సైతం అదే స్థాయిలో నిర్మించగలడా అనే అనుమానాలు సైతం వ్యక్తం అవుతున్నాయి. సూర్య పాత్రను అద్భుతంగా చూపించిన దర్శకుడు శివ కథను మాత్రం లైట్‌ తీసుకున్నాడు అంటూ కొందరు విమర్శలు చేస్తున్నారు. వాటికి శివ నుంచి ఎలాంటి స్పందన వస్తుంది అనేది చూడాలి.

కంగువా సినిమాలో సూర్యను రెండు విభిన్నమైన పాత్రల్లో చూపించడం ద్వారా మెప్పించాడు. కానీ ఇతర పాత్రల విషయంలో ఏమాత్రం శ్రద్ద కనిపించలేదు. శివ గత చిత్రాలకు ఈ సినిమాకు పూర్తి వ్యత్యాసం ఉంది. రెగ్యులర్‌ కమర్షియల్‌ సినిమాలు మాత్రమే శివ చేయగలరు అని మరోసారి ఈ సినిమాతో నిరూపితం అయింది. ప్రయోగాత్మక సినిమాలను చేయడం ఆయన వల్ల కాదేమో అంటూ కొందరు అభిప్రాయం వ్యక్తం చేస్తున్నారు. మొత్తానికి సూర్య కంగువా సినిమా బాక్సాఫీస్‌ ముందుకు వచ్చిన తర్వాత శివ గురించి రకరకాలుగా ప్రచారం జరుగుతోంది. తదుపరి చేయబోతున్న అజిత్‌ సినిమాతో అయినా శివ హిట్‌ కొట్టేనా చూడాలి.