సౌత్ లో 'సూర్య'మయం

ప్రస్తుతం సౌత్ సినిమా ఇండస్ట్రీలో అత్యధికంగా చర్చించుకుంటున్న పేరు ఎస్ జె సూర్య. దర్శకుడిగా కెరియర్ స్టార్ట్ చేసిన ఎస్ జె సూర్య పవన్ కళ్యాణ్ కి ఖుషి లాంటి బ్లాక్ బస్టర్ హిట్ ఇచ్చారు. తెలుగు, తమిళ్ భాషలలో దర్శకుడిగా సూపర్ హిట్ సినిమాలు చేసిన ఎస్ జె సూర్య న్యూ అనే మూవీతో హీరోగా కెరియర్ స్టార్ట్ చేశాడు. అక్కడి నుంచి రెగ్యులర్ గా మూవీస్ చేస్తూ వస్తున్నాడు. ఇక సూపర్ స్టార్ మహేష్ బాబు స్పైడర్ సినిమాతో ప్రతినాయకుడిగా యూ టర్న్ తీసుకున్నారు.

ఆ సినిమా ఫ్లాప్ అయిన నటుడిగా సూర్యకి మంచి ఇమేజ్ తీసుకొచ్చింది. అక్కడి నుంచి వెనక్కి తిరిగి చూసుకునే అవకాశం లేకుండా విభిన్నమైన పాత్రలతో తనదైన శైలిలో విలనిజం పండిస్తూ అందరికి చేరువ అయ్యాడు. విలక్షణ నటుడిగా విమర్శకుల ప్రశంసలు సొంతం చేసుకున్నాడు. విజయ్ మెర్సల్ మూవీలో కూడా కార్పొరేట్ డాక్టర్ గా విలనిజం పండించి ప్రేక్షకులకి మరింత కనెక్ట్ అయ్యాడు.

మానాడు, మార్క్ ఆంటోనీ, జిగర్తాండ డబుల్ ఎక్స్ సినిమాలలో తనదైన శైలిలో క్యారెక్టర్స్ కి ప్రాణం పోసాడు. విలన్ గానే కాకుండా లీడ్ రోల్ లో కూడా ఎస్ జె సూర్య కోలీవుడ్ లో స్టార్ యాక్టర్ గా దూసుకుపోతున్నాడు. విలక్షణ శైలిలో మెప్పిస్తూ ఉండటంతో ఆడియన్స్ కూడా అతని పెర్ఫార్మెన్స్ ని ఆస్వాదిస్తున్నారు. మార్క్ ఆంటోనీ సినిమాలో విశాల్ క్యారెక్టర్ కంటే సూర్య పాత్రనే అందరికి రీచ్ అయ్యింది.

తాజాగా సరిపోదా శనివారం సినిమాతో తెలుగు ప్రేక్షకులకి కూడా మరోసారి సూర్య తనదైన విలనిజం చూపించి ప్రశంసలు సొంతం చేసుకున్నాడు. అతని డైలాగ్ డిక్షన్, క్యారెక్టర్ చాలా విభిన్నంగా ఉందనే మాట వినిపిస్తోంది. అందుకే ఈ జెనరేషన్ లో సౌత్ ఇండియన్ సినిమాకి ఎస్ జె సూర్య బెస్ట్ ప్రతినాయకుడిగా మారాడు. గతంలో ప్రకాష్ రాజ్ శకం చాలా కాలం నడిచింది.

ఆరంభంలో విలక్షణమైన పాత్రలు చేసిన ప్రకాష్ రాజ్ తరువాత రొటీన్ విలనిజంతో ప్రేక్షకులకి కనెక్ట్ కాలేకపోయారు. అయితే ఎస్ జె సూర్య మాత్రం చేసే ప్రతి పాత్రలో తన యూనిక్ ఆటిట్యూడ్, మేనరిజం ఉండేలా చూసుకుంటూ ఆడియన్స్ కి కొత్తదనం అందిస్తున్నారు. అందుకే ప్రస్తుతం సౌత్ లో ఎస్ జె సూర్య శకం నడుస్తోందనే మాట వినిపిస్తోంది. రామ్ చరణ్ గేమ్ చేంజర్ లో కూడా సూర్యనే ప్రతినాయకుడిగా కనిపించబోతూ ఉండటం విశేషం. మరి ఆ సినిమాలో అతని నటన ఏ రేంజ్ లో ఉంటుందో చూడాలి.