'సినీ' క్రిస్మస్.. వామ్మో అన్ని మూవీస్ వస్తున్నాయా?

పండగలు వస్తే చాలు.. థియేటర్లలో రిలీజ్ అయ్యేందుకు అనేక సినిమాలు సిద్ధమవుతుంటాయన్న విషయం తెలిసిందే. సినిమాలకు పెద్ద సీజన్ అయిన సంక్రాంతికి ముందు వచ్చే క్రిస్మస్ కానుకగా ఇప్పుడు పలు చిత్రాలు వచ్చేందుకు రెడీ అవుతున్నాయి. ఇప్పటికే బోలెడు మూవీస్ డేట్స్ ఫిక్స్ చేసుకున్నాయి. అవేంటంటే?

టాలీవుడ్ నటుడు అల్లరి నరేష్.. బచ్చల మల్లి మూవీతో డిసెంబర్ 20వ తేదీన ప్రేక్షకుల ముందుకు రానున్నారు. 1990 బ్యాక్ డ్రాప్ తో సాగే కథతో యాక్షన్ ఎంటర్టైనర్ గా రూపొందుతున్న ఆ చిత్రంలో అమృత అయ్యర్ హీరోయిన్ గా నటిస్తున్నారు. ఇప్పటికే ఆడియన్స్ లో బచ్చల మల్లి సినిమాపై భారీ అంచనాలు నెలకొన్నాయి.

యంగ్ హీరో నితిన్, డైరెక్టర్ వెంకీ కుడుముల కాంబోలో తెరకెక్కుతున్న రాబిన్ హుడ్ డిసెంబర్ 25వ తేదీన రిలీజ్ కానుంది. యాక్షన్‌ ఎంటర్టైనర్‌ గా రూపొందుతున్న ఆ సినిమాలో శ్రీలీల హీరోయిన్ గా నటిస్తున్నారు. మరోవైపు గౌతమ్‌ తిన్ననూరి దర్శకత్వం వహిస్తున్న మ్యాజిక్ మూవీ.. డిసెంబర్ 21వ తేదీన ప్రేక్షకుల ముందుకు రానుంది.

ప్రియదర్శి, రూప కొడువాయూర్‌ ప్రధాన పాత్రల్లో దర్శకుడు మోహనకృష్ణ ఇంద్రగంటి తెరకెక్కిస్తున్న సారంగపాణి జాతకం మూవీ డిసెంబర్ 20న తేదీన విడుదల కానుంది. నటుడు రాజేంద్ర ప్రసాద్‌ మనవరాలు బేబీ సాయి తేజస్విని కీలక పాత్ర పోషించిన చిత్రం ఎర్రచీర: ది బిగినింగ్‌ కూడా అదే రోజు ప్రేక్షకుల ముందుకు రానుంది.

అదే రోజు కన్నడ నటుడు ఉపేంద్ర యూఐ మూవీతో కూడా సందడి చేయనున్నారు. హీరోగా నటిస్తూనే దర్శకత్వం కూడా వహిస్తున్నారు. ఫాంటసీ జోనర్ లో తెరకెక్కిస్తున్నారు. బ్లాక్ బస్టర్ హిట్ కోలీవుడ్ మూవీ సూరి సీక్వెల్ విడుదలై-2 కూడా అప్పుడే రిలీజ్ కానుంది. పీరియాడికల్ క్రైమ్ థ్రిల్లర్ గా వెట్రిమారన్ తెరకెక్కిస్తున్నారు.

సౌత్ స్టార్ హీరోయిన్ కీర్తి సురేష్ బాలీవుడ్ డెబ్యూ మూవీ బేబీ జాన్.. డిసెంబరు 25న బాక్సాఫీసు ముందుకు రానుంది. యాక్షన్‌ థ్రిల్లర్‌ జోనర్ లో రూపొందుతున్న ఆ చిత్రంలో వరుణ్ ధావన్ హీరోగా నటిస్తుండగా.. కాలీస్‌ దర్శకత్వం వహిస్తున్నారు. మరోవైపు, డిసెంబర్ 20వ తేదీన హాలీవుడ్ మూవీ ముఫాసా: ది లయన్ కింగ్ విడుదల కానుంది.

కొన్నాళ్ల క్రితం వచ్చిన సూపర్ హిట్ అయిన ది లయన్ కింగ్ కు ప్రీక్వెల్ గా రూపొందుతున్న ఆ మూవీ తెలుగులో కూడా విడుదల కానుంది. ముఫాసా పాత్రకు టాలీవుడ్ సూపర్ స్టార్ మహేష్ బాబు వాయిస్ ఓవర్ అందించారు. మరి ఆ సినిమాలన్నీ.. ఎలాంటి హిట్స్ అవుతాయో వేచి చూడాలి.