తక్కువ బడ్జెట్ లో వండర్స్ క్రియేట్ చేస్తోన్న సౌత్ సినిమాలు

సౌత్ ఇండియా సినిమా మార్కెట్ పరిధి విస్తరించింది. ఒకప్పుడు కేవలం ఒక భాషకి పరిమితం అయిన సినిమాలు ఇప్పుడు మల్టీ లాంగ్వేజ్ లలో ప్రేక్షకులని అలరిస్తున్నాయి. యూనివర్శల్, కాంటెంపరరీ స్టోరీలని తీసుకొని దర్శకులు సిల్వర్ స్క్రీన్ పై అద్భుతంగా ఆవిష్కరించి సక్సెస్ లు అందుకుంటున్నారు. కథలో దమ్ముంటే హీరో ఎవరనేది పట్టించుకోకుండా ఆడియన్స్ ఆదరిస్తారని సౌత్ లో వచ్చిన చిన్న సినిమాలు ప్రూవ్ చేశాయి.

ఒకప్పుడు సౌత్ సినిమా అంటే హీరో ఇమేజ్ చుట్టూ కథలు అల్లుకుంటూ ప్యూర్ కమర్షియల్ జోనర్ లో చేసిన సినిమాలు కనిపించేవి. ఇప్పుడు హీరో కంటే కథలకి దర్శకులు ఎక్కువ ప్రాధాన్యత ఇస్తున్నారు. హీరోలు కూడా కమర్షియల్ ఇమేజ్ అంటూ పరుగులు పెట్టకుండా కొత్తగా తమని తాము రిప్రజెంట్ చేసుకునే ప్రయత్నం చేస్తున్నారు. అందుకే తక్కువ బడ్జెట్ లో కూడా మంచి సినిమాలు వస్తున్నాయి. ఇటీవల కాలంలో స్టోరీ కంటెంట్ తో బాక్సాఫీస్ వద్ద కొన్ని సినిమాలు వండర్స్ క్రియేట్ చేశాయి.

16 కోట్లతో కన్నడంలో రిషబ్ శెట్టి హీరోగా స్వీయ దర్శకత్వంలో తెరకెక్కిన కాంతారా మూవీ రిలీజ్ అయిన అన్ని భాషలలో హిట్ అయ్యి 400 కోట్లు కలెక్షన్స్ అందుకుంది. అసలు ఈ సినిమా మొదట్లో కేవలం కన్నడలోనే క్లిక్ అవుతుందని అనుకున్నారు. కానీ ఆ తరువాత టాలీవుడ్ నుంచి బాలీవుడ్ వరకు వెళ్లి వందల కోట్ల వసూళ్లతో ఒక సెన్సేషన్ క్రియేట్ చేసింది.

తమిళంలో వచ్చిన లివ్ టుడే మూవీ కేవలం 5 కోట్ల బడ్జెట్ తో తెరకెక్కి వంద కోట్ల కలెక్షన్స్ ని రాబట్టింది. ఈ మూవీ ఇప్పుడు హిందీలో రీమేక్ అవుతోంది. లవ్ టుడే లో నటించిన వారికి కూడా అంతకుముందు బాక్సాఫీస్ వద్ద అంతగా సక్సెస్ ఏమి లేదు. నేటితరంలో యువత ప్రేమ, నమ్మకానికి సంబంధించిన అంశాలను హైలెట్ చేయడంతో కంటెంట్ బాగా కనెక్ట్ అయ్యింది.

నిఖిల్ హీరోగా చందూ మొండేటి దర్శకత్వంలో కార్తికేయ 2 15 కోట్ల బడ్జెట్ తో నిర్మించగా 120 కోట్ల కలెక్షన్స్ కొల్లగొట్టింది. ఈ సినిమా కూడా అసలు ఈ రేంజ్ లో హిట్ అవుతుందని ఎవరు ఊహించలేదు. హిందీలో చిన్నగా మొదలై ఆ తరువాత ఊహించని రేంజ్ లో బాక్సాఫీస్ కలెక్షన్స్ ను పెంచుకుంది. 15 కోట్ల బడ్జెట్ తో తేజ సజ్జా లీడ్ రోల్ లో తెరకెక్కిన సూపర్ హీరో మూవీ హనుమాన్ ఏకంగా 300 కోట్లు ప్రపంచ వ్యాప్తంగా రాబట్టింది. ఈ సినిమా రికార్డుల గురించి ప్రత్యేకంగా చెప్పనక్కర్లేదు.

మలయాళంలో 4 కోట్ల బడ్జెట్ తో కొత్తవాళ్లతో తెరకెక్కిన ప్రేమలు మూవీ ఇప్పటి వరకు 120 కోట్లు కలెక్షన్స్ రాబట్టింది. తక్కువ బడ్జెట్ తో నిర్మించిన ఎక్కువ లాభాలు తీసుకొచ్చిన మూవీ అంటే ప్రేమలు అని చెప్పాలి. ఈ సినిమాల కామన్ పాయింట్ లో బడ్జెట్. అయితే మూవీస్ లో కథాంశం ప్రేక్షకులకి కనెక్ట్ అవ్వడంతో బాగా ఆదరించారు. కాంతారా, హనుమాన్, కార్తికేయ సినిమాలని అయితే నార్త్ ఇండియన్ ఆడియన్స్ మనకంటే ఎక్కువ ఆదరించడం విశేషం. ప్రేక్షకులని మెప్పించే కథ ఉంటే భాషాబేధం లేకుండా సినిమా సక్సెస్ అందుకుంటుందని ఈ మూవీస్ అన్ని ప్రూవ్ చేశాయి. అయితే కొన్ని సినిమాలు వందల కోట్ల బడ్జెట్ తో నిర్మించిన కూడా ఆడియన్స్ ని మెప్పించడంలో మాత్రం విఫలం అవుతూ ఉంటాయి.