మరో స్టార్‌ హీరోకి జోడీగా శ్రీలీల

పుష్ప 2 సినిమాలో అల్లు అర్జున్‌తో కలిసి కిస్సిక్‌ ఐటెం సాంగ్‌కి డాన్స్ చేసిన ముద్దుగుమ్మ శ్రీలీల ప్రస్తుతం దేశం మొత్తం ఊపేస్తోంది. రెండు రోజుల్లోనే ఏకంగా 50 మిలియన్‌ల వ్యూస్‌ను సొంతం చేసుకున్న కిస్సిక్ పాటతో శ్రీలీల ఒక్కసారిగా పాన్‌ ఇండియా స్టార్‌ హీరోయిన్‌గా మారి పోయింది. ప్రస్తుతం శ్రీలీల టాలీవుడ్‌లో రెండు సినిమాలు చేస్తోంది. కోలీవుడ్‌లో తాజాగా ఈమె కొత్త సినిమాకు కమిట్‌ అయింది. ఇటీవల విడుదల అయిన అమరన్‌ సినిమాతో పాన్‌ ఇండియా స్టార్‌గా నిలిచిన శివ కార్తికేయన్‌ హీరోగా సుధా కొంగర దర్శకత్వంలో ఒక భారీ సినిమా రూపొందబోతున్న విషయం తెల్సిందే. ఇటీవలే ఆ సినిమా అధికారిక ప్రకటన వచ్చింది.

శివ కార్తికేయన్‌ 'అమరన్‌' సినిమాతో ఏకంగా రూ.300 కోట్ల క్లబ్‌లో చేరాడు. నాలుగో వారంలోనూ సినిమా భారీ వసూళ్లు సొంతం చేసుకుంటున్న నేపథ్యంలో శివ కార్తికేయన్‌ క్రేజ్ ఏ స్థాయిలో పెరిగిందో అర్థం చేసుకోవచ్చు. తమిళనాట స్టార్‌ హీరోల సరసన నిలిచిన శివ కార్తికేయన్‌ ప్రస్తుతం మురుగదాస్‌ దర్శకత్వంలో ఒక సినిమా చేస్తున్నాడు. ఆ సినిమా షూటింగ్‌ ప్రారంభం అయ్యిందని సమాచారం అందుతోంది. వచ్చే ఏడాదిలో సుధా కొంగర దర్శకత్వంలో ఒక ఛారిత్రాత్మక నేపథ్యంలోని సినిమాను శివ కార్తికేయన్‌ చేయబోతున్నాడు. ఆ సినిమాలో హీరోయిన్‌గా శ్రీలీలను ఎంపిక చేయడం జరిగిందని తమిళ మీడియా వర్గాల ద్వారా సమాచారం అందుతోంది.

ఈ ఏడాది ఆరంభంలో మహేష్ బాబుతో కలిసి గుంటూరు కారం సినిమాతో వచ్చిన శ్రీలీల కాస్త బ్రేక్‌ తీసుకుంది. పుష్ప 2 సినిమాలో ఐటెం సాంగ్‌ చేయడం ద్వారా మళ్లీ పుంజుకుంది. భారీ అంచనాల నడుమ రూపొందుతున్న సినిమాల్లో శ్రీలీలకు ఛాన్స్‌ దక్కింది. ఇప్పుడు అమరన్‌ స్టార్‌తో శ్రీలీలకు ఛాన్స్ దక్కడంతో ఆమె స్థాయి మరింతగా పెరిగినట్లు అయింది. ముందు ముందు ఈ అమ్మడు మరిన్ని టాలీవుడ్‌, కోలీవుడ్‌ సినిమాల్లో నటించే అవకాశాలు ఉన్నాయని ఆమె సన్నిహితులు చెబుతున్నారు. ఈ ఏడాది కాస్త జోరు తగ్గించిన శ్రీలీల వచ్చే ఏడాది అర డజను సినిమాలతో వచ్చే అవకాశాలు ఉన్నాయట.

ప్రస్తుతం శ్రీలీలకు టాలీవుడ్‌, కోలీవుడ్‌ నుంచి వరుసగా ఆఫర్లు వస్తున్నాయి. అయితే వచ్చిన ప్రతి ఆఫర్‌ను ఈ అమ్మడు కమిట్‌ కాకుండా తక్కువ సినిమాలను మాత్రమే చేస్తుంది. ఒక వైపు చదువుకుంటూ మరో వైపు సినిమాలు చేస్తోందట. చదువు కోసం ఇటీవల కొన్ని సినిమా ఆఫర్లను తిరస్కరించిందనే వార్తలు వచ్చాయి. మొత్తానికి శ్రీలీల జోరు వచ్చే ఏడాది ఓ రేంజ్‌లో ఉండబోతుంది అనేందుకు సాక్ష్యంగా కిస్సిక్‌ పాట ఉండబోతుందని ఆమె ఫ్యాన్స్‌తో పాటు సినీ వర్గాల వారు, విశ్లేషకులు అభిప్రాయం వ్యక్తం చేస్తున్నారు.