విజ్జీ పాప హిందీ సినిమా.. అసలు ముచ్చట ఇదా!

పెళ్లి సందడితో టాలీవుడ్‌ లో అడుగు పెట్టి, ధమాకా సినిమాతో సూపర్‌ హిట్ ను దక్కించుకుని, భగవంత్‌ కేసరి సినిమాలో విజ్జీ పాపగా నటించి విమర్శకుల ప్రశంసలు దక్కించుకున్న ముద్దుగుమ్మ శ్రీలీల. ఈ అమ్మడు టాలీవుడ్‌ లో మోస్ట్‌ బిజీ హీరోయిన్‌ అనడంలో సందేహం లేదు.

కొన్ని ఫ్లాప్స్ పడ్డా కూడా శ్రీలీల జోరు కంటిన్యూ అవుతోంది. కేవలం టాలీవుడ్‌ లోనే కాకుండా కోలీవుడ్‌ లో కూడా ఈ అమ్మడికి ఆఫర్లు వస్తున్నాయి. ఇక కన్నడంలో ఈమె సినిమాలు మొదటి నుంచి కూడా కొనసాగుతూనే ఉన్నాయి. ఇలాంటి సమయంలో బాలీవుడ్‌ నుంచి ఈ అమ్మడికి సినిమా ఆఫర్‌ వచ్చింది, దాన్ని ఈమె కాదన్నది అనే వార్తలు వచ్చాయి.

బాలీవుడ్‌ యంగ్ హీరో వరుణ్‌ ధావన్‌ నటిస్తున్న ఒక కామెడీ ఎంటర్‌టైనర్‌ మూవీలో హీరోయిన్ పాత్ర కోసం శ్రీలీలను సంప్రదించారు అనే వార్తలు వచ్చాయి, అందుకు ఆమె తిరస్కరించింది అంటూ కూడా పుకార్లు షికార్లు చేశాయి. సౌత్‌ సినిమాలను నమ్ముకుని హిందీ సినిమా వద్దు అనుకోవడం ఏంటి అంటూ చాలా మంది విమర్శించారు.

శ్రీలీల హిందీ సినిమా విషయమై అసలు విషయం క్లారిటీ వచ్చింది. వరుణ్ ధావన్ నటిస్తున్న సినిమాని నిర్మిస్తున్న రమేష్‌ మాట్లాడుతూ.. ఇప్పటి వరకు మా సినిమా కోసం ఏ ఒక్క హీరోయిన్‌ ను సంప్రదించలేదు అంటూ క్లారిటీ ఇచ్చాడు.

వరుణ్ ధావన్ పై కీలక సన్నివేశాల చిత్రీకరణ తో మొదటి షెడ్యూల్‌ పూర్తి అయ్యింది. త్వరలో రెండో షెడ్యూల్‌ ప్రారంభిస్తాం. అప్పటి వరకు హీరోయిన్‌ విషయంలో ఒక స్పష్టత వచ్చే అవకాశాలు ఉన్నాయి. హీరోయిన్‌ ను ఎంపిక చేసిన వెంటనే మీడియా కి తెలియజేస్తాం.

ఈలోపు ఎవరికి ఇష్టం వచ్చినట్లుగా వారు పుకార్లను పుట్టించవద్దు అంటూ ఆయన పేర్కొన్నాడు. శ్రీలీల ప్రస్తుతానికి తెలుగు మరియు తమిళ సినిమాలతో బిజీగానే ఉంది. హిందీ సినిమా ఆఫర్‌ వచ్చినా చేసే అవకాశాలు ఉన్నాయి. కనుక వరుణ్ మూవీ ని శ్రీలీల వద్దు అనుకోవడం అనేది పుకారే అని తేలిపోయింది.