శ్రీవల్లి దారి పట్టిన శ్రీలీల..!

రాఘవేంద్ర రావు కొత్త సినిమా పెళ్లి సందడి తో తెలుగు ప్రేక్షకులకు పరిచయం అయిన ముద్దుగుమ్మ శ్రీలీల. తెలుగు మూలాలు ఉన్న ఈ అమ్మడు టాలీవుడ్ లో స్టార్‌ హీరోయిన్‌ గా వరుస సినిమాలు చేస్తుంది. ఆ మధ్య చేతిలో ఏకంగా అర డజను సినిమాలను పెట్టుకున్న శ్రీలీల ఇప్పుడు ఇతర భాషల సినిమాల్లో కూడా నటిస్తుంది.

ఒక వైపు టాలీవుడ్‌ లో స్టార్‌ హీరోల సినిమాల్లో నటిస్తున్న శ్రీలీల మరో వైపు తమిళం మరియు హిందీ సినిమాల్లో నటిస్తోంది. తాజాగా ఈ అమ్మడు బాలీవుడ్‌ లో రెండు క్రేజీ ప్రాజెక్ట్‌ లకు సైన్ చేసిందనే వార్తలు వస్తున్నాయి. ఉత్తరాది ప్రేక్షకుల అభిరుచికి తగ్గట్టుగా శ్రీలీల అందాల ప్రదర్శన చేస్తుంది అనడంలో సందేహం లేదు.

బాలీవుడ్‌ లో వరుణ్ దావన్ తో కలిసి ఒక సినిమాను చేయబోతున్న ఈ అమ్మడు మరో సినిమాకు కూడా సైన్ చేసిందట. ఒకే సారి రెండు సినిమా ఆఫర్లు దక్కించుకున్న శ్రీలీల హిందీలో ముందు ముందు రోజుల్లో బిజీ అయ్యే అవకాశాలు ఉన్నాయంటూ ఇండస్ట్రీ వర్గాల వారు అభిప్రాయం వ్యక్తం చేస్తున్నారు.

టాలీవుడ్‌ లో వరుసగా పెద్ద సినిమాలు చేస్తున్న నేషనల్‌ క్రష్ రష్మిక మందన్న ఇటీవల బ్యాక్ టు బ్యాక్ హిందీ సినిమాలకు సైన్ చేసిన విషయం తెల్సిందే. పుష్ప శ్రీవల్లి దారిలోనే ముద్దుగుమ్మ శ్రీలీల కూడా బాలీవుడ్ లో తన అదృష్టం ను పరీక్షించుకునేందుకు రెడీ అయ్యింది.

సౌత్‌ నుంచి వెళ్లిన హీరోయిన్స్ లో అతి కొద్ది మంది మాత్రమే బాలీవుడ్‌ లో హిట్ అయ్యారు. రష్మిక మందన్న యానిమల్‌ సినిమా మినహా మరే సినిమాతో అక్కడ హిట్‌ కొట్టలేదు. మరి శ్రీలీల అయినా బాలీవుడ్‌ లో అదృష్టం తో వరుస హిట్స్ ను అందుకునేనా చూడాలి.

రవితేజకు జోడీగా ఇటీవలే ఒక సినిమాకు సైన్ చేసిన ఈ అమ్మడు మరో యంగ్‌ హీరో తో సినిమాకు రెడీ అయ్యింది. ప్రస్తుతం బిజీ బిజీగా షూటింగ్స్ తో ఉన్న శ్రీలీల హిందీ సినిమాలకు కూడా ఓకే చెప్పడం వల్ల మరింతగా బిజీ అయ్యే అవకాశాలు ఉన్నాయి.