శ్రీలీల మరో బాలీవుడ్ మూవీ.. ఆమె కూడా!

పెళ్లి సందడి మూవీతో టాలీవుడ్ లో అడుగుపెట్టిన శ్రీలీల.. ఆ తర్వాత రవితేజ ధమాకాతో పెద్ద హిట్ అందుకున్న విషయం తెలిసిందే. తెలుగులో వరుసగా ఆఫర్లు దక్కించుకుని స్టార్ హీరోయిన్ గా మారిపోయింది. కానీ ఆ తర్వాత ఆమె ఖాతాలో డిజాస్టర్లు వచ్చి చేరాయి. 2024 సంక్రాంతికి వచ్చిన మహేష్ బాబు గుంటూరు కారంతో కూడా హిట్ కొట్టలేకపోయింది. భగవంత్ కేసరి తర్వాత ఆమె చేసిన అన్ని సినిమాలు నిరాశపరిచాయి.

అయినప్పటికీ శ్రీలీల క్రేజ్ అస్సలు తగ్గలేదు. ప్రస్తుతం తెలుగులో మూడు సినిమాలు చేస్తున్న ఈ బ్యూటీ.. బాలీవుడ్ లో కూడా ఆఫర్లు అందుకుంటోంది. త్వరలోనే సైఫ్‌ అలీఖాన్‌ కుమారుడు ఇబ్రహీం అలీఖాన్‌ డైలర్‌ మూవీతో శ్రీలీల బాలీవుడ్ డెబ్యూ ఇవ్వనున్నట్లు వార్తలు వచ్చాయి. అందుకు సంబంధించిన అఫీషియల్ అనౌన్స్మెంట్ రాకముందే మరో మూవీ ఆఫర్ ను ఆమె ఇప్పుడు దక్కించుకున్నట్లు సినీ వర్గాల్లో టాక్ వస్తోంది.

బాలీవుడ్ స్టార్ హీరో వరుణ్ ధావన్ తో శ్రీలీల యాక్ట్ చేయనున్నట్లు వార్తలు వినిపిస్తున్నాయి. బేబీ జాన్‌, సన్నీ సంస్కారీ కీ తులసీ కుమారి వంటి పలు సినిమాలతో బిజీగా ఉన్న వరుణ్.. తన తండ్రి డేవిడ్ ధావన్ డైరెక్షన్లో ఓ సినిమా చేయనున్నారు. అందులో హీరోయిన్ గా శ్రీలీలను ఫిక్స్ చేసినట్లు తెలుస్తోంది. అయితే ఆమెతో పాటు ఆ మూవీలో మృణాల్ ఠాకూర్ కూడా నటిస్తున్నట్లు జోరుగా ప్రచారం సాగుతోంది.

పక్కా కమర్షియల్ ఎంటర్టైనర్ గా తెరకెక్కనున్న ఈ సినిమా.. హీరో ట్రయాంగిల్ లవ్ స్టోరీ చుట్టూ తిరగనున్నట్లు తెలుస్తోంది. అందుకే శ్రీలీల, మృణాల్‌ ఠాకూర్‌ ను మేకర్స్ ఎంచుకున్నట్లు సమాచారం. అయితే శ్రీలీల బాలీవుడ్ డెబ్యూ ఖరారు అయినట్లు వార్తలు వస్తున్నా.. ఇంకా సెట్స్ పైకి వెళ్లలేదు. ఇంతలో శ్రీలీలకు మరో ఆఫర్ కూడా వచ్చినట్లు ఇప్పుడు వార్తలు వస్తున్నాయి. మరి ఏ సినిమా ముందు పట్టాలెక్కుతుందో వేచి చూడాలి.

మరోవైపు, వరుస షూటింగ్స్ తో బిజీ బిజీగా గడుపుతున్న హీరో వరుణ్ ధావన్.. త్వరలో సిటాడెల్ హనీ బన్నీ వెబ్ సిరీస్ తో ప్రేక్షకుల ముందుకు రానున్నారు. స్టార్ హీరోయిన్ సమంత ఫిమేల్ లీడ్ రోల్ పోషించిన ఈ సిరీస్.. అమెజాన్ ప్రైమ్ వీడియోలో స్ట్రీమింగ్ కానుంది. శ్రీలీల చేస్తున్న రాబిన్ హుడ్ డిసెంబర్ లో రిలీజ్ కానుంది. మృణాల్.. కల్కి మూవీలో మెరవనున్నట్లు టాక్. మరి వీరు ముగ్గురు కలిసి చేసే సినిమా ఎలా ఉంటుందో చూడాలి.