స్వాగ్ కోసం శ్రీవిష్ణు.. ఏకంగా 4 గంటలపాటు అలా..

టాలీవుడ్ యంగ్ హీరో శ్రీవిష్ణు తనకంటూ ప్రత్యేక గుర్తింపు సంపాదించుకున్న విషయం తెలిసిందే. క్యారెక్టర్ ఆర్టిస్ట్ గా ఇండస్ట్రీలోకి ఎంట్రీ ఇచ్చిన ఆయన.. ప్రస్తుతం వరుస హిట్లు అందుకుంటూ హీరోగా దూసుకుపోతున్నారు. గత ఏడాది సామజవరగమనతో వచ్చిన శ్రీవిష్ణు.. ఇటీవల ఓం భీమ్ బుష్ మూవీతో సందడి చేశారు. రాహుల్ రామకృష్ణ, ప్రియదర్శితో కలిసి కడుపుబ్బా నవ్వించారు. కథల విషయంలో విభిన్నంగా ఆలోచిస్తూ రానిస్తున్నారు.,

ప్రస్తుతం శ్రీవిష్ణు.. స్వాగ్ మూవీ చేస్తున్న సంగతి కూడా తెలిసిందే. రాజ రాజ చోర డైరెక్టర్ హసిత్ గోలి దర్శకత్వం వహిస్తున్న ఈ సినిమాను పీపుల్ మీడియా ఫ్యాక్టరీ బ్యానర్ పై టీజీ విశ్వప్రసాద్ గ్రాండ్ గా నిర్మిస్తున్నారు. శ్రీవిష్ణు, హసిత్ గోలి కాంబో రిపీట్ అవుతుండడంతో మూవీపై ఆడియన్స్ లో మంచి అంచనాలు నెలకొన్నాయి. దాంతోపాటు మేకర్స్ ఇప్పటికే రిలీజ్ చేసిన టీజర్, హీరోయిన్ గ్లింప్స్ సాలిడ్ రెస్పాన్స్ దక్కించుకున్నాయి.

ఇటీవల రేజర్ పేరుతో విడుదలైన శ్రీవిష్ణు క్యారెక్టర్ గ్లింప్స్.. వేరే లెవల్ లో ఉంది. అందులో శ్రీవిష్ణును చూసి అంతా షాకైపోయారు. ముసలివాడి లాగా కనిపిస్తూ దివాకర్ పేట ఎస్ ఐ భవభూతి రోల్ లో ఆయన అదరగొట్టారు. విచిత్రమైన నవ్వుతో ఫేస్ రివీల్ అవ్వగా.. ఆ సమయంలో తన టాలెంట్ ఏంటో చూపించారు యంగ్ హీరో. చెప్పాలంటే వయసు మళ్లిన పాత్రలో శ్రీవిష్ణు చక్కగా ఒదిగిపోయారు.

అయితే భవభూతి గెటప్ పై జోరుగా చర్చ సాగగా.. మేకర్స్ రీసెంట్ గా సర్ప్రైజ్ వీడియోను రిలీజ్ చేశారు. ముసలి వాడి గెటప్ లో శ్రీవిష్ణు కనిపించేందుకు నాలుగు గంటలపాటు మేకప్ చేయాల్సి వచ్చిందని తెలిపారు. వయసు మళ్లిన పాత్రలో కనిపించేందుకు శ్రీవిష్ణును ప్రముఖ మేకప్ ఆర్టిస్ట్ రషీద్ సూపర్ గా తీర్చిదిద్దారు. అందుకు సంబంధించిన వీడియోను మేకర్స్ పోస్ట్ చేశారు. ప్రస్తుతం ఆ వీడియో నెట్టింట వైరల్ గా మారింది.

మేకప్ కు చాలా టైమ్ పట్టినా.. అందుకు తగ్గ అవుట్ పుట్ మాత్రం శ్రీవిష్ణు ఇచ్చారని నెటిజన్లు చెబుతున్నారు. యంగ్ హీరో యాక్టింగ్ టాలెంట్ ను కొనియాడుతున్నారు. ఈ సినిమాలో రీతూ వర్మ హీరోయిన్ గా నటిస్తుండగా.. సీనియర్ బ్యూటీ మీరా జాస్మిన్ కీలక పాత్ర పోషిస్తోంది. దీక్ష కూడా మరో ముఖ్య పాత్రలో యాక్ట్ చేస్తోంది. మగవాడి కథతోపాటు అచ్చ తెలుగు సినిమా అంటూ మేకర్స్ ప్రమోట్ చేస్తున్నారు. మరి ఈ మూవీ ఎప్పుడు రిలీజ్ అవుతుందో చూడాలి.