వెన్నెల కిషోర్ 'శ్రీకాకుళం షెర్లాక్ హోమ్స్'.. టీజర్ ఎలా ఉందంటే?

టాలీవుడ్ స్టార్ కమెడియన్ వెన్నెల కిషోర్ హీరోగా నటిస్తున్న లేటెస్ట్ మూవీ శ్రీకాకుళం షెర్లాక్ హోమ్స్. క్రైమ్ కామెడీ థ్రిల్లర్ గా రైటర్ మోహన్ దర్శకత్వం వహిస్తున్న ఆ సినిమా ఇప్పుడు రిలీజ్ కు సిద్ధమవుతోంది. క్రిస్మస్ కానుకగా డిసెంబర్ 25వ తేదీన మూవీ విడుదల అయ్యేందుకు రెడీ అవుతోంది. అందుకు సంబంధించిన అన్ని ఏర్పాట్లను పూర్తి చేస్తున్నారు మేకర్స్.

అనన్య నాగళ్ల, సీయా గౌతమ్ కథానాయికలుగా నటిస్తున్న ఆ సినిమాను లాస్యారెడ్డి సమర్పణలో శ్రీ గణపతి సినిమాస్ బ్యానర్‌ పై వెన్నపూస రమణారెడ్డి నిర్మిస్తున్నారు. రాజేష్ రామ్ బాల్ ఎగ్జిక్యూటివ్ నిర్మాతగా వ్యవహరిస్తున్నారు. ఇప్పటికే ప్రమోషన్స్ స్టార్ట్ చేసిన మేకర్స్.. ఆడియన్స్ ను అలరిస్తున్నారు. సినిమాపై పాజిటివ్ బజ్ క్రియేట్ అయ్యేలా చేస్తున్నారు. తాజాగా టీజర్ ను రిలీజ్ చేశారు.

మాజీ ప్రధాని రాజీవ్ గాంధీ ఆత్మాహుతి దాడికి సంబంధించిన బ్రేకింగ్ న్యూస్‌ తో టీజర్ ప్రారంభమవుతుంది. ఒక పోలీసు అధికారి క్రిమినల్ కేసును ఛేదించడానికి డిటెక్టివ్‌ కు అప్పగించాలని అనుకుంటారు. కానీ క్రెడిట్ మాత్రం తాను తీసుకోవాలనుకుంటారు. ఆ పనిని శ్రీకాకుళం షెర్లాక్ హోమ్స్‌(వెన్నెల కిషోర్)కు అప్పగిస్తారు. ఆ తర్వాత సినిమాలోని పాత్రలను పరిచయం చేశారు మేకర్స్.

అవుట్ లుక్ చూసి కాదు సార్.. అవుట్ పుట్ చేసి ఇవ్వండి.. ఛాన్స్ ఇస్తే కదా.. చిరు మెగాస్టార్ అయ్యారు అంటూ తన డైలాగ్ ఇంట్రెస్ట్ పెంచారు వెన్నెల కిషోర్. ఆ తర్వాత సినిమాలో పలు సీన్స్ ను చూపించి ఆసక్తి రేపారు మేకర్స్. ఆ క్రైమ్ లో సూత్రధారి, పాత్రధారి, మాయదారి కూడా ఉన్నాడంటూ ఫన్నీ డైలాగ్ తో టీజర్ ఎండ్ అయింది. ప్రస్తుతం సోషల్ మీడియాలో ఓ రేంజ్ లో వైరల్ అవుతోంది.

అయితే టీజర్ లో వెన్నెల కిషోర్ తన కామిక్ టైమింగ్ తో మరోసారి మెప్పించారు. తన పాత్రలో ఒదిగిపోయారు. సినిమాలో క్రేజీ రోల్ ను పోషిస్తున్నట్లు క్లియర్ గా అర్థమవుతుంది. క్రైమ్ కేసు ఛేదించడంలో ఆయన స్టైల్ వెరైటీగా ఉండి ఆకట్టుకుంటోంది. రచయిత మోహన్.. ఆకర్షణీయమైన కథను రాసుకున్నారు. తన డైరెక్షన్ టాలెంట్ తో మెప్పించారు.

మల్లికార్జున్ ఎన్ సినిమాటోగ్రఫీ.. మెయిన్ అసెట్ గా మారింది. సునీల్ కశ్యప్ బ్యాక్ గ్రౌండ్ స్కోర్ ఆకట్టుకుంది. ఓవరాల్ గా టీజర్ బాగుందని సినీ ప్రియులు చెబుతున్నారు. మూవీపై అంచనాలు పెరుగుతున్నాయని కామెంట్లు పెడుతున్నారు. మరి శ్రీకాకుళం షెర్లాక్ హోమ్స్ మూవీతో హీరోగా వెన్నెల కిషోర్ ఎలాంటి హిట్ అందుకుంటారో వేచి చూడాలి.