రాజమౌళి - మహేష్.. బడ్జెట్ పై ఓ క్లారిటీ వచ్చేసింది

ఇండియన్ బాక్సాఫీస్ హిస్టరీలో ఇప్పటి వరకు హైయెస్ట్ బడ్జెట్ చిత్రం అంటే ‘కల్కి 2898ఏడీ’ అని చెప్పాలి. ఈ సినిమాకి 600 కోట్ల బడ్జెట్ ఖర్చు పెట్టారు. ‘కల్కి పార్ట్ 2’ కి ఇంతకంటే ఎక్కువ బడ్జెట్ అవుతుందని అనుకుంటున్నారు. అయితే సూపర్ స్టార్ మహేష్ బాబుతో రాజమౌళి చేయబోయే ‘SSMB29’ మూవీ బడ్జెట్ మాత్రం 1000 కోట్లు దాటిపోతుందని తెలుస్తోంది. కెఎల్ నారాయణ నిర్మిస్తున్న ఈ సినిమా బడ్జెట్ అంచనాలకు మించి ఉన్నట్లు చాలా కాలంగా టాక్ వినిపిస్తోంది.

తాజాగా సీనియర్ ప్రొడ్యూసర్ కమ్ డైరెక్టర్ తమ్మారెడ్డి భరద్వాజ ఈ విషయాన్ని చెప్పారు. ఓ యుట్యూబ్ ఛానల్ ఇంటర్వ్యూలో ఆయన మాట్లాడుతూ ఈ సినిమా బడ్జెట్ గురించి మాట్లాడారు. మహేష్ బాబు సినిమాలో హాలీవుడ్ యాక్టర్స్, టెక్నీషియన్స్ పనిచేస్తారని తెలిపారు. 1000 కోట్లకి పైగా ఎంతైనా బడ్జెట్ అవ్వొచ్చని అన్నారు. అలాగే 2000 కోట్లకి పైగా కలెక్షన్స్ రాబట్టాలనే లక్ష్యంతో ప్లానింగ్ చేస్తున్నారని అన్నారు. ఇండియన్ సినిమా హిస్టరీలో ఇప్పటి వరకు ఏ సినిమాకి ఇంత పెద్ద మొత్తం వెచ్చించలేదని పేర్కొన్నారు.

కచ్చితంగా ఈ మూవీ చాలా రికార్డులని సృష్టించే అవకాశం ఉందని తెలిపారు. ఇప్పటికే సూపర్ స్టార్ మహేష్ బాబు ఈ సినిమా కోసం ప్రత్యేకంగా మేకోవర్ అయ్యారు. అలాగే మూవీ రిహార్శల్స్ కి కూడా మహేష్ బాబు అటెండ్ అవుతున్నాడని తెలుస్తోంది. మరో వైపు జక్కన్న ఈ సినిమా కోసం లొకేషన్స్ వెతికే పనిలో ఉన్నారు. ఫారెస్ట్ బ్యాక్ డ్రాప్ లో ఈ సినిమా కథ ఉండబోతోందని ఇప్పటికే స్పష్టత ఇచ్చారు.

వరల్డ్ అడ్వాంచర్ ట్రావెలర్ గా ఈ చిత్రంలో మహేష్ బాబు కనిపించబోతున్నట్లు రాజమౌళి గతంలోనే చెప్పారు. ఈ సినిమాని ఎన్ని భాగాలుగా చేస్తారనేదానిపై ఇంకా ఎలాంటి క్లారిటీ లేదు. త్వరలో రాజమౌళి ప్రెస్ మీట్ పెట్టి ఈ సినిమా విశేషాలు తెలియజేసే అవకాశం ఉందని అనుకుంటున్నారు. వచ్చే ఏడాది ఆరంభంలోనే మూవీ షూటింగ్ మొదలవుతుందనే మాట వినిపిస్తోంది. మహేష్ బాబు ఇప్పటి వరకు రీజనల్ భాషలలోనే సినిమాలు చేశారు.

అయితే కమర్షియల్ యాడ్స్ ద్వారా దేశ వ్యాప్తంగా అందరికి రీచ్ అయ్యాడు. హిందీ సినిమాలు చేయకపోయిన బాలీవుడ్ లో కూడా మహేష్ కి మంచి ఇమేజ్ ఉంది. ఇప్పుడు జక్కన్న సినిమాతో హాలీవుడ్ రేంజ్ కి మహేష్ బాబు వెళ్లబోతున్నాడు. మరి ‘SSMB29’ సినిమాతో రాజమౌళి ఎలాంటి అద్భుతాలు చేస్తాడా అనేది వేచి చూడాలి.