SSMB29లో బాలీవుడ్ స్టార్ హీరో!

ద‌ర్శ‌క‌ధీరుడు ఎస్.ఎస్.రాజ‌మౌళి తెర‌కెక్కించ‌నున్న SSMB29 స‌ర్వ‌త్రా ఆస‌క్తిని పెంచుతున్న సంగ‌తి తెలిసిందే. ఈ సినిమా కాస్టింగ్ ఎంపిక‌లు స‌హా ప్ర‌తిదీ ఉత్కంఠ రేకెత్తిస్తున్నాయి. సూప‌ర్ స్టార్ మ‌హేష్ బాబు స‌ర‌స‌న గ్లోబ‌ల్ ఐక‌న్ ప్రియాంక చోప్రా క‌థానాయిక‌గా న‌టించ‌నుంద‌ని ఇంత‌కుముందు క‌థ‌నాలొచ్చాయి. ఫారెస్ట్ అడ్వెంచ‌ర్ జాన‌ర్ క‌థ‌తో ఇండియానా జోన్స్ లైన్ లో తెర‌కెక్కుతోంద‌ని ఇప్ప‌టికే ప్ర‌చారం ఉంది.

అయితే ఈ సినిమాలో క‌థానాయ‌కుడితో త‌ల‌ప‌డే కీల‌క విల‌న్ కోసం మేక‌ర్స్ వెతుకుతున్నారు. ఇటీవ‌ల‌ ప‌లువురు న‌టుల పేర్లు వినిపిస్తున్న సంగ‌తి తెలిసిందే. ఈ చిత్రంలో మ‌ల‌యాళ స్టార్ హీరో పృథ్వీరాజ్ సుకుమార్ కీల‌క‌ పాత్ర‌లో న‌టిస్తార‌ని క‌థ‌నాలొచ్చాయి. కానీ ఇప్పుడు అత‌డి స్థానంలో బాలీవుడ్ స్టార్ హీరో జాన్ అబ్ర‌హామ్ ని ఎంపిక చేసార‌ని తాజాగా క‌థనాలొస్తున్నాయి. జాన్ అబ్ర‌హాం బాలీవుడ్ లో పాపుల‌ర్ యాక్ష‌న్ హీరో. అత‌డికి సింహ‌బ‌లుడిగా మంచి గుర్తింపు, ఫాలోయింగ్ ఉన్నాయి. ఇటీవ‌ల అత‌డు షారూఖ్ ఖాన్ కంబ్యాక్ మూవీ 'ప‌ఠాన్' లో అద్భుత‌మైన విల‌నీ పండించాడు. ఖాన్ కి ధీటుగా అత‌డి న‌ట ప్ర‌ద‌ర్శ‌న‌కు పేరొచ్చింది. అత‌డి ఎంపిక అసాధార‌ణ‌ బాక్సాఫీస్ క‌లెక్ష‌న్స్ అందించే హిందీ బెల్ట్ లో ప్ర‌ధాన అస్సెట్ గా మారుతుంద‌ని కూడా అంచ‌నా వేస్తున్నారు.

అయితే జాన్ అబ్ర‌హాం ఎంపిక గురించి రాజ‌మౌళి బృందం ఇంకా ఎలాంటి ప్ర‌క‌ట‌నా చేయ‌లేదు. ప్రియాంక చోప్రా ఇటీవ‌ల కొంత‌కాలంగా హైద‌రాబాద్ లో ఉన్నారు. మ‌హేష్‌- రాజ‌మౌళి బృందంతో పీసీ స‌మావేశ‌మ‌య్యార‌ని క‌థ‌నాలొచ్చాయి. త‌న పాత్ర ప‌రిధి గురించి కూడా చ‌ర్చ సాగింద‌ని స‌మాచారం. తాజా గుస‌గుస‌ల ప్ర‌కారం.. జాన్ ప్రియాంక చోప్రాతో స్క్రీన్ షేర్ చేసుకునే వీలుంది. ఆ ఇద్ద‌రి మ‌ధ్యా చాలా సన్నివేశాలు ర‌క్తి క‌ట్టిస్తాయని తెలుస్తోంది. ఇటీవ‌ల హైదరాబాద్‌లో షూటింగ్ ప్రారంభ‌మైంద‌ని కూడా గుస‌గుస‌లు వినిపిస్తున్నాయి. మహేష్ బాబు - ప్రియాంక చోప్రాపై షూటింగ్ ప్రారంభించారని, జాన్ త్వరలో వారితో చేరే అవకాశం ఉందని బలమైన ప్రచారం జరుగుతోంది.

జాన్ అబ్ర‌హాం త‌దుప‌రి తన చిత్రం 'ది డిప్లొమాట్' విడుదల కోసం కూడా ఎదురు చూస్తున్నాడు. పాకిస్తాన్‌లో బలవంతంగా వివాహం చేసుకున్న భారతీయ అమ్మాయిని రక్షించే భారతీయ దౌత్యవేత్తగా అత‌డు ఈ చిత్రంలో న‌టించాడు. కుముద్ మిశ్రా, షరీబ్ హష్మి మరియు అశ్వత్ భట్ తదితరులు నటించారు. ఈ చిత్రం మార్చి 7న థియేటర్లలో విడుదల కానుంది. ప్రియాంక న‌టించిన చివరి బాలీవుడ్ చిత్రం ది వైట్ టైగర్. ఈ సినిమా 2021లో నెట్‌ఫ్లిక్స్‌లో విడుదలైంది. ఫ‌ర్హాన్ ద‌ర్శ‌క‌త్వంలోని మ‌ల్టీస్టార‌ర్ 'జీ లే జరా' చిత్రీక‌ర‌ణ‌కు వెళ్లాల్సి ఉంది. ఈలోగానే పీసీ త‌న త‌దుప‌రి హాలీవుడ్ వెంచ‌ర్ సిటాడెల్ సీజ‌న్ 2తో బిజీగా ఉంది.