SSMB29 మొదలయ్యేది అప్పుడేనా..?

టాలీవుడ్ సూపర్ స్టార్ మహేష్ బాబు తన తదుపరి చిత్రం దర్శక ధీరుడు రాజమౌళితో చేస్తున్న విషయం తెలిసిందే. ప్రస్తుతం ఈ సినిమా ప్రీ ప్రొడక్షన్ దశలో ఉంది. ఈ చిత్రం కోసం ప్రపంచవ్యాప్తంగా ఉన్న సినీ అభిమానులు ఉత్సాహంగా ఎదురుచూస్తున్నారు. ప్రాజెక్ట్ ఇంకా అధికారికంగా మొదలు కాకపోయినా, సినిమా గురించి ఎన్నో వార్తలు వైరల్ అవుతూనే ఉన్నాయి.

ఆ మధ్య మహేష్ బాబు, రాజమౌళి, నిర్మాత కే.ఎల్. నారాయణ హైదరాబాద్ ఎయిర్ పోర్ట్ లో కనిపించడం హాట్ టాపిక్ గా మారింది. మహేష్ కొత్త లుక్ తో తీసుకున్న ఫోటోలు, వీడియోలు సోషల్ మీడియాలో వైరల్ అయ్యాయి. పలు టెక్నీషియన్లతో మహేష్ దిగిన పిక్స్ కూడా అభిమానుల మధ్యలో చర్చనీయాంశమయ్యాయి. అన్నింటిలోను న్యూ లుక్ లో కనిపించడం గమనార్హం.

మహేష్ లాంగ్ హెయిర్, గడ్డం లుక్ చూసి అంతా ఆశ్చర్యపోతున్నారు. రాజమౌళి సినిమా కోసం మహేష్ పూర్తి మేకోవర్ అవుతున్నట్లు అనిపిస్తోంది. ఇక లేటెస్ట్ గా వినిపిస్తున్న మరొక టాక్ ప్రకారం ఈ సినిమాను ఆగస్టులో మొదలు పెట్టె అవకాశం ఉన్నట్లుగా తెలుస్తోంది. ఇప్పటికే స్క్రిప్ట్ పనులు ఫినిష్ అయ్యాయి. ఇక సినిమాను అఫీషియల్ గా లాంచ్ చేసి రెగ్యులర్ షూటింగ్ స్టార్ట్ చేయాల్సి ఉంది.

రీసెంట్ గా కొన్ని రోజులు వర్క్ షాప్ కూడా నిర్వహించారు. మహేష్ లుక్ కు సంబంధించి ఒక నిర్ణయానికి రావాల్సి ఉంది. ఇక అనుకున్నట్లు జరిగితే ఆగస్టు చివరలోనే సినిమా సెట్స్ పైకి వెళ్ళవచ్చు అని ఇండస్ట్రీలో బలమైన టాక్ వస్తోంది. ఇక రాజమౌళి తన సినిమాల్లో హీరోలను ప్రత్యేకంగా, కొత్త లుక్ తో చూపించడం సాధారణమే. మహేష్ కోసం కూడా ఫుల్ మేకోవర్ అవసరమని సూచించినట్లు తెలుస్తోంది.

ఈ సినిమాకోసం మహేష్ పొడవాటి జుట్టు, లైట్ గా గడ్డం పెంచుతున్నట్లు అర్ధమవుతుంది. ఫారెస్ట్ అడ్వెంచర్ నేపథ్యంలో ఈ సినిమా రూపొందనుందని టాక్ వినిపిస్తోంది. మహేష్ ఫ్యాన్స్ ఈ లుక్ కోసం ఎంతో కాలం నుంచి ఎదురు చూస్తున్నారు. మహేష్ బాబు తన అన్ని సినిమాల్లోను దాదాపు ఒకే లుక్ లో కనిపిస్తారని యాంటీ ఫ్యాన్స్ కామెంట్లు చేస్తుంటారు. అయితే, ఈ సారి రాజమౌళి సినిమాలో మహేష్ లుక్ వాటిని పూర్తిగా చెక్ పెడుతుందని మహేష్ ఫ్యాన్స్ నమ్మకం వ్యక్తం చేస్తున్నారు. SSMB 29 మూవీ కోసం మహేష్ రెండేళ్ల పాటు డేట్స్ ఇచ్చినట్లు ఇండస్ట్రీలో ఒక టాక్ నడుస్తోంది.