స్టార్ హీరోయిన్ ప్రేమ‌పెళ్లి క‌ష్టాలు

నమ్రతా శిరోద్కర్, భాగ్యశ్రీ వంటి పలువురు బాలీవుడ్ నటీమణులు తమ కెరీర్‌లో పీక్‌ ఉన్నప్పుడు సినిమా పరిశ్రమను విడిచిపెట్టి పెళ్లి చేసుకున్నారు. అందాల రాణి, జాతీయ స్విమ్మింగ్ ఛాంపియన్, అమితాబ్ బచ్చన్, ధర్మేంద్ర స‌హా ఎంద‌రో సూపర్ స్టార్‌లతో కలిసి పనిచేసిన మేటి న‌టి తన కెరీర్ పీక్స్ లో ప్రేమ‌ వివాహం చేసుకోవడానికి చిత్ర పరిశ్రమను విడిచిపెట్టింది.

ఈ స‌న్నివేశంలో నటి ముస్లిం కుటుంబానికి చెందినది. సిక్కు అబ్బాయిని ప్రేమించింది. అత‌డినే పెళ్లి చేసుకోవాలని ఇంట్లో తిరుగుబాటు చేసింది. పెళ్లయిన తర్వాత అత్తగారు అంగీకరించకపోవడంతో భర్త స్నేహితుడి ఇంట్లో బతకాల్సి వచ్చింది. ఆమె మరెవరో కాదు వెట‌ర‌న్ న‌టి నఫీసా అలీ.

నఫీసా అలీ 1972 నుండి 1974 వరకు జాతీయ స్విమ్మింగ్ ఛాంపియన్ .. 1976లో ఫెమినా మిస్ ఇండియా టైటిల్‌ను గెలుచుకుంది. మిస్ ఇంటర్నేషనల్ పోటీలో భారతదేశానికి ప్రాతినిధ్యం వహించింది. 2వ రన్నరప్‌గా ప్రకటించారు. నఫీసా 1979లో శశి కపూర్‌తో కలిసి జునూన్ సినిమాతో తన బాలీవుడ్ కెరీర్‌ను ప్రారంభించింది. ఆ తర్వాత అమితాబ్ బచ్చన్‌తో మేజర్ సాహబ్, అక్షయ్ కుమార్ తో బేవాఫా.. ధర్మేంద్రతో లైఫ్ ఇన్ ఎ మెట్రో .. యమ్లా పగ్లా దీవానా వంటి అనేక బాలీవుడ్ చిత్రాలలో కనిపించింది.

అయితే తన తొలి చిత్రం జునూన్ తర్వాత నఫీసా అలీ తన తండ్రి ఒత్తిడి కారణంగా సినిమాలను విడిచిపెట్టింది. ఇదే విషయం గురించి ఆమె ఒక ఇంటర్వ్యూలో మాట్లాడుతూ, "నా జీవితంలో ఆ దశలో నన్ను నేను గుర్తుచేసుకున్నాను. నేను చిన్నతనంలో జునూన్ సినిమాలో న‌టించాను.. అది చాలా పెద్ద విజయాన్ని సాధించింది. నాకు చాలా ఆఫర్లు వచ్చాయి. నాకు కుటుంబ సపోర్ట్ లేదని నాకు గుర్తుంది. నేను బొంబాయిలో ఒంటరిగా ఉద్యోగం కోసం ప్రయత్నిస్తున్నాను. మా కుటుంబంలో అమ్మాయిలు సినిమాల్లో పనిచేయరని నాన్న చెప్పారు. ఆ ఒత్తిడికి తలొగ్గాను" అని తెలిపింది.

అయితే ఆ వెంటనే 1980లో న‌పీసా ప్రేమ‌లో ప‌డింది. కల్నల్ అండ్ పోలో ప్లేయర్ ఆర్ఎస్ సోధిని వివాహం చేసుకుంది. ఇరువైపులా కుటుంబాల నుండి గట్టి వ్యతిరేకత ఉన్నప్పటికీ ఈ జంట కోల్‌కతాలో రిజిస్టర్ వివాహం చేసుకున్నారు. ఆ తర్వాత ఢిల్లీలోని మహారాణి గాయత్రీ దేవి నివాసంలో సిక్కు వివాహం చేసుకున్నారు. నఫీసాను ఆమె అత్తగారు అంగీకరించలేదు. దీని కారణంగా ఆమె తన భర్త స్నేహితుడి ఇంట్లో ఉండవలసి వచ్చింది. అయితే కొంత కాలానికి త‌న‌ అత్తగారి అన్నయ్య వచ్చి ఆమెను ఇంటికి వెళ్లమని వేడుకున్నాడు. నఫీసాకు క్షమాపణ కూడా చెప్పాడు.

16 సంవత్సరాల విరామం తర్వాత నఫీసా ఎట్టకేలకు అమితాబ్ బచ్చన్ `మేజర్ సాహబ్‌`తో ఇండ‌స్ట్రీకి తిరిగి వచ్చింది. అనేక బాలీవుడ్ చిత్రాలలో పనిచేసింది. 2004లో దక్షిణ కోల్‌కతా నుంచి లోక్‌సభ ఎన్నికలకు పోటీ చేసింది కానీ విఫలమైంది. అయితే 2022 గోవా శాసనసభ ఎన్నికలకు ముందు 2021 అక్టోబర్‌లో అఖిల భారత తృణమూల్ కాంగ్రెస్‌లో చేరారు. నఫీసా అలీ చివరిసారిగా అమితాబ్ బచ్చన్, బోమన్ ఇరానీ, పరిణీతి చోప్రా, నీనా గుప్తా నటించిన `ఉంఛై` చిత్రంలో కనిపించింది. అయితే ఈ చిత్రం బాక్సాఫీస్ వద్ద ఆశించిన ఫ‌లితాన్ని ఇవ్వలేకపోయింది.