స్ట‌న్నింగ్ స్టంట్స్‌తో కిల్ చేయ‌బోతున్న స్టార్ డాట‌ర్

ప్ర‌ముఖ స్టార్ హీరో వ‌రుస పాన్ ఇండియా హిట్ల‌తో దూకుడు మీదున్నాడు. ఇటీవ‌ల హ్యాట్రిక్ విజ‌యాలు సాధించిన స్పీడ్‌లో ఇప్పుడు మ‌రో భారీ యాక్ష‌న్ సినిమాకి గ్రీన్ సిగ్న‌ల్ ఇచ్చాడు. ఈసారి మాఫియా డ్రామాలో త‌న‌తో పాటు త‌న కుమార్తెను కూడా బ‌రిలో దించుతున్నాడు. కూతురు డెబ్యూ సినిమా కాబ‌ట్టి దీనిపై ఎక్కువ‌గానే ఫోక‌స్ చేస్తున్నాడు. స్క్రిప్టు ద‌శ నుంచే ద‌ర్శ‌కుడితో క‌లిసి చాలా జాగ్ర‌త్త‌లు తీసుకున్నాడు. అలాగే ప్ర‌ముఖ యాక్ష‌న్ చిత్రాల డైరెక్ట‌ర్ ని ఈ సినిమాలో యాక్ష‌న్ సీక్వెన్సుల‌ను ప‌ర్య‌వేక్షించేందుకు అద‌నంగా జోడించాడు. కూతురు స్టంట్స్ కి స్టన్ అయిపోయేలా గ‌ట్టిగానే ప్లాన్ చేసాడ‌ట‌. ఇంత‌కీ ఈ ఎపిసోడ్ లో స్టార్ హీరో ఎవ‌రు? స్టార్ డాట‌ర్ ఎవ‌రు? అంటే పూర్తి వివ‌రాల్లోకి వెళ్లాలి.

ఇప్పుడిదంతా ఎవ‌రి గురించి అంటే.. కింగ్ ఖాన్ షారూఖ్‌.. అత‌డి గారాల ప‌ట్టీ సుహానా ఖాన్ గురించే. సుహానా ది ఆర్చీస్ అనే వెబ్ సిరీస్ తో న‌ట‌నా కెరీర్‌ను ప్రారంభించినా కానీ, పెద్ద తెర‌పై తొలి సినిమా త‌న తండ్రితో క‌లిసి న‌టిస్తున్న -కింగ్. టైటిల్ కి త‌గ్గ‌ట్టే ఇది పూర్తిగా మాఫియా బ్యాక్ డ్రాప్‌తో రూపొందుతున్న సినిమా. కూతురు సుహానాకు న‌ట‌న‌కు స్కోప్ ఉన్న పాత్రను వెతికాడు కింగ్ ఖాన్. మ‌రోసారి షారూక్ డాన్ గా అద‌ర‌గొట్ట‌డ‌మే గాక‌, త‌న‌తో పోటీప‌డుతూ ధీటుగా క‌నిపించే పాత్ర‌లో సుహానాను ఎంపిక చేసుకున్నాడ‌నేది ఒక గుస‌గుస‌.

ఈ చిత్రం రా కంటెంట్ తో మోటైన ఎడ్జ్‌తో కూడిన హై-ఆక్టేన్ యాక్షన్ థ్రిల్లర్‌గా ఉంటుందని క‌థ‌నాలొస్తున్నాయి. ఇటీవల స్పెయిన్‌లో చిత్రీక‌ర‌ణ‌లో ఉన్న‌ప్ప‌టి ఫోటో ఒక‌టి ఆన్‌లైన్‌లో కనిపించింది. స్పాట్ లో షారూఖ్ ఖాన్ క‌నిపించారు. సెట్లో నీలిరంగు సూట్ ధరించి కొంద‌రు ప్ర‌ముఖుల‌ సమూహంతో సంభాషణల్లో మునిగిపోయి క‌నిపించాడు. సన్నివేశ నేపథ్యం అద్భుతమైన బ్లూ వాట‌ర్ పర్వతాలతో కూడి అందంగా క‌నిపిస్తోంది. అయితే ఇది ఒరిజిన‌ల్ ఫోటో కాద‌ని, 2020లో నెట్‌ఫ్లిక్స్‌లో విడుదలైన బ్రిటిష్-స్పానిష్ మిస్టరీ థ్రిల్లర్ `వైట్ లైన్స్` మొదటి ఎపిసోడ్‌లో మార్కస్ - అతని సహచరులు మాఫియా బాస్ ఓరియోల్ కలాఫట్‌ను కలుసుకున్న దృశ్యం నుండి ఫోటో ఇద‌ని కూడా చెబుతున్నారు. నిజానికి షారుఖ్ ఖాన్ ప్రస్తుతం ఇటలీలో తన కుటుంబంతో కలిసి అనంత్ అంబానీ - రాధిక మర్చంట్ ప్రీ వెడ్డింగ్ వేడుకలకు హాజరయ్యారు. కోల్‌కతా నైట్ రైడర్స్ IPL 2024 విజయం తర్వాత వారు ముంబైని విడిచి వెళ్లారు.

కింగ్ చిత్రంలో షారూఖ్ గ్రేషేడ్ పాత్ర‌లో న‌టిస్తున్నాడు. అతడు డాన్ త‌ర‌హాలో స్టైలిష్ గా క్రూరుడిగా క‌నిపిస్తాడ‌ని తెలుస్తోంది. ఈ పాత్రను రూపొందించడానికి సిద్ధార్థ్ ఆనంద్ - సుజోయ్ ఘోష్‌లతో క‌లిసి షారూఖ్ చాలా క‌స‌ర‌త్తు చేస్తున్నాడ‌ని తెలిసింది. క‌థాంశం ఏమిటో ఇంకా రివాల్ కాలేదు. కానీ ఇది మాఫియా నేప‌థ్యంలో క‌థాంశంతో రూపొందుతోంద‌ని స్ప‌ష్ఠంగా తెలుసు. కింగ్ ఖాన్ స్థాయిని మ‌రో లెవ‌ల్ కి చేర్చే భారీ యాక్షన్ థ్రిల్లర్ ఇది అని క‌థ‌నాలు వ‌స్తున్నాయి. ఈ ప్రమాదకరమైన ప్రపంచంలో త‌న‌ శిష్యురాలికి మార్గనిర్దేశం చేసే గురువు పాత్రను ఖాన్ పోషిస్తాడు. ఈ శిష్యురాలు మరెవరో కాదు.. సుహానా ఖాన్ అని తెలిసింది.

క్రియేటివ్ డైరెక్షన్ టీమ్ కి షారూఖ్ ఖాన్ స్వయంగా నాయకత్వం వహిస్తున్నాడని, సుహానాతో కలిసి యాక్షన్ సీక్వెన్స్ శిక్షణలో కూడా పాల్గొంటున్నాడని క‌థ‌నాలొస్తున్నాయి. సుజోయ్ ఘోష్-సిద్ధార్థ్ ఆనంద్ క‌ల‌యిక‌లో అత్యంత భారీ బడ్జెట్‌తో రూపొందుతున్న‌ యాక్షన్ చిత్రమిద‌ని కూడా తెలుస్తోంది. కింగ్ టీమ్‌లో చేరడానికి సిద్ధార్థ్ ఆనంద్ వెస్ట్రన్ స్టంట్ డైరెక్టర్‌లతో చర్చలు జరుపుతున్నట్లు క‌థ‌నాలొస్తున్నాయి. భారీ అంచనాలున్న ఈ చిత్రం 2025 ద్వితీయార్థంలో థియేటర్లలో విడుదల కానుంది.