అగ్ర హీరోపై ఫోర్జ‌రీ చీటింగ్ ఆరోప‌ణ‌లు?

సన్నీడియోల్ సినీ పరిశ్రమ అగ్ర‌హీరోల్లో ఒక‌రు. ఖాన్‌ల త్ర‌యానికి ధీటుగా స్టార్ డ‌మ్ ఉన్న న‌టుడు. కొన్నేళ్ల గ్యాప్ త‌ర్వాత ఇటీవ‌లే `గ‌ద‌ర్ 2`తో కంబ్యాక్ అయ్యాడు. ఈ చిత్రంతో తన కెరీర్‌లోని అన్ని రికార్డులను బద్దలు కొట్టాడు. సన్నీడియోల్- అమీషా పటేల్ `గదర్ 2` 2023లో అత్యధిక వసూళ్లు సాధించిన చిత్రాలలో ఒకటిగా నిలిచింది. ఒక గొప్ప విజయం తర్వాత సన్నీ డియోల్ ఇప్పుడు దర్శకులకు ఇష్టమైన ఎంపికగా మారాడు. అతడు వ‌రుస‌ ప్రాజెక్ట్‌లతో బిజీగా ఉన్నాడు. ప్ర‌స్తుతం ప్యాక్డ్ షెడ్యూళ్ల‌తో బిజీ అయ్యాడు. అయితే సన్నీ డియోల్ మోసం, ఫోర్జరీ ఆరోపణలతో ఇప్పుడు వివాదంలో చిక్కుకున్నాడు.

ప‌లు జాతీయ మీడియాల్లో వచ్చిన కథనాల‌ ప్రకారం.. సన్నీ డియోల్‌పై సోరవ్ గుప్తా అనే సినీ నిర్మాత కొన్ని తీవ్రమైన ఆరోపణలు చేశారు. 2016లో సన్నీ డియోల్ తన ప్రొడక్షన్ వెంచర్‌లో నటించడానికి అంగీకరించినట్లు అతడు చెప్పాడు. స‌న్నీడియోల్ త‌న‌ నుండి ముందుగానే డబ్బు తీసుకున్నాడని, అయితే క‌మిట్ మెంట్ ప్ర‌కారం.. షూటింగుల‌కు రాలేదని ఆరోపించాడు. సోరవ్ గుప్తా తాను సన్నీ డియోల్‌కు కోటి రూపాయలు అడ్వాన్స్‌గా ఇచ్చానని పేర్కొన్నాడు. అయితే 2017 లో తన చిత్రానికి బదులుగా పోస్టర్ బాయ్స్ అనే సినిమాలో న‌టించాడు. ఇంకా త‌న‌కు అద‌నంగా డబ్బు కావాల‌ని అడిగేవాడని చిత్రనిర్మాత ఆరోపించాడు. దాదాపు రూ.2.55 కోట్లు సన్నీ డియోల్‌కు పంపినట్లు ఆయన పేర్కొన్నారు. ఇది మాత్రమే కాదు.. సన్నీ డియోల్ నకిలీ పత్రాలతో అగ్రిమెంట్‌లు చేసుకున్నాడ‌ని కూడా సోరవ్ గుప్తా ఆరోపించారు. మేము అగ్రిమెంట్ చదివినప్పుడు రూ.4 కోట్ల మేర పారితోషికానికి ఒప్పందం జ‌రిగింద‌ని, ప‌లు ర‌కాల ఆర్థిక ఒప్పందాలు త‌మ మ‌ధ్య కుదిరాయ‌ని సోర‌వ్ తెలిపారు.

అత‌డి ఫిర్యాదు మేర‌కు స‌న్నీడియోల్ పై ఇప్పుడు కేసు న‌మోదు అయింద‌ని, అత‌డికి నోటీసులు పంపార‌ని ప్ర‌ఖ్యాత బాలీవుడ్ పోర్ట‌ల్ హిందూస్తాన్ టైమ్స్ క‌థ‌నంలో పేర్కొంది. అలాగే ఈ కేసులో సునీల్ దర్శన్ అనే మరో నిర్మాత కూడా సౌరవ్ గుప్తా వాదనలను సమర్థించారు. సన్నీ డియోల్ తన `అజయ్` సినిమా హక్కులను డిస్ట్రిబ్యూషన్ కోసం అడిగాడ‌ని, అయితే త‌న‌కు పూర్తి డబ్బు చెల్లించ‌లేదని గుప్తా వెల్ల‌డించాడు. సన్నీ డియోల్ రామజన్మభూమి అనే చిత్రానికి 5 కోట్ల రూపాయలకు సంతకం చేసార‌ని, అయితే గదర్ 2 విజయం సాధించిన తర్వాత అత‌డు 25 కోట్ల రూపాయలు డిమాండ్ చేశార‌ని కూడా ఆరోపిస్తున్నారు. ఈ ఆరోపణలపై సన్నీ డియోల్ ఆయ‌న‌ బృందం ఇంకా ఎటువంటి అధికారిక వ్యాఖ్యలు చేయలేదు.

సన్నీడియోల్ ఇటీవ‌ల పెద్ద ప్రాజెక్టుల కోసం సంత‌కాలు చేసారు. అమీర్ ఖాన్ నిర్మిస్తున్న‌ `లాహోర్ 1947`లో స‌న్నీడియోల్ కనిపించబోతున్నాడు. రణబీర్ కపూర్ ప్రధాన పాత్రలో నితేష్ తివారీ తెర‌కెక్కిస్తున్న `రామాయణం`లో సన్నీ డియోల్ హనుమంతుడిగా నటించబోతున్నట్లు క‌థ‌నాలొచ్చాయి.