జ్యోతిక గురించి సూర్య వ్యాఖ్యలు వైరల్‌

తమిళ్ స్టార్‌ సూర్య హీరోగా నటించిన 'కంగువా' ఈనెల 14న ప్రేక్షకుల ముందుకు రాబోతున్న విషయం తెల్సిందే. పాన్ ఇండియా రేంజ్‌లో విడుదల కాబోతున్న కంగువా సినిమా ప్రమోషన్‌లో భాగంగా సూర్య పలు టాక్ షోల్లో, ఇంటర్వ్యూల్లో పాల్గొంటున్నాడు. ఆ సమయంలో జ్యోతిక గురించి తన ఫ్యామిలీ పిల్లల గురించి పలు ఆసక్తికర విషయాలను వెల్లడించారు. తెలుగులో కంగువా ప్రమోషన్ కోసం బాలకృష్ణ అన్‌స్టాపబుల్‌ టాక్ షో లో సూర్య ఇంకా దర్శకుడు శివ పాల్గొన్నారు. ఆ సమయంలో సూర్య గురించి పలు ఆసక్తికర విషయాలను బాలకృష్ణ ప్రేక్షకులకు తెలిసేలా చేశారు. లైవ్‌ లో కార్తీతో మాట్లాడటంతో పాటు ఇంకా పలు విషయాలు జరిగాయి.

ఇంకా స్ట్రీమింగ్‌ కానీ సూర్య కంగువా స్పెషల్‌ అన్‌స్టాపబుల్‌ ఎపిసోడ్‌ ప్రోమో సోషల్‌ మీడియాలో వైరల్‌ అవుతోంది. బాలకృష్ణ ఈ షోలో సూర్య గురించి పలు ప్రశ్నలు అడగడం ద్వారా చాలా రోజులుగా ఉన్న అనుమానాలకు, ప్రచారంలో ఉన్న పుకార్లకు తెర పడ్డట్లు అయింది. జ్యోతిక ముంబైలో ఉంటున్న నేపథ్యంలో ఇద్దరూ విడిపోయారా అంటూ పుకార్లు వచ్చాయి. ఆ తర్వాత కాలంలో ఇద్దరం బాగానే ఉన్నాం, జ్యోతిక తల్లిదండ్రులతో పాటు, పిల్లల కెరీర్‌ విషయంలో ముంబైలో ఉందని సూర్య చెప్పాడు. అన్‌స్టాపబుల్‌ షో లోనూ జ్యోతిక టాపిక్ ను సూర్య తీసుకు వచ్చి ఆసక్తికర వ్యాఖ్యలు చేశాడు.

తన జీవితంలో జ్యోతిక గొప్ప విషయం అన్నట్లుగా సూర్య చెప్పుకొచ్చాడు. ఆమె వల్ల తన జీవితం చాలా సంతోషంగా సాగుతుందని, ప్రతి ఒక్క విషయంలోనూ ఆమె సలహాలు ఉంటాయని పేర్కొన్నాడు. ప్రతి సందర్భంలోనూ ఇద్దరం కలిసి తీసుకున్న నిర్ణయాల వల్ల ప్రయోజనం దక్కిందని సూర్య చెప్పుకొచ్చాడు. జ్యోతిక అంటే తనకు ఎంత ప్రేమ ఉంది అనే విషయాన్ని సైతం బాలయ్య షో లో సూర్య చెప్పే ప్రయత్నం చేయడం జరిగింది. మొత్తానికి సూర్య పలు విషయాలను బాలయ్య షో లో జ్యోతిక గురించి మాట్లాడాడు. ఆ ఎపిసోడ్‌ స్ట్రీమింగ్‌ అయితే మరిన్ని విషయాలు తెలిసే అవకాశాలు ఉన్నాయి.

కంగువా సినిమా విషయానికి వస్తే.. తెలుగు నిర్మాణ సంస్థ యూవీ క్రియేషన్స్‌ తో కలిసి స్టూడియో గ్రీన్‌ బ్యానర్‌లో జ్ఞానవేల్‌ రాజా ఈ సినిమాను నిర్మించడం జరిగింది. తమిళనాట ఇప్పటివరకు ఏ ఒక్క సినిమా వెయ్యి కోట్ల వసూళ్లు చేరుకోలేదు, రూ.500 కోట్ల మార్కెట్‌ దాటని తమిళ సినిమాకు వెయ్యి కోట్ల రుచి చూపించే విధంగా కంగువా ఉంటుందని నిర్మాత జ్ఞానవేల్‌ రాజా చెబుతున్నారు. సూర్య కెరీర్‌లోనే బిగ్గెస్ట్‌ హిట్‌గా ఈ సినిమా ఉంటుందని శివ సైతం చెప్పుకొచ్చారు. కంగువా సినిమా కోసం గత నెల రోజులుగా పాన్ ఇండియా రేంజ్ లో ప్రచారం జరుగుతోంది. టైమ్‌ ట్రావెల్‌ కాన్సెప్ట్ తో ఈ సినిమా రూపొందింది అనే వార్తలు వస్తున్నాయి. పూర్తి వివరాలు తెలియాల్సి ఉంది.