'కంగువ' చివ‌రి షాట్.. సూర్య ఎమోష‌న‌ల్‌

ర‌జ‌నీకాంత్, క‌మ‌ల్ హాస‌న్ త‌ర్వాత కోలీవుడ్‌లో పాన్ ఇండియా స్టార్ డ‌మ్ కోసం పాకులాడే హీరోల్లో సూర్య ప్ర‌ముఖుడు. స‌మ‌కాలికులు అజిత్, విజ‌య్, విక్ర‌మ్ ల‌తో పాటు సూర్య రేసులో ఉన్నాడు. కెరీర్ లో స‌రైన పాన్ ఇండియా హిట్ కొట్టాల‌ని త‌హ‌త‌హ‌లాడుతున్న సూర్య అలాంటి ఒక విజ‌యం 'కంగువ‌'తో సాధ్య‌మ‌ని న‌మ్ముతున్నాడు. కంగువ‌తో ఉత్త‌రాది మార్కెట్ ని త‌న గుప్పిట ప‌ట్ట‌డ‌మే అత‌డి ధ్యేయం. అసాధార‌ణ విజ‌యంతో దేశంలోని పాన్ ఇండియా స్టార్లలో త‌న పేరును రిజిస్ట‌ర్ చేసుకోవాల‌ని త‌పిస్తున్నాడు.

దీనికోసం స్టూడియో గ్రీన్- యువి క్రియేష‌న్స్ వంటి సంస్థ‌ల అండ‌దండ‌ల‌తో సూర్య త‌న‌వంతు ప్ర‌య‌త్నం చేస్తున్నాడు. సూర్య‌ శివకుమార్, దిశా పటాని, బాబీ డియోల్ ప్ర‌ధాన పాత్ర‌ల్లో ప్రతిష్టాత్మక చిత్రం 'కంగువ' చిత్రీక‌ర‌ణ శ‌ర‌వేగంగా పూర్త‌వుతోంది. ద‌రువు శివ ఈ చిత్రానికి ద‌ర్శ‌క‌త్వం వ‌హిస్తున్నారు. గత సంవత్సరం ప్రధాన నటుడు సూర్య పుట్టినరోజు సందర్భంగా మేకర్స్ ఈ సినిమాని అధికారిక ప్ర‌చారం మొద‌లైంది. అనంత‌రం రిలీజైన పోస్ట‌ర్లు టీజ‌ర్లు పీరియాడిక్ డ్రామాపై ఆసక్తిని పెంచాయి.

తాజాగా సూర్య త‌న పోర్షన్ షూటింగ్‌ను పూర్తి చేసాడు. ఈ చిత్రం నుండి సరికొత్త స్టిల్‌ను షేర్ చేస్తూ దానికి ఆస‌క్తిక‌ర‌ క్యాప్షన్ ఇచ్చాడు. "కంగువ కోసం నా చివరి షాట్! మొత్తం యూనిట్ సానుకూలతతో క‌లిసి ప‌ని చేసింది. ఇలాంటి ఒక భారీ సినిమాని పూర్తి చేయడం.. అనేక వాటికి ప్రారంభం..! అన్ని జ్ఞాపకాలను అందించినందుకు ప్రియమైన దర్శకుడు శివ‌కు, చిత్ర‌ బృందానికి ధన్యవాదాలు! #కంగువ చాలా పెద్ద చిత్రం.. మీరంతా తెరపై చూసే వరకు వేచి ఉండండి!" అని సూర్య రాసారు. షూటింగుల కార‌ణంగా కుటుంబాన్ని మిస్ అయ్యాన‌ని సూర్య అన్నారు.

సూర్య తాజా పోస్ట‌ర్ లో గిరిజ‌న‌ యోధుడిగా క‌నిపిస్తున్నాడు. అత‌డి రూపం భీక‌రంగా క‌నిపిస్తోంది. చ‌రిత్ర‌కు, ఆధునిక యుగం పోక‌డ‌ల‌కు లంకె వేసి తెర‌కెక్కించిన అనేక చిత్రాల‌లో ఇది ఒక‌టి. ఇందులో రెండు విభిన్న కాలాలలో క‌థానాయ‌కుడి ప్ర‌యాణం సాగుతుంది. ఈ ఏడాది వేస‌విలో రిలీజ్ చేయాల‌ని భావించినా కానీ భారీ వీఎఫ్ఎక్స్ కార‌ణంగా ఇయ‌ర్ మిడిల్ లో రిలీజ్ చేయాల‌ని చిత్ర‌బృందం భావిస్తున్న‌ట్టు తెలిసింది.

ఈ చిత్రం 3డి ఫార్మాట్‌ సహా 2డి వెర్ష‌న్ లో దాదాపు 35 భాషల్లో విడుదల కానుంది. హ్యూమన్ ఎమోషన్స్, పవర్ ఫుల్ పెర్ఫార్మెన్స్‌లు..భారీ యాక్షన్ సీక్వెన్స్‌లతో ఇంతకు ముందెన్నడూ చూడనంత‌ భారీ స్థాయిలో ఈ సినిమా ఉంటుంద‌ని నిర్మాత‌లు ప్రేక్షకులకు హామీ ఇచ్చారు. ఇప్ప‌టికే ప్రేక్షకులకు విజువల్ ట్రీట్‌ని అందించేందుకు 3డి కన్వర్షన్‌ కూడా మొదలైంది. సింగం సిరీస్, పరుతి వీరన్-సిరుత్తై-కొంబన్-నాన్ మహన్ అల్లా- మ‌ద్రాస్- టెడ్డీ వంటి విజ‌య‌వంత‌మైన‌ చిత్రాలు సహా గత 16 ఏళ్లలో అనేక బ్లాక్ బస్టర్ హిట్‌లను అందించిన జ్ఞానవేల్ రాజా ప్ర‌తిష్ఠాత్మ‌కంగా ఈ చిత్రాన్ని నిర్మిస్తున్నారు.