ఈ మల్టీస్టారర్.. అదిరిపోలా

ఇప్పుడు భాషా భేదం లేకుండా అన్ని ఇండస్ట్రీల్లోనూ మల్టీస్టారర్లు తెరకెక్కుతున్నాయి. ఒక స్టార్ హీరో ఇంకో స్టార్ హీరోతో స్క్రీన్ షేర్ చేసుకోవడానికి మొహమాట పడట్లేదు. అభిమానులు సైతం కొంచెం లిబరల్‌గానే ఉంటూ మల్టీస్టారర్లను ప్రోత్సహిస్తున్నారు. సామాన్య ప్రేక్షకులకు అయితే మల్టీస్టారర్ సినిమాలంటే పండుగ అనే చెప్పాలి. త్వరలోనే సౌత్ ఇండియాలో ఒక ఇంట్రెస్టింగ్ మల్టీస్టారర్ రాబోతోంది. తమిళ టాప్ స్టార్లలో ఒకడైన సూర్యతో.. మలయాళ సెన్సేషనల్ హీరో దుల్కర్ సల్మాన్ జట్టు కట్టబోతున్నాడు. వీళ్లిద్దరి కలయికలో తెలుగమ్మాయి సుధ కొంగర సినిమా తీయబోతోంది.

ఆమె తమిళంలో 'ఇరుది సుట్రు' చిత్రంతో వెలుగులోకి వచ్చింది. ఈ సినిమానే తెలుగులో 'గురు' పేరుతో రీమేక్ చేసింది. ఆ తర్వాత సూర్యతో ఆమె చేసిన 'ఆకాశం నీ హద్దురా' నేరుగా ఓటీటీలో రిలీజై అదిరిపోయే రెస్పాన్స్ తెచ్చుకుంది. ఆ సినిమా వచ్చి మూడేళ్లు దాటినా సుధ నుంచి మరో సినిమా రాలేదు.

అజిత్‌తో అనుకున్న సినిమా ఎందుకో ముందుకు కదల్లేదు. మధ్యలో రతన్ టాటా జీవిత కథతో సుధ సినిమా తీయబోతున్నట్లు ప్రచారం జరిగింది. కానీ ఆ ప్రచారంలో నిజం లేదని తేలింది. ఇప్పుడామె సూర్య-దుల్కర్ కలయికలో ఒక సినిమా చేయడానికి రంగం సిద్ధం చేసుకున్నట్లు సమాచారం. సూర్య, దుల్కర్ ఎవరికి వాళ్లే గొప్ప నటులు. ఇద్దరికీ మంచి అభిరుచి ఉంది.

సినిమాకు సినిమాకు సంబంధం లేని విధంగా పాత్రలు ఎంచుకుంటూ ప్రేక్షకులను ఆశ్చర్యపరుస్తుంటారు. ఇలాంటి ఇద్దరు హీరోల కలయికలో సుధ లాంటి మంచి టేస్టున్న డైరెక్టర్ సినిమా తీయబోతోందంటే అది ప్రత్యేకమైన సినిమాగానే ఉంటుందనడంలో సందేహం లేదు.

ఓ ప్రముఖ నిర్మాణ సంస్థ ప్రొడ్యూస్ చేయబోతున్న ఈ సినిమాకు జీవీ ప్రకాష్ కుమార్ సంగీతం అందించనున్నాడట. ప్రస్తుతం 'కంగువ'ను పూర్తి చేసే పనిలో ఉన్నాడు సూర్య. అది పూర్తయిన వెంటనే ఈ సినిమాను మొదలుపెడతాడు. దుల్కర్ 'కింగ్ ఆఫ్ కోతా'తో వచ్చే వారం ప్రేక్షకుల ముందుకు రానున్న సంగతి తెలిసిందే.