యానిమల్ చూశాక మహిళలపై జాలి కలిగింది!
మరోవైపు తమ అభ్యంతరాలను బహిరంగంగా వ్య‌క్తం చేసిన కళాకారులు ఉన్నారు. వారిలో ఒకరు గీత రచయిత, నటుడు కవి స్వానంద్ కిర్కిరే.
By: Tupaki Desk | 4 Dec 2023 3:51 AM GMT
సందీప్ రెడ్డి వంగా తీసిన యానిమల్ భారతీయ సినిమా చరిత్రలో చిరకాలం గుర్తుండిపోతుంది. సినిమాకు సంబంధించి మిశ్రమ స్పందనలు లేవు. అలా కాకుండా ప్రజల్లో పోలరైజేషన్ కనిపిస్తోంది. రా అండ్ ర‌స్టిక్ సినిమా అంటూ కొందరు ఉత్సాహంగా సినిమాకి వెళుతున్నారు. మరోవైపు సినిమా నైతికత, మహిళల పట్ల దారుణంగా ఎలా ప్రవర్తించారనే దానిపైనా ప్రశ్నిస్తున్నారు. ఈ సినిమాకి సంబంధించిన చర్చల్లో చాలా మంది సెలబ్రిటీలు ప్రశంసలు కురిపిస్తున్నారు. అలియా భట్, అర్జున్ కపూర్ వంటి నటీనటులు ఈ చిత్రాన్ని బాగా ప్రశంసించారు. మరోవైపు తమ అభ్యంతరాలను బహిరంగంగా వ్య‌క్తం చేసిన కళాకారులు ఉన్నారు. వారిలో ఒకరు గీత రచయిత, నటుడు కవి స్వానంద్ కిర్కిరే.
యానిమల్ చూసిన తర్వాత స్వానంద్ ఎక్స్‌లో సుదీర్ఘమైన స‌మీక్ష రాశారు. ఆ థ్రెడ్ ఇలా ఉంది. "మెహబూబ్ ఖాన్ -ఔరత్, గురుదత్-సాహిబ్ బీబీ ఔర్ గులాం, హృషికేష్ ముఖర్జీ -అనుపమ', శ్యామ్ బెనెగల్ -అంకుర్స ..భూమిక, కేతన్ మెహతా -మిర్చ్ మసాలా, సుధీర్ మిశ్రా-షింద హోన్ ... మైన్.. ఇంగ్లీష్ వింగ్లీష్, వికాస్ బహల్ -క్వీన్ , షూజిత్ సిర్కార్ పికు మొదలైన అనేక భారతీయ చిత్రాలు స్త్రీని, ఆమె హక్కులను ఆమె స్వయంప్రతిపత్తిని ప్రతిదానిని ఎలా గౌరవించాలో నేర్పించాయి. అవగాహన ఉన్నప్పటికీ ఈ శతాబ్దాల నాటి ఆలోచనలో ఇంకా చాలా లోపాలు ఉన్నాయి. నేను విజయం సాధించానో లేదో నాకు తెలియదు. కానీ నేను నిరంతరం నన్ను మెరుగుపరుచుకోవడానికి ప్రయత్నిస్తున్నాను.
సినిమా వాళ్లందరికీ ధన్యవాదాలు. కానీ ఈరోజు యానిమల్ సినిమా చూసిన తర్వాత నేటి తరం మహిళలపై నిజంగా జాలి కలిగింది. మరింత భయానకంగా ఉండే మిమ్మల్ని అంతగా గౌరవించని, మిమ్మల్ని వంచించడానికి, అణచివేయడానికి ప్రయత్నించే కొత్త వ్యక్తి మీ కోసం మళ్లీ సిద్ధమయ్యాడు. కానీ గర్వంగా ఉండ‌టాన్ని తన పురుషాధిక్య ప్రయత్నంగా భావిస్తాడు. నేటి తరం అమ్మాయిలు రష్మిక కోసం చప్పట్లు కొడుతూ ఆ సినిమా హాలులో కూర్చున్నప్పుడు, నేను నా మనస్సులో సమానత్వం అనే ప్రతి ఆలోచనకు నివాళులర్పించాను... అని రాసాడు.
నేను ఇంటికి వచ్చాను. నిరాశ, నిస్పృహ.. బలహీనత! రణబీర్ ఆ డైలాగ్‌లో ఆల్ఫా మేల్‌ని నిర్వచించి, ఆల్ఫాగా మారలేని పురుషులు, మహిళలందరి ఆనందాన్ని పొందడానికి వారు కవులు అవుతారు. చంద్రుడు ..నక్షత్రాలను విచ్ఛిన్నం చేస్తామని వాగ్దానాలు చేయడం ప్రారంభిస్తారు. నేను కవిని! నేను జీవించడం కోసం కవిత్వం రాస్తాను. నాకు చోటు ఉందా? ఒక సినిమా విపరీతంగా వసూళ్లు సాధిస్తూ భారతీయ సినిమా ఉజ్వల చరిత్రను తలదించుకునేలా చేస్తోంది.. అని రాసారు.
యానిమల్ పై ఎన్ని విమర్శలు వస్తున్నా దానివ‌ల్ల నేరుగా సినిమాకే లబ్ధి చేకూరుతోంది. సందీప్ రెడ్డి వంగ విమర్శకులను డిస్టర్బ్ చేసే సినిమా తీయాలనుకున్నాడు. ఇలాంటి సినిమానే తీసి విడుదల చేసి బాక్సాఫీస్ వద్ద మంచి వసూళ్లను సాధించాల‌నుకున్నాడు. అనుకున్న‌ది సాధించాడు. మొదటి రెండు రోజుల్లో 'యానిమల్' దాదాపు రూ.131 కోట్ల షేర్ (230కోట్ల గ్రాస్) రాబట్ట‌డం ఒక సంచ‌ల‌నం.
