తప్పు ఒప్పుకున్న ‘బిగ్ బాస్’ హీరో

2020లో తెలుగు బిగ్ బాస్ నాలుగో సీజన్లో విజేతగా నిలిచిన అభిజిత్‌ను మించి.. పాపులారిటీ సంపాదించాడు సయ్యద్ సోహెల్. ఆ సీజన్లో అతను మూడో స్థానంలో నిలిచినప్పటికీ బయటికి వచ్చాక టీవీ షోలు, సినిమాల్లో అవకాశాలు బాగానే సంపాదించాడు. ఈ క్రమంలోనే ‘మిస్టర్ ప్రెగ్నెంట్’ అనే వెరైటీ సినిమాతో హీరోగా పరిచయమై.. ఆ తర్వాత ‘బూట్ కట్ బాలరాజు’ అనే సినిమాలో నటించాడు. ఐతే ఈ రెండూ ప్రేక్షకులను మెప్పించలేకపోయాయి.

‘మిస్టర్ ప్రెగ్నెంట్’ విషయంలో పర్వాలేదనే కామెంట్లయినా వినిపించాయి కానీ.. ‘బూట్ కట్ బాలరాజు’ గురించి అసలు డిస్కషనే లేదు. ఈ సినిమా రిలీజ్ టైంలో సోహెల్ చాలా ఎమోషనల్ కావడం చర్చనీయాంశం అయిన సంగతి తెలిసిందే. ప్రి రిలీజ్ ఈవెంట్లోనే కాక.. రిలీజ్ తర్వాత కూడా కన్నీళ్లు పెట్టుకుంటూ సినిమా చూడాలని ప్రాధేయపడ్డాడు సోహెల్.

కానీ అతను ఏం చేసినా జనం ఆ సినిమాను పట్టించుకోలేదు. ఓటీటీలో ఈ చిత్రాన్ని చూసిన వాళ్లు ఇలాంటి సినిమా తీసి జనం రాలేదని బాధ పడితే ఎలా అని ప్రశ్నించారు. ఐతే కొంచెం ఆలస్యంగా సోహెల్‌కు జ్ఞానోదయం అయినట్లుంది. తాను ‘బూట్ కట్ బాలరాజు’ సినిమాను జనం చూడట్లేదంటూ మీడియా ముందు కన్నీళ్లు పెట్టుకోవడం తప్పని సోహెల్ తాజాగా ఒక ఇంటర్వ్యూలో చెప్పాడు.

మంచి సినిమాలు చేయకుండా ప్రేక్షకులను నిందించడం తప్పని అతనన్నాడు. తమిళంలో బిగ్ బాస్ ఫేమ్ కవిన్ మంచి మంచి సినిమాలు చేస్తూ స్టార్‌డమ్ సంపాదించడం గురించి అతను ప్రస్తావిస్తూ.. తన స్ఫూర్తితో తాను కూడా మెరుగైన చిత్రాల్లో నటించేందుకు ప్రయత్నిస్తానని సోహెల్ చెప్పాడు. ప్రస్తుతం సోహెల్ హీరోగా రెండు మూడు చిత్రాలు చర్చల దశలో ఉన్నట్లు సమాచారం. మరి వాటితో అతను బౌన్స్ బ్యాక్ అవుతాడేమో చూడాలి. తమిళంలో కవిన్ డడా, స్టార్ లాంటి చిత్రాలతో పెద్ద హిట్లు కొట్టి స్టార్ స్టేటస్ సంపాదించాడు.