అన్నా నువ్వు గ్రేట్‌... తమన్‌పై మళ్లీ ప్రశంసలు
కిడ్నీ ట్రాన్స్ప్లాంటేషన్ కోసం ఓ పేషెంట్‌కి తమన్ సాయం చేశారు. ఆ విషయాన్ని ఏఐఎన్‌యూ ఆసుపత్రి డాక్టర్‌ లీలా కృష్ణ ఇన్‌స్టాగ్రామ్‌ ద్వారా తెలియజేశారు.
By: Tupaki Desk | 15 Nov 2024 7:27 AM GMT
స్టార్‌ మ్యూజిక్ డైరెక్టర్‌ తన మంచి మనసును చాటుకుంటూ ఎంతో మందికి సాయంగా నిలుస్తున్నారు. ఇటీవలే రాజు అనే దివ్యాంగుడు అయిన ఒక గాయకుడికి తెలుగు ఇండియన్ ఐడల్‌ స్టేజ్ పై పాట పాడే అవకాశం ఇప్పిస్తాను అని, వీలు అయితే తాను సైతం అతడితో పాట పాడుతాను అంటూ హామీ ఇచ్చాడు. తమన్ మంచి మనసుకు ప్రతి ఒక్కరు ఫిదా అవుతున్నారు. మంచి మనసున్న తమన్‌ను ఎంతగా అభినందించినా తక్కువే అంటూ కామెంట్స్‌ చేస్తున్న వారు చాలా మంది ఉన్నారు. సోషల్ మీడియాలో రాజు విషయమై తమన్ పేరు మారుమ్రోగుతూ ఉన్న సమయంలో మరో మంచి పనితో వార్తల్లోకి వచ్చాడు.
కిడ్నీ ట్రాన్స్ప్లాంటేషన్ కోసం ఓ పేషెంట్‌కి తమన్ సాయం చేశారు. ఆ విషయాన్ని ఏఐఎన్‌యూ ఆసుపత్రి డాక్టర్‌ లీలా కృష్ణ ఇన్‌స్టాగ్రామ్‌ ద్వారా తెలియజేశారు. మీయొక్క మంచి మనసుకు అభినందనలు, మీ వల్లే ఆ పేషంట్‌కి కిడ్నీ ట్రాన్స్ప్లాంటేషన్ జరిగింది అంటూ చెప్పుకొచ్చాడు. డాక్టర్‌ ఇన్‌స్టా పోస్ట్‌కి స్పందించిన థమన్‌ గాడ్‌ ఈజ్ గ్రేట్‌ అంటూ సమాధానం ఇచ్చాడు. చాలా పెద్ద సాయం చేసినా గాడ్‌ ఈజ్ గ్రేట్‌ అంటూ సింపుల్‌గా చెప్పిన తమన్ గొప్ప మనసును మెచ్చుకోకుండా ఉండలేం. ఆయన అభిమానులతో పాటు ప్రతి ఒక్కరూ ఆయన చేసిన పనికి మరోసారి సోషల్ మీడియా ద్వారా అభినందనలు తెలియజేస్తున్నారు.
నటుడిగా కెరీర్‌ ఆరంభంలో ప్రయత్నాలు చేసిన తమన్ కీ బోర్డ్‌ ప్లేయర్‌గా మంచి పేరు సొంతం చేసుకుని మహేష్ బాబు ప్రోత్సాహంతో సంగీత దర్శకుడిగా ఎంట్రీ ఇచ్చాడు. ఆ నాడు మహేష్ బాబు ఇచ్చిన అవకాశం వల్లే తాను ఈ నాడు ఈ స్థాయిలో ఉన్నాను అంటూ పలు సార్లు తమన్ చెప్పిన విషయం తెల్సిందే. మహేష్ బాబు అంటే తనకు ప్రత్యేకమైన అభిమానం ఉంది అంటూ చెప్పుకునే తమన్ ప్రతి ఒక్క స్టార్‌ హీరో సినిమాకు వర్క్ చేయడం ద్వారా అరుదైన రికార్డ్‌ను సొంతం చేసుకున్నాడు. అత్యధిక పారితోషికం అందుకోవడంతో పాటు, అత్యధికంగా సినిమాలు చేస్తాడు.
ప్రస్తుతం తమన్ చేతిలో చిన్నా పెద్ద సినిమాలు కలిపి డజను ఉన్నాయి. ప్రధానంగా ఈయన సంగీతం అందిస్తున్న గేమ్‌ ఛేంజర్‌ సినిమా సంక్రాంతికి ప్రేక్షకుల ముందుకు రాబోతుంది. ఇక బాలకృష్ణ డాకు మహారాజ్‌ సినిమాకు సైతం తమన్ సంగీతాన్ని అందిస్తున్నాడు. ఆ సినిమా సైతం సంక్రాంతికి ప్రేక్షకుల ముందుకు రాబోతుంది. భారీ బ్లాక్‌ బస్టర్‌ విజయాలను ఈ రెండు సినిమాలు దక్కించుకోవడం ఖాయం అనే నమ్మకం వ్యక్తం అవుతోంది. ఇక పుష్ప 2 కోసం కొన్ని సీన్స్‌ కు గాను బ్యాక్‌ గ్రౌండ్‌ స్కోర్‌ ఇస్తున్నాడు. ఇవే కాకుండా మరికొన్ని సినిమాలు సైతం లైన్‌లో ఉన్నాయి.
