`భోళాశంక‌ర్`లో అలా `జైల‌ర్`లో ఇలా మిల్కీ బ్యూటీ

ఒకేసారి ఇద్ద‌రు సౌత్ అగ్ర హీరోల‌తో న‌టించిన ఘ‌న‌త మిల్కీ వైట్ బ్యూటీ త‌మ‌న్నాకే చెందుతుంది. ఓవైపు మెగాస్టార్ చిరంజీవి స‌ర‌స‌న `భోళాశంక‌ర్` లో న‌టిస్తూనే మ‌రోవైపు సూప‌ర్ స్టార్ ర‌జ‌నీకాంత్ జైల‌ర్ లోను త‌మ‌న్నా కీల‌క పాత్ర‌లో న‌టించింది. ఈ రెండు సినిమాలు ఈ సీజ‌న్ లో ఎంతో క్రేజీగా విడుద‌ల‌వుతుండగా.. త‌మ‌న్నా ఏ సినిమాలో ఎలాంటి పాత్ర‌లో క‌నిపించ‌నుంది? అంటూ అభిమానుల్లో ఆస‌క్తిక‌ర చ‌ర్చ సాగుతోంది. త‌మ్మూ ఏ పాత్ర‌లో న‌టించినా కానీ ఈ రెండు సినిమాల్లో స్పెష‌ల్ గ్లామ‌ర్ ట్రీట్ కి కొద‌వేమీ ఉండ‌ద‌ని అంతా ఆశ‌గా ఉన్నారు.

ఇంత‌లోనే త‌మ‌న్నా స్వ‌యంగా వేడెక్కించే అప్ డేట్ చెప్పింది. ఇంత‌కీ త‌మ‌న్నా ఏం చెప్పిందంటే.. ``నేను #భోలాశంకర్‌లో లాయర్ క్యారెక్టర్‌ని పోషిస్తున్నాను.. ఇది పూర్తి నిడివి పాత్ర. చాలా కొత్తగా ఉంటుంది. ఒరిజినల్ (త‌మిళ మాతృక‌) లో క్యారెక్టరైజేషన్ నుండి చాలా భిన్నమైన పాత్ర ఇది`` అని తెలిపింది. ఆగ‌స్టు 11న విడుద‌ల కానున్న ఈ సినిమాలో భోళాశంక‌ర్ ని డీల్ చేసే లాయ‌ర‌మ్మ‌గా త‌మ‌న్నా పాత్ర సంథింగ్ హార్ట్ ట‌చింగ్ గా ఉంటుంద‌ని మెగా ఫ్యాన్స్ కి క్లారిటీ వ‌చ్చేసిందిపుడు. మెహ‌ర్ ర‌మేష్ ద‌ర్శ‌క‌త్వంలో ఏకే ఎంట‌ర్ టైన్ మెంట్స్ ఈ చిత్రాన్ని నిర్మిస్తోంది. కీర్తి సురేష్ ఇందులో చిరు సోద‌రి పాత్ర‌లో న‌టించింది.

మ‌రోవైపు జైల‌ర్ చిత్రంలో త‌మ‌న్నా పాత్ర‌పై ర‌క‌ర‌కాల స్పెక్యులేష‌న్స్ ఉన్నాయి. ఇందులో త‌మ‌న్నా పాత్ర నిడివి అంత ఎక్కువ‌గా ఉండ‌ద‌ని.. పైగా ర‌జ‌నీ స‌ర‌స‌న క‌నిపించ‌ద‌ని ఇప్ప‌టికే ఊహాగానాలు ఉన్నాయి. అంతేకాదు ర‌జ‌నీకాంత్ కి కూతురుగా త‌మ‌న్నా క‌నిపించేందుకు అవ‌కాశం ఉంద‌ని కూడా కొన్ని త‌మిళ మీడియాలు క‌థ‌నాలు ప్ర‌చురించాయి. అయితే దీనిపై అధికారికంగా ఎలాంటి క్లారిటీ లేదు. జైల‌ర్ లో త‌మ‌న్నా పాత్ర ఫ్లాష్ బ్యాక్ లో మెరుపులు మెరిపిస్తుంద‌ని కూడా గుస‌గుస‌లు వినిపించాయి. ఈ రెండు సినిమాల‌తో పాటు త‌మ‌న్నా ప‌లు క్రేజీ సినిమాల‌తో బిజీ గా ఉంది.