దేవర విజయం.. వారి కోసం ఎన్టీఆర్ థాంక్స్ లెటర్

దేవర 1 - బాక్సాఫీస్ వద్ద మంచి కలెక్షన్స్ సొంతం చేసుకున్న విషయం తెలిసిందే. దసరా సెలవులు కూడా ఈ సినిమాకు హెల్ప్ అయ్యాయి. ఇప్పటికే బాక్సాఫీస్ వద్ద 500 కోట్ల గ్రాస్ కలెక్షన్స్ రావడంతో ఎన్టీఆర్ కెరీర్ లో ఒక బిగ్ రికార్డ్ నమోదైంది. ఇక ఈ సినిమా విజయం పట్ల చిత్ర యూనిట్ కూడా ఎంతో సంతోషంగా ఉంది. జూనియర్ ఎన్టీఆర్ కూడా ఓపెన్ గా ఒక లెటర్ విడుదల చేశారు. అందులో చిత్ర యూనిట్ కి ప్రత్యేకంగా అభినందనలు తెలుపుతూ, ఇంతటి విజయాన్ని అందించిన ప్రేక్షకులకు కూడా ప్రత్యేకంగా కృతజ్ఞతలు తెలిపారు.

ఎన్టీఆర్ ఈ విధంగా వివరణ ఇస్తూ.. "దేవర పార్ట్ 1'కి అందుతున్న అద్భుతమైన స్పందనకు నా హృదయపూర్వక కృతజ్ఞతలు. ఈ సినిమా ఎప్పటికీ నా హృదయంలో ప్రత్యేక స్థానం కలిగి ఉంటుంది. నా సహ నటులైన సైఫ్ అలీ ఖాన్ సర్, జాన్వీ, ప్రకాష్ రాజ్ గారు, శ్రీకాంత్ గారు మరియు ఇతర నటీనటులకు నా హృదయపూర్వక ధన్యవాదాలు. వారు తమ పాత్రలకు ప్రాణం పోసి, మా కథకు జీవం ఇచ్చారు" అని అన్నారు.

"అలాగే నా దర్శకుడు కొరటాల శివ గారికి ధన్యవాదాలు. ఈ కథను సృష్టించిన ఆయన దిశానిర్దేశంతోనే ఈ ప్రాజెక్ట్ విజయవంతమైంది. అనిరుధ్ అద్భుతమైన సంగీతం, రత్నవేలు సర్ సినిమాటోగ్రఫి, సాబు సర్ ప్రొడక్షన్ డిజైన్, యుగంధర్ గారు వీఎఫ్ఎక్స్, శ్రీకర్ ప్రసాద్ గారు ఎడిటింగ్ తో ఈ చిత్రాన్ని అద్భుతంగా మలిచినందుకు ధన్యవాదాలు. మా సినిమాను విజయవంతంగా ప్రదర్శించిన పంపిణీదారులు మరియు థియేటర్ ప్రదర్శకులకు ధన్యవాదాలు" అని తారక్ తెలిపారు

"ఇక నా సినీ పరిశ్రమ మిత్రులకు, వారు అందించిన ప్రేమకు ధన్యవాదాలు. అలాగే, దేశవ్యాప్తంగా ఉన్న మీడియాకు మా సినిమాను విశేషంగా ప్రోత్సహించినందుకు కృతజ్ఞతలు. మా నిర్మాతలు సుధాకర్ మిక్కిలినేని గారు మరియు హరికృష్ణ కొసరాజు గారికి ఈ ప్రాజెక్టున్ను విజయవంతంగా రూపొందించినందుకు ధన్యవాదాలు. ప్రపంచ నలుమూలల ఇంతటి ఆదరణ చూపిస్తున్న ప్రేక్షక దేవుళ్లకు నా ధన్యవాదాలు.

నా కుటుంబ సభ్యులైన నా అభిమానులందరికీ, గత నెల రోజులుగా దేవర చిత్రాన్ని ఒక పండుగలా జరుపుకుంటున్నందుకు శిరస్సు వంచి ధన్యవాదాలు తెలుపుకుంటున్నాను. మీరు చూపించే ప్రేమ అభిమానమే నన్ను ఈ స్థాయికి చేర్చింది. మీరు ఎలప్పుడు గర్వపడే చిత్రాలు చేస్తూనే ఉండడానికి నా శాయశక్తులా ప్రయత్నిస్తాను. 'దేవర పార్ట్ 1' చిత్రాన్ని మీ భుజాలపై మోసి, ఇంతటి ఘనవిజయవంతంగా మార్చినందుకు కృతజ్ఞతలు" అంటూ జూనియర్ ఎన్టీఆర్ తన సంతోషాన్ని ఈ విధంగా షేర్ చేసుకున్నారు.