'హనుమాన్'కి గొప్ప ప్రశంస అతడి నుంచే..!
తాజాగా హనుమాన్ హీరో తేజ సజ్జా సోషల్‌ మీడియా ద్వారా ఆసక్తికర విషయాన్ని పంచుకున్నారు.
By: Tupaki Desk | 30 Nov 2024 7:36 AM GMT
2024 సంక్రాంతి కానుగా ప్రేక్షకుల ముందుకు వచ్చిన 'హనుమాన్' సినిమా బాక్సాఫీస్ వద్ద భారీ విజయాన్ని సొంతం చేసుకుంది. మహేష్ బాబు, త్రివిక్రమ్‌ కాంబోలో వచ్చిన 'గుంటూరు కారం' సినిమాను ఢీ కొట్టిన హనుమాన్ సినిమా సంచలన విజయాన్ని నమోదు చేయడం జరిగింది. ఈ ఏడాది సినిమాల జాబితాలో టాప్‌లో నిలవడం మాత్రమే కాకుండా తెలుగు సినిమా చరిత్రలో నిలిచి పోయే సినిమాగా హనుమాన్ నిలిచింది అనడంలో సందేహం లేదు. ఇన్నాళ్ల తెలుగు సినిమా చరిత్రలో ఏ సంక్రాంతి మూవీకి దక్కని భారీ వసూళ్లు హనుమాన్‌కి దక్కాయి అంటూ మేకర్స్‌ అధికారికంగా ప్రకటించారు. సినిమా విడుదలై ఏడాది అవుతున్నా చర్చ కొనసాగుతూనే ఉంది.
తాజాగా హనుమాన్ హీరో తేజ సజ్జా సోషల్‌ మీడియా ద్వారా ఆసక్తికర విషయాన్ని పంచుకున్నారు. ఈ ఏడాది ఆరంభంలో హనుమాన్ మూవీ విడుదల అయినప్పటి నుంచి మీరు అందుకున్న అత్యుత్తమ ప్రశంస ఏంటి, ఎవరి నుంచి అంటూ చాలా మంది తనను అడిగారు అని, ఇన్నాళ్లు ఆ విషయాన్ని నా మనసులోనే ఉంచుకున్నాను. ఇప్పుడు చెబుతున్నాను... హనుమాన్ సినిమా విడుదల తర్వాత బాలీవుడ్‌ హీరో రణ్వీర్‌ సింగ్‌ ప్రశంస తనను ఎంతగానో కదిలించింది అన్నాడు. ఆయన ప్రతి విషయాన్ని చాలా లోతుగా గుర్తించి ఆ విషయాలను నాతో పంచుకున్నారు. చాలా విషయాలు ఆయన నాతో మాట్లాడారు.
ఆయన నాపై చాలా ప్రేమను కనబర్చారు, సినిమాలోని పలు అంశాల గురించి మాట్లాడుతూ ప్రశంసించారు. ఆయన నన్ను ప్రశంసించడం మాత్రమే కాకుండా నాకు ప్రోత్సాహం అందించారు. ఆయన చెప్పిన ప్రతి మాట గుండె లోతుల్లోంచి వచ్చినట్లుగా అనిపించింది. ఈ ఏడాదిలో హనుమాన్ సినిమాకు తాను అందుకున్న గొప్ప ప్రశంస ఆయన నుంచి దక్కిందని తేజ చెప్పుకొచ్చాడు. ప్రస్తుతం సోషల్‌ మీడియాలో రణ్వీర్‌ సింగ్‌ గురించి తేజ సజ్జా చేసిన పోస్ట్‌ వైరల్‌ అవుతోంది. హనుమాన్ దర్శకుడు రణ్వీర్‌సింగ్‌ మధ్య సినిమా కారణంగా విభేదాలు అంటూ వార్తలు వచ్చాయి. ఇప్పుడు తేజ ఆ హీరోను పొగుడుతూ ట్వీట్‌ చేయడం చర్చనీయాంశం అయింది.
ప్రస్తుతం తేజ 'మిరాయ్' సినిమాలో నటిస్తున్నాడు. సూపర్‌ హీరో మూవీ అంటూ మిరాయ్ ని ప్రమోట్‌ చేస్తున్నారు. తేజ విభిన్నమైన సినిమాలను చేసుకుంటూ బాక్సాఫీస్ వద్ద తనకంటూ ప్రత్యేక స్థానంను సొంతం చేసుకుంటూ ఉన్నారు. హనుమాన్ తర్వాత వెంటనే సినిమాతో వచ్చి ఉంటే ఆ ఇమేజ్‌ తో మంచి వసూళ్లు సొంతం అయ్యేవి అంటూ కొందరు అభిప్రాయం వ్యక్తం చేస్తూ ఉన్నారు. కానీ తేజ మాత్రం ది బెస్ట్ మూవీతో రావాలనే ఉద్దేశ్యంతో మిరాయ్ కోసం చాలా కష్టపడుతున్నట్లుగా చెప్పుకొచ్చాడు. తప్పకుండా తన కష్టంకు ఫలితం దక్కేలా మిరాయ్ ఉంటుంది అన్నారు. ఇక హనుమాన్ కి సీక్వెల్‌గా రూపొందుతున్న జై హనుమాన్ లో తేజ పాత్ర ఏంటి అనేది తెలియాల్సి ఉంది.
