విడ్డూరం : కల్కి@5.26, లక్కీ భాస్కర్‌@8.48

గత ఏడాది ప్రేక్షకుల ముందుకు వచ్చి భారీ విజయాన్ని సొంతం చేసుకున్న సినిమాల్లో 'కల్కి 2898 ఏడీ' సినిమా ముందు వరుసలో ఉంటుంది. నాగ్‌ అశ్విన్‌ దర్శకత్వంలో రూపొందిన ఆ సినిమాలో ప్రభాస్‌, అమితాబచ్చన్‌, కమల్‌హాసన్‌, దీపికా పదుకునే, శోభన తదితరులు కీలక పాత్రల్లో నటించారు. భవిష్యత్తుకు మహాభారతంను జత కలిపి దర్శకుడు రూపొందించిన కల్కి సినిమా బాక్సాఫీస్ వద్ద దాదాపు రూ.1000 కోట్లకు మించి వసూళ్లు చేసింది. పలు రికార్డ్‌లను సొంతం చేసుకున్న కల్కి సినిమా చాలా రోజుల తర్వాత వరల్డ్‌ టెలివిజన్‌ ప్రీమియర్ అయ్యింది. బాక్సాఫీస్ వద్ద భారీ విజయాన్ని సొంతం చేసుకున్న కల్కి బుల్లి తెరపై మాత్రం ఫ్లాప్‌గా నిలిచింది.

చిన్న సినిమాలు సైతం మొదటి సారి టెలికాస్ట్‌ అయిన సమయంలో ఆరు, ఏడు రేటింగ్ దక్కించుకోవడం మనం చూస్తూ ఉంటాం. కానీ 'కల్కి 2898 ఏడీ' సినిమా జీ తెలుగులో టెలికాస్ట్‌ అయ్యి అతి తక్కువ రేటింగ్‌ నమోదు చేసింది. 5.26 రేటింగ్‌ మాత్రమే నమోదు కావడంతో అంతా షాక్ అయ్యారు. సినిమాకు వచ్చిన బజ్ నేపథ్యంలో జీ తెలుగు సంస్థ భారీ మొత్తానికి కొనుగోలు చేసిందట. కానీ తాజా టెలికాస్ట్‌ సమయంలో నమోదు అయిన రేటింగ్‌ చూసి షాక్ అయ్యింది. ఇటీవల వరల్డ్‌ టెలివిజన్‌ ప్రీమియర్‌ అయిన దుల్కర్‌ సల్మాన్‌, మీనాక్షి చౌదరిల 'లక్కీ భాస్కర్‌' సినిమాకు మంచి రేటింగ్ దక్కింది.

స్టార్‌ మా టీవీలో స్ట్రీమింగ్ అయిన 'లక్కీ భాస్కర్‌' సినిమాకు 8.48 రేటింగ్‌ దక్కింది. గత ఏడాది ప్రేక్షకుల ముందుకు వచ్చిన లక్కీ భాస్కర్‌ చిన్న సినిమాల్లో పెద్ద విజయాన్ని సొంతం చేసుకుంది. తెలుగుతో పాటు ఇతర భాషల్లోనూ విడుదలైన ఈ సినిమా భారీ విజయాన్ని సొంతం చేసుకుంది. థియేట్రికల్‌ రిలీజ్‌తో పాటు ఓటీటీ స్ట్రీమింగ్‌లోనూ భారీ విజయాన్ని సొంతం చేసుకున్న లక్కీ భాస్కర్‌ టెలివిజన్‌ ప్రీమియర్‌లోనూ భారీ రేటింగ్‌ సొంతం చేసుకుంది. ప్రభాస్ సినిమా కంటే లక్కీ భాస్కర్ సినిమాను బుల్లితెరపై ఎక్కువ మంది చూడటం ఏంటో అంటూ అంతా ఆశ్చర్యంగా చర్చించుకుంటున్నారు.

ఓటీటీ పరిధి పెరిగిన నేపథ్యంలో టీవీల్లో సినిమాలు చూసే వారు చాలా తగ్గారు. ఫ్యామిలీ మొత్తం చూసి ఎంజాయ్ చేసే విధంగా ఉంటే అప్పుడు చూస్తున్నారు. ఓటీటీలో చూసినా కొన్ని సినిమాలను టీవీల్లో చూసేందుకు ఆసక్తి చూపిస్తున్నారు. కల్కి సినిమాను థియేటర్‌లో సూపర్‌ హిట్‌ చేసి ఓటీటీ, శాటిలైట్‌ లో మాత్రం ప్రేక్షకులు ఆధరించలేదు. కల్కి వంటి భారీ సినిమాను థియేటర్‌లోనే చూస్తే బాగుంటుందని, బుల్లి తెరపై చూస్తే బాగోదనే అభిప్రాయం సైతం ప్రేక్షకుల్లో ఉండటం వల్ల రేటింగ్‌ తక్కువ నమోదు అయ్యి ఉంటుంది. మొత్తానికి ఫిల్మ్‌ మేకర్స్ ఈ విషయాన్ని కాస్త దృష్టిలో పెట్టుకుంటే అందరికీ మంచిదనే అభిప్రాయం వ్యక్తం అవుతోంది.