తమన్ - ప్రభాస్.. కాంబో సౌండ్ షురూ

పాన్ ఇండియా స్టార్ ప్రభాస్ వరుస సినిమాలతో బిజీగా ఉన్నారు. ఇటీవలే సలార్ మూవీతో బ్లాక్‍ బాస్టర్ సొంతం చేసుకుని మళ్లీ సూపర్ హిట్ బాట పట్టారు. ప్రస్తుతం నాగ్ అశ్విన్ దర్శకత్వంలో సైన్స్ ఫిక్షన్ డిస్టోపియన్ మూవీ కల్కి 2898 ఏడీలో నటిస్తున్నారు. హాలీవుడ్ రేంజ్‍ లో భారీ బడ్జెట్‍ తో రూపొందుతున్న ఈ చిత్రం మే 9వ తేదీన రిలీజ్ కానుంది. కాగా, మారుతి దర్శకత్వంలో రాజా సాబ్ మూవీ కూడా చేస్తున్నారు ప్రభాస్.

ఈ చిత్రాన్ని పీపుల్స్ మీడియా ఫ్యాక్టరీ బ్యానర్ పై టీజీ విశ్వప్రసాద్, వివేక్ కూచిభొట్ల నిర్మిస్తున్నారు. నిజానికి ఈ సినిమా షూటింగ్ ఎప్పుడో మొదలైంది కానీ ఆ విషయాన్ని చాలా సీక్రెట్ గా ఉంచుతూ వచ్చారు మేకర్స్. ఈ మధ్య సంక్రాంతి సందర్భంగా ఈ సినిమా టైటిల్ ను రివీల్ చేస్తూ ప్రభాస్ లుక్ కూడా రిలీజ్ చేశారు. అది తప్ప సినిమాకు సంబంధించి ఎలాంటి అధికారిక సమాచారం లేదు.

ఇటీవలే మారుతి.. ఈ సినిమా రిలీజ్ డేట్ పై మాట్లాడారు. ప్రభాస్ నుంచి ముందుగా ఓ పెద్ద సినిమా (కల్కి 2898 ఏడీ) రానుందని, దీంతో ఇప్పుడు ఆ చిత్రం గురించి ఎక్కువగా మాట్లాడుకోవాలని మారుతి అన్నారు. ఆ మూవీ తర్వాత ఎలాగూ రాజా సాబ్ గురించి అప్డేట్లు వస్తాయని ఆయన చెప్పారు. అంటే.. కల్కి 2898 ఏడీ మూవీ రిలీజ్ తర్వాత రాజాసాబ్ అప్జేట్లు వస్తాయనేలా మారుతీ హింట్ ఇచ్చారు.

దీంతో కల్కి తర్వాత ఈ ఏడాది చివర్లో రాజా సాబ్ మూవీ రిలీజ్ కానుందని సినీ వర్గాల్లో టాక్ వినిపిస్తోంది. ఇక ఈ సినిమాకు సంబంధించిన మరో అప్డేట్ నెట్టింట చక్కర్లు కొడుతోంది. ఈ చిత్రానికి స్టార్ మ్యూజిక్ డైరెక్టర్ తమన్ బాణీలు కడుతున్న సంగతి తెలిసిందే. ఇప్పుడు ఈ మూవీ మ్యూజిక్ సిట్టింగ్స్ కు అంతా సిద్ధమైందట. చెన్నై లో ఈరోజు నుంచే ప్రారంభమవుతున్నాయట.

అయితే తమన్.. సంక్రాంతికి విడుదలైన గుంటూరు కారం మూవీకి కూడా మ్యూజిక్ డైరెక్టర్ గా వ్యవహరించారు. కానీ ఆ సినిమా సాంగ్స్ రిలీజ్ టైమ్ లో తీవ్ర వ్యతిరేకత ఎదుర్కొన్నారు. పాటల కంపోజిషన్ అస్సలు బాలేదని మహేశ్ ఫ్యాన్సే కామెంట్లు చేశారు. దీంతో రాజా సాబ్ మూవీ.. తమన్ కు ఓ బెస్ట్ ఛాన్స్ అని చెప్పవచ్చు. వరుస చిత్రాలతో వ్యతిరేకత ఎదుర్కొంటున్న తమన్.. ఈ సినిమాతోనైనా బెస్ట్ అనిపిస్తారో లేదో చూడాలి.