సంగీత‌మే కాదు న‌ట‌న‌తోను అల‌రిస్తాడ‌ట‌

పాపులర్ యూట్యూబర్ నిహారికా ఎన్ఎమ్ న‌ట‌న‌, అనుక‌ర‌ణ‌ క‌ళ తెలుగు వారికి సుప‌రిచితం. కొన్ని తెలుగు సినిమాల ప్రమోషన్ల సమయంలో మహేష్, సిద్ధార్థ్ స‌హా ప‌లువురు నటించిన కొన్ని ఆసక్తికరమైన రీల్స్ చేసింది. నిహారిక ఇప్పుడు న‌టిగా మార‌నుంద‌ని తెలిసింది. తొలిగా త‌మిళంలో ఆరంగేట్రం చేయ‌నుంది.

ఆస‌క్తిక‌రంగా ఈ చిత్రానికి సంగీతం అందించ‌డ‌మే గాక‌, ఇందులో ఒక పాత్ర‌లో ఎస్.ఎస్. థ‌మ‌న్ న‌టిస్తార‌ని గుస‌గుస‌లు వినిపిస్తున్నాయి. అయితే దీనిని చిత్ర‌బృందం అధికారికంగా నిర్థారించ‌వ‌ల‌సి ఉంది. థ‌మ‌న్ సంగీత ద‌ర్శ‌కుడు కాక ముందు న‌ట‌న‌లోను కొన‌సాగిన సంగ‌తి తెలిసిందే. శంక‌ర్ తెర‌కెక్కించిన బోయ్స్ సినిమాలో న‌లుగురు బోయ్స్ లో ఒక‌డిగా థ‌మ‌న్ న‌టించాడు. అత‌డి న‌ట‌న‌కు మంచి పేరొచ్చింది. ఇప్పుడు మ‌రోసారి థ‌మ‌న్ న‌టిస్తున్నాడు అన్న వార్త అభిమానుల‌ను ఆక‌ర్షిస్తోంది.

లైకా ప్రొడక్షన్స్ ఈ చిత్రాన్ని నిర్మించ‌నుంది. ఇందులో అథర్వ క‌థానాయ‌కుడిగా న‌టించే అవ‌కాశం ఉంది. మనోజ్ పరమాహాంసా ఈ చిత్రానికి సినిమాటోగ్రఫీ అందిస్తున్నారు. బ‌హుబాష‌ల్లో ఈ చిత్రాన్ని విడుద‌ల చేస్తార‌ని కూడా తెలుస్తోంది. ప్ర‌స్తుతం ఈ సినిమా ప్రీప్రొడ‌క్ష‌న్ జ‌రుగుతోంది. తారాగ‌ణం, టెక్నీషియ‌న్ల గురించి ఇంకా వెల్ల‌డించాల్సి ఉంది. నిహారిక ఎన్.ఎం క‌ల‌ ఈ సినిమాతో నెర‌వేరుతుందేమో చూడాలి. రంగుల ప్ర‌పంచంలో బిగ్ డ్రీమ్స్ ని ఈ యూట్యూబ‌ర్ నెర‌వేర్చుకుంటుంద‌నే భావిద్దాం.