మురుగ‌దాస్ SK 23లో ట్యాలెంటెడ్ హీరో ఎంట్రీ

మలయాళ నటుడు బిజు మీనన్ సుదీర్ఘ విరామం తర్వాత SK 23 అనే ప్రాజెక్ట్‌తో తమిళ చిత్రసీమలో తిరిగి ప్ర‌వేశిస్తున్నారు. శివకార్తికేయన్ ప్రధాన పాత్రలో ఏస్ ఫిల్మ్ మేకర్ AR మురుగదాస్ దర్శకత్వం వహిస్తున్న ఈ సినిమాలో అత‌డు కీల‌క పాత్ర‌ను పోషించ‌నున్నారు. తాజాగా బిజు ఇంట్ర‌డ‌క్ష‌న్ వీడియోని మురుగ‌దాస్ టీమ్ విడుద‌ల చేసింది. తాజా సమాచారం ప్రకారం, ఈ చిత్రంలో బిజు మీనన్ ప్రధాన విలన్ పాత్రలో నటిస్తున్నారు. 14 ఏళ్ల తర్వాత బిజు మీనన్ నటించిన తమిళ చిత్రం SK 23. అతడు నటించిన చివరి తమిళ చిత్రం 2010లో వచ్చిన పొర్క్కలం.

దేవుని స్వంత దేశం నుండి ఒక తెలివైన నటుడు మాతో చేరాడు! అంటూ మురుగ‌దాస్ టీమ్ ఆనందంగా అత‌డికి వెల్ కం చెబుతున్న వీడియో ఇప్పుడు అంత‌ర్జాలంలో వైర‌ల్ గా మారింది. #SKxARM (ఎస్‌కె 23) కోసం బోర్డ్‌లో ఉన్న స్టార్ #బిజుమీనన్‌కు స్వాగతం అని సోష‌ల్ మీడియాలో రాసారు.

మలయాళ సినిమా `న్యూ వేవ్` తరువాత బిజు మీనన్ నటనా జీవితం కొత్త ఎత్తుల‌కు చేరుకుంది. అతడు `అయ్యప్పనుమ్ కోషియుమ్` వంటి కొన్ని అతిపెద్ద ఇండస్ట్రీ హిట్ చిత్రంలో న‌టించాడు. ఇటీవల తాళ్లుమలలో కనిపించాడు, అందులో అతను ఆసిఫ్ అలీతో స్క్రీన్ స్పేస్‌ను షేర్ చేసుకున్నాడు. ఈ కాప్ థ్రిల్లర్ ఈ సంవత్సరం ప్రారంభంలో సినిమాల్లో విడుదలై సానుకూల సమీక్షలను పొందింది. బాక్సాఫీస్ వద్ద విజయవంతమైంది. వ‌రుస విజ‌యాల‌తో దూకుడు మీదున్న బిజు మీన‌న్ ని ఇప్పుడు స్టార్ డైరెక్ట‌ర్ మురుగ‌దాస్ విల‌న్ పాత్ర‌కు ఎంపిక చేయ‌డం మ‌ల‌యాళ వ‌ర్గాల్లో ఆస‌క్తిని పెంచింది.

మురుగదాస్ SK 23 భారీ బడ్జెట్‌తో రూపొందుతున్న చిత్రం. ఈ సినిమాని మొదట ద‌ళ‌పతి విజయ్‌తో చేయాల‌నుకున్నారు. కానీ అది వీలుప‌డ‌లేదు. అనంత‌రం మురుగదాస్‌తో చేతులు కలపడానికి శివకార్తికేయన్‌కు మార్గం సుగమమైంది. ఈ చిత్రం మురుగదాస్ - శివకార్తికేయన్‌ల క‌ల‌యిక‌లో మొదటి ప్ర‌య‌త్నం. ఇప్ప‌టికే తమిళ సినిమా అభిమానులలో చాలా అంచనాలను పెంచింది. SK 23 చిత్రంతోనే తమిళ చిత్రసీమలోకి రుక్మిణి వసంత్ అరంగేట్రం చేస్తున్నారు. విద్యుత్ జమ్వాల్ కూడా సినిమాలో కీలక పాత్ర పోషిస్తున్నాడు. 2012లో బ్లాక్‌బస్టర్ అయిన తుప్పాకి తర్వాత మురుగదాస్‌తో విద్యుత్ కి ఇది రెండో సినిమా. ఈ సినిమాని తెలుగులో శ్రీ‌లక్ష్మి మూవీస్ విడుద‌ల చేయ‌నుంది.

మురుగదాస్ ఏకకాలంలో సూపర్ స్టార్ సల్మాన్ ఖాన్‌తో ఓ హిందీ చిత్రాన్ని తెరకెక్కిస్తున్నాడు. సికందర్ అనే టైటిల్ తో రూపొందిన ఈ సినిమా ఈ ఏడాది జూన్ లో సెట్స్ పైకి వెళ్లింది. ఇందులో సత్యరాజ్, రష్మిక మందన్న కూడా ప్రధాన పాత్రల్లో నటిస్తున్నారు.