ఈ వారం థియేటర్, ఓటీటీ వినోదాల విందు జాబితా..!
ప్రతి వారం తెలుగు సినీ ప్రేక్షకుల ముందుకు థియేటర్ ద్వారా మరియు ఓటీటీ ద్వారా కొత్త సినిమాలు మరియు సిరీస్ లు వస్తూనే ఉన్నాయి.
By: Tupaki Desk | 21 Nov 2023 6:20 AM GMT
ప్రతి వారం తెలుగు సినీ ప్రేక్షకుల ముందుకు థియేటర్ ద్వారా మరియు ఓటీటీ ద్వారా కొత్త సినిమాలు మరియు సిరీస్ లు వస్తూనే ఉన్నాయి. ఓటీటీ ద్వారా ఎన్ని సినిమాలు వచ్చినా కూడా, ఎంత త్వరగా వచ్చినా కూడా థియేటర్ కి వెళ్లి సినిమాలు చూడాలి అనుకునే వారు తెలుగు రాష్ట్రాల్లో ఇంకా చాలా మందే ఉన్నారు అనడంలో సందేహం లేదు.
ఇక ఈ వారం థియేటర్ ల ద్వారా రాబోతున్న సినిమాల విషయానికి వస్తే.. ఒకటి కాదు రెండు కాదు ఏకంగా నాలుగు సినిమాలు లైన్ లో ఉన్నాయి. అందులో ప్రధానంగా మెగా హీరో వైష్ణవ్‌ తేజ్ నటించిన ఆదికేశవ ఒకటి కాగా రెండో సినిమా కోట బొమ్మాళి పీఎస్‌. ఈ రెండు సినిమాలు కూడా ప్రేక్షకుల్లో విడుదలకు ముందే ఆసక్తి ని రేకెత్తిస్తున్నాయి. కనుక మంచి ఓపెనింగ్స్ ఖాయం అనిపిస్తోంది.
ఇక ఈ సినిమాలు మాత్రమే కాకుండా మరో రెండు సినిమాలు కూడా ఈ వారం థియేటర్ల ద్వారా ప్రేక్షకుల ముందుకు రాబోతున్నాయి. వాటి విషయానికి వస్తే మొదటిది సౌండ్ పార్టీ. ఇక మరో సినిమా డబ్బింగ్‌ సినిమా. స్టార్‌ హీరో విక్రమ్‌ సినిమా నే అయినా కూడా ధృవ నక్షత్రం సినిమా ను తెలుగు రాష్ట్రాల్లో పెద్దగా పట్టించుకోవడం లేదు. కానీ మేకర్స్ మాత్రం విడుదల అయిన తర్వాత స్పందన దక్కుతుందని అంటున్నారు.
మొత్తానికి ఈ నాలుగు సినిమాలు థియేటర్ల ద్వారా ప్రేక్షకుల ముందుకు వచ్చి వినోదాన్ని పంచేందుకు రెడీగా ఉన్నాయి. ఇవన్నీ కూడా ఈ నెల 24న ప్రేక్షకుల ముందుకు రాబోతున్నాయి. అన్ని సినిమాలు మీడియం రేంజ్‌, చిన్న సినిమాలే కనుక థియేటర్ల సమస్య రాకపోవచ్చు.
ఇక ఓటీటీ సినిమాలు, సిరీస్ ల విషయానికి వస్తే... తెలుగు సినిమాలు, సిరీస్ లు ఏమీ లేవు. కానీ తెలుగు లో డబ్‌ అయిన సినిమాలు మరియు సిరీస్ లు మాత్రం ఉన్నాయి. అంతే కాకుండా గతంలో సూపర్ హిట్ అయిన వెబ్ సిరీస్ ల యొక్క కొత్త సీజన్‌ లు మరియు ఇతర భాషల సూపర్ హిట్ సినిమాలు స్ట్రీమింగ్‌ అవ్వబోతున్నాయి. కనుక ఇతర భాషల సినిమాలు, సిరీస్ లను చూసే వారికి వాటి ద్వారా కూడా వినోదాల విందు ఖాయం.
