ఒకే రోజు.. విశ్వక్ తో పాటు ఆ ఇద్దరు!

టాలీవుడ్ లో సినిమాల సందడి మళ్ళీ షురూ అవుతోంది. ఎలక్షన్ మూడ్ నుంచి పబ్లిక్ బయటకొచ్చి ఎంటర్టైన్మెంట్ పై ఫోకస్ చేస్తున్నారు. అదే సమయంలో మొదటి ఆరు నెలల కాలం చాలా స్థబ్ధుగా నడిచింది. జూన్ నుంచి సినిమాల రిలీజ్ లు పెరిగాయి. కల్కి 2898ఏడీ మూవీ థియేటర్స్ లోకి వచ్చి సక్సెస్ ఫుల్ గా సాగుతోంది. మరికొన్ని సినిమాలు రిలీజ్ కి రెడీ అవుతున్నాయి. రాబోయే ఆరు నెలల్లో టాలీవుడ్ నుంచి 6 పాన్ ఇండియా సినిమాలు ప్రేక్షకుల ముందుకి రానున్నాయి.

అదే సమయంలో చాలా సినిమాలు ప్రారంభం కాబోతున్నాయి. మీడియం రేంజ్ మూవీస్ నుంచి భారీ బడ్జెట్ చిత్రాల వరకు సెట్స్ పైకి వెళ్ళడానికి రెడీ అవుతున్నాయి. కొన్ని ప్రారంభోత్సవం జరుపుకొని షూటింగ్ కి వెళ్తున్నాయి. మరికొన్ని సినిమాలు ఇప్పటికే లాంచ్ అయ్యి షూటింగ్ స్టార్ట్ చేసుకుంటున్నాయి. ఇదిలా ఉంటే జులై 3వ తేదీన టాలీవుడ్ లో ఏకంగా మూడు సినిమాలు ప్రారంభం కాబోతున్నాయి.

విక్టరీ వెంకటేష్, అనిల్ రావిపూడి కాంబినేషన్ లో దిల్ రాజు నిర్మించబోయే మూవీ ఓపెనింగ్ జూన్ 3న జరగబోతోంది. ఈ సినిమాకి సంబందించిన క్యాస్టింగ్ అండ్ క్రూ ని ఇప్పటికే ఫైనల్ చేసినట్లు తెలుస్తోంది. అనిల్, వెంకీ కాంబినేషన్ లో ఎఫ్2, ఎఫ్3 సినిమాలు వచ్చి హిట్ అయ్యాయి. ఇప్పుడు హ్యాట్రిక్ మూవీగా కొత్త సినిమా తెరకెక్కనుంది. ఈ సారి క్రైమ్ కామెడీ జోనర్ లో అనిల్ రావిపూడి కథ చెప్పబోతున్నాడంట. వరుస హిట్స్ తో జోరు మీద ఉన్న అనిల్ రావిపూడి వెంకటేష్ సినిమా కోసం భారీగా రెమ్యునరేషన్ తీసుకుంటున్నారంట.

అలాగే బెల్లంకొండ సాయి శ్రీనివాస్ కౌశిక్ అనే కొత్త దర్శకుడితో సినిమాని స్టార్ట్ చేయబోతున్నాడు. సాహు గారపాటి ఈ చిత్రాన్ని భారీ బడ్జెట్ తో నిర్మించనున్నారు. జులై 3న ఈ మూవీ ఓపెనింగ్ కూడా జరగనుంది. ప్రస్తుతం సాగర్ కె చంద్ర దర్శకత్వంలో బెల్లంకొండ శ్రీనివాస్ టైసన్ నాయుడు అనే మూవీ చేస్తున్నాడు. ఈ సినిమా షూటింగ్ దశలో ఉంది.

ఇక యంగ్ హీరో విశ్వక్ సేన్ హీరోగా రామ్ నారాయణ్ దర్శకత్వంలో ఓ మూవీ ప్రారంభం కాబోతోంది. ఈ చిత్రాన్ని కూడా సాహు గారపాటి నిర్మిస్తున్నారు. జులై 3న ఈ మూవీ ఓపెనింగ్ కూడా జరగబోతోంది. ఇవి కాకుండా మరికొన్ని సినిమాలు కూడా జులై 3న ముహూర్తం నిర్ణయించుకున్నట్లు టాక్ వినిపిస్తోంది. అలాగే రామ్ చరణ్ హీరోగా బుచ్చిబాబు దర్శకత్వంలో తెరకెక్కనున్న RC16 మూవీ షూటింగ్ జులైలోనే స్టార్ట్ అయ్యే అవకాశం ఉందంట.