టిల్లు స్క్వేర్.. చేతులు మారిందా?

డీజే టిల్లుతో స్టార్ బాయ్ గా మారిన సిద్ధూ జొన్నలగడ్డ.. మరికొద్ది రోజుల్లో ఆ సినిమా సీక్వెల్ తో రాబోతున్న విషయం తెలిసిందే. మల్లు బ్యూటీ అనుపమ పరమేశ్వరన్ హీరోయిన్ గా నటిస్తున్న ఈ చిత్రం.. వేసవి కానుకగా మార్చి 29న ప్రేక్షకుల ముందుకు రానుంది. అయితే ఫస్ట్ పార్ట్ లోని టిల్లు ఫన్ ను ఇప్పటికీ ఎవరూ మర్చిపోలేరు. సిద్ధు డైలాగ్స్ టాలీవుడ్ మూవీ లవర్స్ మదిలో అలా నిలిచిపోయాయని చెప్పవచ్చు.

అయితే డీజే టిల్లు సూపర్ హిట్ అవ్వడం, టిల్లు స్క్వేర్ నుంచి ఇప్పటికే విడుదలైన ప్రమోషనల్ కంటెంట్ బాగా ఆకట్టుకోవడంతో ప్రేక్షకులు మంచి అంచనాలు పెట్టుకున్నారు. సినిమా కోసం ఈగర్లీ వెయిట్ చేస్తున్నారు. కొద్ది రోజుల క్రితమే షూటింగ్ పూర్తి చేసుకున్న ఈ మూవీ పోస్ట్ ప్రొడక్షన్ వర్క్స్ శరవేగంగా జరుగుతున్నాయి.

ఇదంతా పక్కన పెడితే.. డీజే టిల్లుకు స్టార్ మ్యూజిక్ డైరెక్టర్ తమన్ బ్యాక్ గ్రౌండ్ స్కోర్ అందించారు. ఇక సీక్వెల్ కు కూడా ఆయనే అందిస్తారని అంతా భావించారు. నిజానికి ఆ బాధ్యతలను తమన్ కు మేకర్స్ ఇప్పటికే అప్పగించారు. కానీ తమన్ తన బిజీ షెడ్యూల్ వల్ల ఈ ప్రాజెక్ట్ నుంచి తప్పుకున్నారు. ఈ విషయాన్ని నిర్మాత నాగవంశీ ఇటీవల తెలిపారు.

తమన్ స్థానంలో భీమ్స్ సిసిరోలియోను తీసుకున్నట్లు చెప్పారు. అనుకున్న డేట్ కు సినిమా రిలీజ్ చేయాలనే ఈ నిర్ణయం తీసుకున్నట్లు వెల్లడించారు. తమన్ తప్పుకోవడం వెనుక కారణం చెప్పి పుకార్లు కూడా చెక్ పెట్టారు. ప్రస్తుతం బ్యాక్ గ్రౌండ్ వర్క్స్ లో భీమ్స్ బిజీగా ఉన్నారు. బలగం, మ్యాడ్ చిత్రాలకు అందించిన బ్యాక్ గ్రౌండ్ స్కోర్ తో మంచి పేరు సంపాదించుకున్నారు భీమ్స్.

ప్రస్తుతం భీమ్స్.. టాలీవుడ్ ఫుల్ బిజీగా ఉన్నారు. ఇటీవల ఆయన మ్యూజిక్ అందించిన రజాకార్ మూవీ విడుదలైంది. అందులో సాంగ్స్ తోపాటు బ్యాక్ గ్రౌండ్ స్కోర్ కు మంచి రెస్పాన్స్ వస్తోంది. అయితే ప్రస్తుతం భీమ్స్ టిల్లు స్క్వేర్ రీ రికార్డింగ్ చేస్తుండగా.. రామ్ మిరియాల, అచ్చు రాజమణి మ్యూజిక్ అందిస్తున్నారు. మొత్తానికి ఈ సినిమాకు భీమ్స్ ఎలాంటి నేపథ్య సంగీతం అందిస్తారో వేచి చూడాలి.