టిల్లు స్క్వేర్ సెన్సార్.. ఆ రూమర్లకు బిగ్ చెక్

టాలీవుడ్ స్టార్ బాయ్ సిద్ధు జొన్నలగడ్డ.. యాక్ట్ చేసిన డీజే టిల్లు మూవీ ఎలాంటి హిట్ అయిందో అందరికీ తెలిసిందే. మంచి యూత్ ఫుల్ ఎంటర్టైనర్ గా విడుదలైన ఈ సినిమాతో సిద్ధు రెండేళ్ల క్రితం సంచలనం సృష్టించారు. డైరెక్టర్ విమల్ కృష్ణ తెరకెక్కించిన ఈ సినిమా బాక్సాఫీస్ వద్ద భారీ హిట్ సాధించింది. ఇక టిల్లు చేసిన హంగామా అంతా ఇంతా కాదు. ఇప్పుడు ఈ మూవీ సీక్వెల్ త్వరలోనే రానుంది.

టిల్లు స్క్వేర్ మూవీతో మరోసారి అలరించేందుకు సిద్ధమవుతున్నారు సిద్ధు జొన్నలగడ్డ. అనుపమ పరమేశ్వరన్ హీరోయిన్ గా నటించిన ఈ మూవీ.. వేసవి కానుకగా మార్చి 29వ తేదీన ప్రేక్షకుల ముందుకు రానుంది. మల్లిక్ రామ్ తెరకెక్కించగా.. సితార ఎంటర్టైన్మెంట్స్ బ్యానర్ పై నాగవంశీ నిర్మిస్తున్నారు. ఇక రిలీజ్ డేట్ దగ్గరపడుతుండటంతో మేకర్స్.. ఈ మూవీ సెన్సార్ ను పూర్తి చేశారు.

అయితే ఈ మూవీకి సెన్సార్ బోర్డు.. యూ/ఏ సర్టిఫికేట్ జారీ చేసింది. ఈ విషయాన్ని మేకర్స్ అధికారికంగా ప్రకటిస్తూ పోస్టర్ కూడా రిలీజ్ చేశారు. ర‌న్‌ టైం 121 నిమిషాలు ఉన్న‌ట్లు స‌మాచారం. సెన్సార్ అధికారులు సినిమా చూసిన తర్వాత కామెడీ కోసం మూవీ టీమ్ చేసిన ప్రయత్నాలను మెచ్చుకున్నారు. దీంతో కచ్చితంగా సినిమా హిట్ అవుద్దని మేకర్స్ నమ్మకంతో ఉన్నారు. అన్ని వర్గాల ప్రేక్షకులకు నచ్చే పూర్తి వినోదాన్ని అందించడానికి చాలా సమయాన్ని వెచ్చించామని పేర్కొన్నారు.

ఇక ప్రమోషన్స్ లో భాగంగా టిల్లు స్క్వేర్ మేకర్స్ విడుదల చేసిన టీజర్, ట్రైలర్, సాంగ్స్ లో లిప్ లాక్స్, గ్లామర్ షో చూసి ఈ సినిమాకు కచ్చితంగా ఏ సర్టిఫికెట్ ఇస్తారని అంతా భావించారు. కానీ సెన్సార్ బోర్డ్ ఈ సినిమాకు యూ/ఏ సర్టిఫికెట్ ను జారీ చేసింది. దీంతో బోల్డ్ కంటెంట్ మూవీ అనే రూమర్లకు తెరపడింది. హాయిగా ఫ్యామిలీతో కలిసి వెళ్లొచ్చని తేలిపోయింది.

అయితే ఫస్ట్ పార్ట్ లో రాధికతో క్రైమ్‌ ఎపిసోడ్‌ లాగానే సీక్వెల్ లో కూడా మరో ఇంట్రెస్టింగ్‌ డ్రామా ఉండబోతున్నట్లు సినీ వర్గాల్లో టాక్ వినిపిస్తోంది. ఈ చిత్రానికి సాయి ప్రకాశ్ ఉమ్మడిసింగు సినిమాటోగ్రఫీ అందించారు. రామ్ మిరియాల, అచ్చు రాజమణి బాణీలు కట్టారు. భీమ్స్ సిసరోలియో బ్యాక్ గ్రౌండ్ స్కోర్ అందించారు. మరి ఈ మూవీ ఎలాంటి హిట్ కొడుతుందో చూడాలి.