చీర‌లో కాజ‌ల్ సోద‌రి నిషా అందం

నిషా అగ‌ర్వాల్ .. ప‌రిచ‌యం అవ‌స‌రం లేదు. కాజ‌ల్ అగ‌ర్వాల్ గారాల చెల్లెలు. తెలుగు సినిమా కథానాయిక‌గాను సుప‌రిచితురాలు. సోద‌రీమ‌ణుల మ‌ధ్య గొప్ప అనుబంధం ఆక‌ర్షిస్తుంది.. అయితే నిషా అగ‌ర్వాల్ కొన్నేళ్ల పాటు సినిమాల్లో న‌టించినా కానీ, త‌న సోద‌రి కాజ‌ల్ కంటే ముందే పెళ్లి చేసుకుని లైఫ్ లో సెటిలైంది. త‌న భ‌ర్త పిల్ల‌లు కాపురం అంటూ త‌న పంథాలో ఉంది.

నిషా ఫ్లాష్ బ్యాక్ లోకి వెళితే.. తెలుగులో ప‌లు చిత్రాల్లో న‌టించింది. వ‌రుణ్ సందేశ్ .. నారా రోహిత్ లాంటి యువ‌హీరోల స‌ర‌స‌న హిట్ చిత్రాల్లో న‌టించింది. ఆ త‌ర్వాత కెరీర్ ఆశించిన రేంజుకు చేర‌క‌పోవ‌డంతో పెద్ద‌లు కుదిర్చిన వివాహం చేసుకుంది. ముంబైకి చెందిన వ్యాపారవేత్త కరణ్ వలేచాను 2013 డిసెంబర్ 28 న పెళ్లాడింది నిషా. ఈ జంట‌కు కిడ్స్ ఉన్నారు.

కెరీర్ జ‌ర్నీలో వ‌రుణ్ సందేశ్ - నిషా జంట‌గా న‌టించిన‌ రొమాంటిక్ డ్రామా `ఏమైంది ఈవేళ` బాక్స్ ఆఫీస్ వద్ద విజయం సాధించింది. తదుపరి చిత్రం సోలో మంచి విజ‌యం అందుకుంది. నారా రోహిత్- నిషా అగ‌ర్వాల్ జంట‌కు ఇది బ్లాక్ బ‌స్ట‌ర్ మూవీ. 2011 చివరిలో ఈ మూవీ విడుదలైంది .ఇందులో నిషా మెడికల్ కాలేజీ విద్యార్థిగా న‌టించ‌గా రోహిత్ వీర ప్రేమికుడిగా క‌నిపించాడు. ఆ త‌ర్వాత ఏమైంది ఈవేళ రీమేక్ `ఇష్టం` (2012) చిత్రంతో నిషా తమిళంలో అడుగుపెట్టింది. ఈ చిత్రం బాక్సాఫీస్ వద్ద ఘోరంగా విఫలమైంది. 2013 లో సుకుమరుడులో న‌టించింది. భయ్య భయ్య తో మలయాళ చిత్ర పరిశ్రమలోనూ ప్రవేశించింది. అటుపై చివరిసారిగా మలయాళ చిత్రం కజిన్స్ లో కనిపించింది. నిషా అగర్వాల్ పెళ్లి చేసుకున్న తర్వాత నటనను విర‌మించాలని నిర్ణయించుకుంది. 27 అక్టోబర్ 2018 న ఈ జంటకు ఇషాన్ వలేచ అనే కుమారుడు క‌లిగాడు.

నిషా ఇటీవ‌ల సోష‌ల్ మీడియాల్లో స్పీడ్ గా ఉంది. నిరంత‌రం ఫోటోషూట్ల‌ను షేర్ చేస్తూ, కొన్ని వాణిజ్య ప్ర‌క‌ట‌న‌లను షేర్ చేస్తూ ఆదాయ ఆర్జ‌న చేస్తోంది. అయితే నిషా న‌ట‌న‌లో సెకండ్ ఇన్నింగ్స్ ప్రారంభించే ఆలోచ‌న‌లో ఉంద‌ని కూడా గుస‌గుస‌లు వినిపిస్తున్నాయి.