టాలీవుడ్ స్టార్ హీరోయిన్లు మిస్సింగ్!

టాలీవుడ్ లో ఒకప్పుడు స్టార్ హీరోయిన్లుగా రాణించిన అందాల భామలు.. కొన్నాళ్లుగా తెలుగు స్క్రీన్ మీద కనిపించడం లేదు. చేతి నిండా సినిమాలతో ఏడాది పొడవునా బిజీగా ఉండే కథానాయికలు కొందరు.. తెలుగు ప్రేక్షకులను పలకరించి ఏడాది దాటిపోయింది. నిన్న మొన్న వచ్చిన కుర్ర హీరోయిన్స్ అంతా క్రేజీ ఆఫర్స్ తో దూసుకుపోతుంటే.. ఒకప్పటి స్టార్ ముద్దుగుమ్మలు మాత్రం దూకుడు తగ్గించేశారు. మెల్ల మెల్లగా తెలుగులో క్రేజ్ తగ్గిపోతుండటం.. ఇతర భాషలపై ఫోకస్ పెట్టడం కూడా దీనికి కారణాలుగా చెప్పొచ్చు.

బుట్టబొమ్మ పూజా హెగ్డే తెలుగు సినిమా చేసి రెండేళ్లు దాటిపోయింది. 'ఆచార్య' మూవీలో రామ్ చరణ్ కు జోడీగా కనిపించిన పూజా.. చివరగా 'ఎఫ్ 3' సినిమాలో స్పెషల్ సాంగ్ చేసింది. ప్రస్తుతం బాలీవుడ్, కోలీవుడ్ లపై దృష్టి పెట్టింది. హిందీలో 'దేవా', తమిళంలో సూర్య 44, తలపతి 69 చిత్రాల్లో హీరోయిన్ గా నటిస్తోంది. 'భోళా శంకర్' తో బోల్తా పడ్డ మహానటి కీర్తి సురేష్.. ఆ తర్వాత నేరుగా మరో తెలుగు సినిమా చేయలేదు. మధ్యలో 'కల్కి 2898 AD' మూవీలో బుజ్జికి వాయిస్ ఓవర్ ఇచ్చింది. తమిళ్ లో మూడు సినిమాల్లో నటిస్తున్న కీర్తి.. 'బేబీ జాన్‌' మూవీతో బాలీవుడ్‌లోకి ఎంట్రీ ఇవ్వడానికి రెడీ అవుతోంది.

గతేడాది 'శాకుంతలం' 'ఖుషి' సినిమాలు చేసిన స్టార్ హీరోయిన్ సమంత రూత్ ప్రభు.. ఈ ఏడాది కాలంలో మరో తెలుగు చిత్రం చేయలేదు. 'మా ఇంటి బంగారం' అనే ప్రాజెక్ట్ ని ప్రకటించింది కానీ, అది ఎప్పుడు వస్తుందనేది క్లారిటీ లేదు. ఇటీవలే హిందీలో 'సిటాడెల్' వెబ్ సిరీస్ తో వచ్చిన సామ్.. హిందీలోనే మరో సిరీస్ కు సైన్ చేసింది. 2023లో 'మిస్ శెట్టి మిస్టర్ పోలిశెట్టి' అంటూ వచ్చిన అగ్ర కథానాయిక అనుష్క శెట్టి.. సైలెంట్ గా 'ఘాటీ' మూవీని పూర్తి చేసింది. కానీ ఎప్పుడు రిలీజ్ అనేది ఇంకా ప్రకటించలేదు. స్వీటీ ప్రస్తుతం మలయాళంలో 'కథనార్: ది వైల్డ్ సోర్సెరర్' అనే సినిమా చేస్తోంది.

'భోళా శంకర్' డిజాస్టర్ గా మారిన తర్వాత మిల్కీ బ్యూటీ తమన్నా భాటియా మరో తెలుగు సినిమాలో కనిపించలేదు. ప్రస్తుతం 'ఓదెల 2' చిత్రంలో నటిస్తోంది. ఆమె ప్రధాన పాత్రలో నటించిన 'సికందర్ కా ముఖద్దర్' అనే వెబ్ సిరీస్ తాజాగా స్ట్రీమింగ్ కు వచ్చేసింది. అందాల రకుల్ ప్రీత్ సింగ్ టాలీవుడ్ కు ఎప్పుడో దూరమైంది. మధ్యలో ఓటీటీలో 'బూ' అనే హార్రర్ థ్రిల్లర్ లో కనిపించినా, 'భారతీయుడు 2' వంటి డబ్బింగ్ సినిమా చేసినా ప్రయోజనం లేకుండా పోయింది. ఆమె నటించిన 'దే దే ప్యార్ దే 2', 'భారతీయుడు 3' చిత్రాలు వచ్చే ఏడాది విడుదల కానున్నాయి.

ఇస్మార్ట్ బ్యూటీ నిధి అగర్వాల్ తెలుగు తెరపై కనిపించి మూడేళ్లు కావొస్తోంది. చివరగా 2022 సంక్రాంతికి 'హీరో' సినిమాలో హీరోయిన్ గా నటించింది. వచ్చే ఏడాది మాత్రం 'హరి హర వీరమల్లు', 'ది రాజాసాబ్' వంటి రెండు పెద్ద చిత్రాలతో రాబోతోంది. రాశీ ఖన్నా రెండేళ్ల క్రితం 'థ్యాంక్యూ' సినిమాతో ప్రేక్షకులను పలకరించింది. రీసెంట్ గా 'ది సబర్మతి రిపోర్ట్' అనే హిందీ సినిమాతో వచ్చింది. తెలుగులో అమ్మడు నటిస్తున్న 'తెలుసు కదా' చిత్రం వచ్చే ఏడాది రిలీజ్ అవుతుంది. అలానే హిందీ, తమిళ భాషల్లో రెండు సినిమాలు చేస్తోంది.

ఇలా చాలా మంది టాలీవుడ్ హీరోయిన్లు తెలుగు తెర మీద కనిపించి ఏడాది దాటిపోయింది. తెలుగులో గ్యాప్ మెయింటెయిన్ చేస్తున్న ఈ బ్యూటీస్ లో కొందరు, వచ్చే ఏడాది ఆడియన్స్ ముందుకు వస్తున్నారు. ఆ సినిమాలు హిట్టయితే మళ్ళీ కొన్నాళ్ళు వీళ్ళ హవా కొనసాగే అవకాశం ఉంటుంది. లేకపోతే ఫ్యాన్స్ కూడా లైట్ తీసుకునే ప్రమాదం ఉంటుంది. చూద్దాం.. ఏం జరుగుతుందో.