హీటెక్కించే సీజన్ లో.. కుర్ర హీరోల దండయాత్ర

సంక్రాంతి సందడి ముగిసిపోయింది. చిన్న సినిమాగా వచ్చి పెద్ద విజయం సాధించింది హనుమాన్ మూవీ. బాక్సాఫీస్ వద్ద వసూళ్ల వర్షం కురిపిస్తోంది. నాగార్జున నా సామి రంగ కూడా మంచి కలెక్షన్లే రాబట్టింది. ఇక గుంటూరు కారం, సైంధవ్ మిక్స్ డ్ టాక్ అందుకున్నాయి. ఇప్పుడు అందరి దృష్టి సమ్మర్ పై పడింది. పొంగల్ సీజన్ తర్వాత ఎక్కువగా వేసవిలోనే సినిమాలు విడుదలవుతుంటాయి.

అయితే ఏటా వేసవిలో బడా హీరోల సినిమాలే ఎక్కువగా రిలీజ్ అవుతుంటాయి. కానీ ఈ సారి మాత్రం టాలీవుడ్ లో యువ హీరోలదే హవా కనిపిస్తోంది. బడా హీరోల సినిమాలు ఇంకా సెట్స్ పై ఉండడంతో.. అవన్నీ 2024 సెకండ్ పార్ట్ లో రిలీజ్ కానున్నాయి. దీంతో సమ్మర్ స్పెషల్ గా కుర్ర హీరోలు తమ చిత్రాలతో థియేటర్లలో సందడి చేసేందుకు సిద్ధమవుతున్నారు. వారెవరు? ఆ చిత్రాలేంటి?

ఇప్పటికే పాన్ ఇండియా స్టార్ ప్రభాస్ మూవీ కల్కితో పాటు విజయ్ దేవరకొండ ఫ్యామిలీ స్టార్, సిద్ధు జొన్నలగడ్డ టిల్లు స్క్వేర్ చిత్రాలు కర్చీఫ్ లు వేసేశాయి. మే9న కల్కి రిలీజ్ కానుండగా.. టిల్వు స్క్వేర్ మార్చి 29వ తేదీన విడుదల కానుంది. ఫ్యామిలీ స్టార్ ఏప్రిల్ 5వ తేదీన రిలీజ్ కానున్నట్లు తెలుస్తోంది. ఇప్పటికే ఆ తేదీని షెడ్యూల్ చేసుకున్న దేవర మూవీ పోస్ట్ పోన్ కానున్నట్లు సమాచారం. వీటితోపాటు మరికొన్ని సినిమాలు సమ్మర్ కు రెడీ అవుతున్నాయి.

హీరో రామ్ ప్రస్తుతం డబుల్ ఇస్మార్ట్ లో నటిస్తున్న విషయం తెలిసిందే. ఇస్మార్ట్ శంకర్ కు సీక్వెల్ గా డాషింగ్ డైరెక్టర్ పూరి జగన్నాథ్ ఈ చిత్రాన్ని తెరకెక్కిస్తున్నారు. శరవేగంగా షూటింగ్ జరుపుకుంటున్న ఈ మూవీ వేసవి కానుకగా విడుదల కానున్నట్లు తెలుస్తోంది. వాస్తవానికి శివరాత్రి సందర్భంగా థియేటర్లోకి రావాల్సి ఉన్నా.. ఏప్రిల్ లేదా మేలో రిలీజ్ కానుంది.

కంప్లీట్ ఫారిన్ బ్యాక్ గ్రౌండ్ తో తెరకెక్కుతున్న శ్రీరామ్ ఆదిత్య మూవీలో యంగ్ హీరో శర్వానంద్ నటిస్తున్న సంగతి విదితమే. ఈ సినిమాను కూడా సమ్మర్ స్పెషల్ గా రిలీజ్ చేసేందుకు మేకర్స్ ఫిక్స్ అయ్యారట. అందుకు అనుగుణంగా షూటింగ్ పూర్తి చేస్తున్నారట. మరోవైపు, మాస్ కా దాస్ విశ్వక్ సేన్ హీరోగా తెరకెక్కుతున్న గ్యాంగ్స్‌ ఆఫ్‌ గోదావరి.. మార్చి 8న రిలీజ్ కానుంది. ఇప్పటికే ఈ మూవీ షూటింగ్ పూర్తైనట్లు తెలుస్తోంది.

గతేడాది సామజవరగమన మూవీతో సూపర్ హిట్ కొట్టిన హీరో శ్రీవిష్ణు.. ఇప్పుడు రాజ రాజ చోర సీక్వెల్ లో నటిస్తున్నారు. మరో యువ కథానాయకుడు సుధీర్ బాబు యాక్షన్ థ్రిల్లర్ హరోం హరలో యాక్ట్ చేస్తున్నారు. ఈ రెండు మూవీలు కూడా వేసవిలోనే విడుదల కానున్నాయి. మరోవైపు, అల్లరి నరేశ్- మల్లి అంకం ప్రాజెక్ట్ కూడా ఏప్రిల్ లోనే రిలీజ్ కానుందట. నారా రోహిత్ ప్రతినిధి-2 సమ్మర్ బరిలోనే దిగనుంది. మరి ఏ సినిమాలు రిలీజ్ అవుతాయో.. ఏవి వాయిదా పడతాయో చూడాలి.