40 ఏళ్లు దాటినా ఆ బ్యూటీ ఏమాత్రం తగ్గడం లేదుగా!

టాలీవుడ్ స్టార్ హీరోయిన్లలో త్రిషా కృష్ణన్ ఒకరు. గత రెండున్నర దశాబ్దాలుగా సినీ అభిమానులను అలరిస్తున్న ఈ సీనియర్ బ్యూటీ.. 40 ఏళ్లు దాటినా ఇప్పటికీ మెయిన్ హీరోయిన్ గా అవకాశాలు అందుకుంటోంది. ఈ ఏడాది 'ది గ్రేటెస్ట్ ఆఫ్ ఆల్ టైమ్' సినిమాలో గెస్ట్ అప్పీరియన్స్ ఇచ్చిన త్రిష.. 'బృంద' అనే వెబ్ సిరీస్ తో ఓటీటీలో ఎంట్రీ ఇచ్చింది. ప్రస్తుతం ఆమె చేతిలో అర డజనుకు పైగానే ప్రాజెక్ట్స్ ఉన్నాయి. అవన్నీ కూడా స్టార్ హీరోలలో చేస్తున్న భారీ సినిమాలే కావడం విశేషం.

మెగాస్టార్ చిరంజీవి హీరోగా తెరకెక్కుతున్న 'విశ్వంభర' సినిమాలో త్రిష హీరోయిన్ గా నటిస్తోంది. 8 ఏళ్ల తర్వాత ఆమె తెలుగులో చేస్తున్న సినిమా ఇది. వశిష్ఠ మల్లిడి దర్శకత్వం వహిస్తున్న ఫాంటసీ యాక్షన్ అడ్వెంచర్ మూవీ వచ్చే ఏడాది సమ్మర్ లో రిలీజ్ కానుంది. 2006లో చిరు, త్రిష కలిసి 'స్టాలిన్' అనే సినిమా చేశారు. ఆ తర్వాత 'ఆచార్య' చేయాల్సింది కానీ, తెలియని కారణాలతో ఆమె ఈ ప్రాజెక్ట్ నుండి తప్పుకుంది. దాదాపు 18 ఏళ్ల తర్వాత మళ్ళీ ఇప్పుడు 'విశ్వంభర' కోసం వీరిద్దరూ జోడీ కట్టడంతో ఫ్యాన్స్ ఆసక్తిగా ఎదురుచూస్తున్నారు.

తమిళ హీరో అజిత్ కుమార్ తో బ్యాక్ టూ బ్యాక్ రెండు సినిమాలు చేస్తోంది త్రిష. మగిజ్ తిరుమేని దర్శకత్వం వహిస్తున్న 'విదాముయార్చి' మూవీలో హీరోయిన్ గా నటిస్తోంది. ఇందులో ఆమె పాత్రకు ప్రాముఖ్యత ఉన్నట్లు టీజర్ చూస్తే అర్థమవుతుంది. ఈ సినిమా వచ్చే సంక్రాంతికి రిలీజ్ కానుంది. అధిక్ రవిచంద్రన్ దర్శకత్వలో అజిత్ నటిస్తున్న 'గుడ్ బ్యాడ్ అగ్లీ' సినిమాలోనూ త్రిష కథానాయిక పాత్ర పోషిస్తోంది. గతంలో వీరిద్దరూ కలిసి జీ, పూర్ణా మార్కెట్, ఎంతవాడు గానీ, గ్యాంబ్లర్ వంటి చిత్రాల్లో నటించారు.

యూనివర్సల్ స్టార్ కమల్ హాసన్ - లెజెండరీ దర్శకుడు మణిరత్నం కాంబోలో రూపొందే 'థగ్ లైఫ్' చిత్రంలో త్రిష కృష్ణన్ కీలక పాత్ర పోషిస్తోంది. కమల్, త్రిష గతంలో 'మన్మథ బాణం', 'చీకటి రాజ్యం' సినిమాలలో నటించిన సంగతి తెలిసిందే. మణిరత్నం డైరెక్షన్ లో 'యువ', 'పొన్నియన్ సెల్వన్' 1 & 2 చిత్రాలలో త్రిష నటించింది. ఇక తమిళ్ లో రీసెంట్ గా మరో ప్రాజెక్ట్ సైన్ చేసిన ఈ భామ.. మలయాళంలో 'రామ్', 'ఐడెంటిటీ' వంటి రెండు చిత్రాలు చేస్తోంది.

మలయాళ సూపర్ స్టార్ మోహన్‌ లాల్ హీరోగా జీతూ జోసెఫ్ దర్శకత్వంలో రూపొందుతున్న 'రామ్‌' మూవీలో త్రిష డాక్టర్‌గా నటిస్తోంది. గత నాలుగేళ్లుగా నిర్మాణం జరుపుకుంటున్న ఈ సినిమా విడుదల తేదీపై క్లారిటీ రావాల్సి ఉంది. టొవినో థామస్ హీరోగా నటిస్తున్న 'ఐడెంటిటీ' అనే చిత్రంలో త్రిష కీలక పాత్ర పోషిస్తోంది. ఇందులో మమతా మోహన్ దాస్, మడోన్నా సెబాస్టియన్ కూడా ఉన్నారు. వచ్చే ఏడాది ప్రారంభంలో ఈ సినిమా విడుదల కానుంది.

సూర్య హీరోగా ఆర్జే బాలాజీ దర్శకత్వంలో తెరకెక్కనున్న 'Suriya 45' సినిమా కోసం త్రిష ని తీసుకున్నట్లు తెలుస్తోంది. సూర్య హీరోగా నటించిన 'మౌనం పేసియాధే' మూవీతోనే త్రిష హీరోయిన్ గా పరిచయమైంది. ఆ తర్వాత వీరిద్దరూ కలిసి 'ఆరు' సినిమా చేశారు. 'యువ' మూవీలో నటించారు కానీ, జోడీగా నటించలేదు. మళ్ళీ రెండు దశాబ్దాల తర్వాత సూర్యతో జట్టు కడుతోంది.

ఇలా త్రిష లైనప్ లో 7 సినిమాలు ఉన్నాయి. నాలుగైదు చిత్రాలైనా వచ్చే ఏడాది ప్రేక్షకుల ముందుకు వచ్చే అవకాశం ఉంది. వీటిల్లో కొన్ని మూవీస్ హిట్టయినా ఇంకొన్నేళ్లు ఆమె హవా ఇలానే కంటిన్యూ అవుతుంది. మాములుగా 40 ఏళ్లు దాటితే ఏ హీరోయిన్ క్రేజ్ అయినా తగ్గిపోతుంది. కానీ త్రిష కృష్ణన్ విషయంలో రివర్స్ జరుగుతుంది. ఏజ్ పెరిగే కొద్దీ ఆమె క్రేజ్ పెరుగుతోంది. మరి రానున్న రోజుల్లో ఎలాంటి ఆఫర్స్ వస్తాయో, కెరీర్ ఎలా ముందుకు సాగుతుందో చూడాలి.