పవన్, త్రివిక్రమ్ కాంబో.. నాగవంశీ చెప్పిందేనా?

పవర్ స్టార్ పవన్ కళ్యాణ్, మాటల మాంత్రికుడు త్రివిక్రమ్ శ్రీనివాస్ మధ్య ఎలాంటి బాండింగ్ ఉందో అందరికీ తెలిసిందే. జల్సా మూవీతో మొదలైన వారిద్దరి జర్నీ.. ఇప్పటికీ కొనసాగుతూనే ఉంది. ఇప్పటికే పలు సినిమాల ప్రీ రిలీజ్ ఈవెంట్స్ లో తమ ఫ్రెండ్‌ షిప్ గురించి చెబుతూ ఒకరి పట్ల మరొకరు గౌరవాన్ని ప్రదర్శించుకున్నారు. సినిమాల పరంగానే కాకుండా పర్సనల్ విషయాల్లో కూడా ఇన్వాల్వ్ అవుతుంటారు!

అయితే ఇప్పటి వరకు పవన్, త్రివిక్రమ్ కాంబోలో మూడు చిత్రాలు వచ్చిన సంగతి తెలిసిందే. 2018లో చివరగా అజ్ఞాతవాసి మూవీ రాగా.. మళ్లీ వారి కాంబో రిపీట్ అవ్వలేదు. పవన్ భీమ్లానాయక్ మూవీకి త్రివిక్రమ్ డైలాగ్స్ మాత్రమే అందించారు. దీంతో వారిద్దరి కాంబో కోసం మెగా ఫ్యాన్స్ ఎప్పటి నుంచో వెయిట్ చేస్తున్నారు. ఇప్పుడు వారి కాంబో రిపీట్ అయ్యే టైమ్ వచ్చేసిందని సోషల్ మీడియాలో జోరుగా ప్రచారం సాగుతోంది.

సాలిడ్ స్టోరీతో త్రివిక్రమ్.. పవన్ తో మరో సినిమా చేయనున్నారని వార్తలు వస్తున్నాయి. పొలిటికల్ బ్యాక్ డ్రాప్ తో మూవీ ఉండనుందని టాక్ వినిపిస్తోంది. 2029 ఎన్నికల ముందే సినిమాను ప్రేక్షకుల ముందుకు తీసుకురానున్నట్లు వినికిడి. అరే ఇదేంటి.. టాలీవుడ్ యంగ్ ప్రొడ్యూసర్ నాగవంశీ తాజాగా ఇలాంటి వ్యాఖ్యలే చేశారుగా అని అనిపిస్తుంది కదా.. అవును ఆయనే త్రివిక్రమ్, పవన్ కళ్యాణ్ మూవీని రూపొందించనున్నారని సమాచారం.

నాగవంశీ నిర్మించిన లక్కీ భాస్కర్ చిత్రం రీసెంట్ గా ప్రేక్షకుల ముందుకు వచ్చి పాజిటివ్ టాక్ తో దూసుకుపోతోంది. దీంతో ప్రెస్ మీట్ ను ఏర్పాటు చేసిన నాగవంశీ ఆసక్తికర వ్యాఖ్యలు చేశారు. 2029 ఎన్నికల్లోపు ఒక పెద్ద స్టార్ హీరోతో హ్యూజ్ స్కేల్ లో ఒక పొలిటికల్ సినిమా తీద్దామనుకుంటున్నామని, ఇప్పటి నుంచే డిటైల్స్ చెప్పలేమని అన్నారు. కానీ ప్లాన్ అయితే మాత్రం ఉందని తెలిపారు. దీంతో ఆయన కామెంట్స్ వైరల్ గా మారాయి.

నాగవంశీ.. పవన్, త్రివిక్రమ్ సినిమా విషయాన్నే లక్కీ భాస్కర్ ప్రెస్ మీట్ లో ప్రస్తావించినట్లు తెలుస్తోంది. అయితే నాగవంశీ బాబాయ్ రాధాకృష్ణ హారిక అండ్ హాసిని క్రియేషన్స్ బ్యానర్ పైనే త్రివిక్రమ్ వరుస సినిమాలు చేస్తున్నారు. దీంతో నాగవంశీ, త్రివిక్రమ్ మధ్య మంచి పరిచయాలే ఉన్నాయి. అల్లు అర్జున్ తో చేయాల్సిన మూవీని కూడా నాగవంశీ సితార బ్యానర్ పైనే త్రివిక్రమ్ తెరకెక్కించనున్నారు. అది కంప్లీట్ అయ్యాక పవన్ తో పొలిటికల్ సినిమా చేస్తారని ప్రచారం జరుగుతోంది. మరి ఇందులో నిజమెంత ఉందో చూడాలి.