త్రివిక్రమ్​ సార్​.. తమన్​ గురించి కాస్త చెప్తారా?

మ్యూజిక్‌ డైరెక్టర్‌ తమన్‌ గురించి ప్రత్యేకంగా చెప్పనక్కర్లేదు. ఓ వైపు సెన్సేషన్​ మ్యూజిక్​తో.. మరోవైపు కాపీ క్యాట్ అనే ట్యాగ్​లైన్​తో​ ఎప్పుడూ సోషల్​ మీడియాలో ట్రోల్​ అవుతూనే ఉంటారు. నిజానికి ఆయన.. ఎక్కువగా నెగెటివిటీని ఎదుర్కొంటుంటారు. తమన్​ వర్క్‌ను తక్కువ చేస్తూ.. చాలా మంది నెటిజన్లు తీవ్ర విమర్శలు కురిపిస్తుంటారు.

అయితే ఆయన ఇప్పుడు మరోసారి.. నెట్టింట్లో హాట్​ టాపిక్​గా మారారు. అందుకు కారణం 'గుంటూరు కారం'. సూపర్ స్టార్ మహేశ్​ బాబు ఈ చిత్రాన్ని ఏ ముహుర్తాన మొదలుపెట్టారోగానీ.. ఈ చిత్రం గురించి పాజిటివ్ కన్నా నెగటివ్ వార్తలే ఎక్కువగా వస్తున్నాయి. అలా ఇప్పుడు ఈ చిత్రానికి సంగీతం అందిస్తున్న తమన్​ గురించి విపరీతంగా వార్తలు చక్కర్లు కొడుతున్నాయి.

ఆయన్ను సినిమా నుంచి తప్పించారని ప్రచారం ప్రస్తుతం జోరందుకుంది. వాస్తవానికి ఆ మధ్య కూడా ఇలానే ప్రచారం సాగింది. గుంటూర్​ కారం నుంచి తమన్ ఔట్​ అంటూ తెగ ట్రెండ్ చేశారు. ఆ సమయంలో త‌మ‌న్ ఆ వార్తలను ఖండించారు. ఆ రూమర్స్​ను తిప్పికొట్టారు. 'గుంటూరు కారం'లో తాను ఉన్నట్లు తన పనిని తాను చేసుకుంటూ ముందుకెళ్తున్నాని చెప్పారు. అయితే మూవీటీమ్​ మాత్రం ఈ విషయంపై స్పందించకుండా మౌనం వహించింది.

క‌ట్ చేస్తే మళ్లీ ఇప్పుడూ గతంలో కన్నా ఎక్కువగా అదే ప్రచారం సాగుతోంది. త‌మ‌న్‌ పక్కాగా బయటకు వెళ్లిపోయారని అంటున్నారు. ఆయన స్థానంలోకి మ‌ల‌యాళ సంగీత ద‌ర్శ‌కుడు, ఖుషీ చిత్రంతో టాలీవుడ్​కు ఎంట్రీ ఇస్తున్న హేష‌మ్ అబ్దుల్‌ను తీసుకున్నారని అంటున్నారు. అదే సమయంలో తమన్​... గుంటూరు కారం సినిమాకు సంబంధించిన ఇచ్చిన పాత ఇంటర్వ్యూలు కూడా ట్రెండ్ అవుతున్నాయి.

ఇంకొంతమంది నెటిజన్లు.. తమన్​ ఉన్నాడో లేదో చెప్పాలంటూ త్రివిక్రమ్​ను అడుగుతూ కామెంట్లు చేస్తున్నారు. మరి ఈ వార్తల్లో నిజమెంతో తెలియదు కానీ.. దీనిపై ఓ క్లారిటీ రావాలంటే అటు తమన్​ అయినా లేదా ఇటు మూవీటీమ్​ అయినా స్పందించాల్సి అవసరం కచ్చితంగా ఉంది.

ఇకపోతే ఈ గుంటూరు కారం సినిమా మొదలుపెట్టినప్పటి నుంచి కష్టాలను ఎదుర్కొంటూనే ఉంది. కథలో మార్పులు, చిత్రీకరించిన సన్నివేశాలను పక్కనపెట్టేయడం, నటీనటులు సెట్​ అవ్వకపోవడం, షూటింగ్​ పోస్ట్​పోన్​ అవ్వడం.. అబ్బో చెప్పుకుంటూ పోతే పెద్ద లిస్టే వచ్చేలా అన్ని సమస్యలను మీదేసుకుని ముందుకెళ్తోంది. ఆ మధ్యలో హీరోయిన్ పూజాహెగ్డే కూడా సినిమా నుంచి తప్పుకోగా.. ఆమె స్థానంలోకి శ్రీలీలను పెట్టి.. సెకండ్​ హీరోయిన్​గా మీనాక్షి చౌదరికి ఛాన్స్​ ఇచ్చారు మేకర్స్​. మరి ఇప్పుడు తమన్​ విషయంలోనూ అదే జరుగుతుందో లేదో చూడాలి..