బిగ్ స్క్రీన్ పై ఉదయ్ కిరణ్.. మళ్ళీ చూస్తారా?

గత కొన్నేళ్ల నుంచి టాలీవుడ్ లో రీరిలీజ్ ట్రెండ్ జోరుగా నడుస్తోంది. స్టార్ హీరోల సినిమాలు వరుసగా రీరిలీజ్ చేశారు. వాటికి మంచి ఆదరణ లభించింది. తరువాత స్టార్స్ తో సంబంధం లేకుండా ఒకప్పటి హిట్ సినిమాలు డిజిటలైజ్ చేసి రీరిలీజ్ చేయడం మొదలుపెట్టారు. వాటిలో నువ్వొస్తానంటే నేనొద్దంటానా, గత నెలలో వచ్చిన ఓయ్ సినిమాకి మంచి ఆదరణ లభించింది.

గతంలో ఆరెంజ్, సూర్య సన్నాఫ్ కృష్ణన్ లాంటి సినిమాలకి కూడా ప్రేక్షకులు బ్రహ్మరథం పట్టారు. అయితే కొన్ని చిత్రాలు మాత్రం ఆశించిన స్థాయిలో ప్రేక్షకాదరణ సొంతం చేసుకోలేదు. కానీ రీరిలీజ్ ట్రెండ్ మాత్రం ఇంకా కొనసాగుతూనే ఉంది. ఓ వైపు పబ్లిక్ కి ఈ రీరిలీజ్ చిత్రాలపై బోర్ కొడుతున్న పాత సినిమాలు థియేటర్స్ లోకి తీసుకొచ్చే ప్రయత్నం మాత్రం చేస్తూనే ఉన్నారు.

బాలయ్య సమరసింహారెడ్డి మూవీని రిలీజ్ చేయడానికి ఏర్పాట్లు చేస్తున్నారు. ఇప్పుడు ఓ మూవీ రీరిలీజ్ మాత్రం హాట్ టాపిక్ గా మారింది. ఒకప్పుడు ప్రేమకథా చిత్రాలతో సక్సెస్ అందుకొని స్టార్ హీరో అవుతాడని అనుకున్న నటుడు ఉదయ్ కిరణ్. అయితే వరుస ఫ్లాప్ లు, కెరియర్ గాడితప్పడంతో ఆత్మహత్య చేసుకొని చనిపోయాడు.

అతను హీరోగా వచ్చిన రెండో సినిమా నువ్వు నేను. ఈ సినిమాని రీరిలీజ్ చేయడానికి ఏర్పాట్లు చేస్తున్నారు. ఈ సినిమాతో ఉదయ్ కిరణ్ ని స్మరించుకున్నట్లు ఉంటుందని మరల డిజిటలైజ్ చేసి ప్రేక్షకుల ముందుకి తీసుకొని రాబోతున్నారు. మార్చి నెలలో ఈ మూవీ రిలీజ్ అవ్వనున్నట్లు టాక్. ఉదయ్ కిరణ్ సినిమాలకి యూత్ లో ఒకప్పుడు మంచి క్రేజ్ ఉండేది.

ఈ నేపథ్యంలో అతన్ని గుర్తుచేసుకుంటూ సినిమాకి వెళ్లేవారు ఎక్కువ ఉండొచ్చు. అదే సమయంలో ఈ రీరిలీజ్ ని ఒక వర్గం కావాలని హైలైట్ చేసి కాంట్రవర్సీ కూడా క్రియేట్ చేసే ఛాన్స్ లు ఉన్నాయని అంచనా వేస్తున్నారు. రీరిలీజ్ ట్రెండ్ కి కూడా ఆదరణ తగ్గిన నేపథ్యంలో ఈ మూవీకి ప్రేక్షకుల నుంచి ఏ స్థాయిలో రెస్పాన్స్ వస్తుందనేది చూడాలి.