సౌత్ సినిమా జోరు.. 5 నేషనల్‌, 4 ఇంటర్నేషనల్‌
ఇండియన్ సినిమాలు విదేశీ భాషల్లో డబ్‌ అయ్యి విడుదల అవ్వడం చాలా అరుదుగా జరుగుతూ ఉంటుంది
By: Tupaki Desk | 6 March 2024 6:42 AM GMT
ఇండియన్ సినిమాలు విదేశీ భాషల్లో డబ్‌ అయ్యి విడుదల అవ్వడం చాలా అరుదుగా జరుగుతూ ఉంటుంది. అదీ సౌత్ ఇండియన్ సినిమాలు ఒకటి రెండు విదేశీ భాషల్లో విడుదల అయితేనే గొప్ప విషయం అన్నట్లుగా చెప్పుకుంటాం. అలాంటిది ఒక సౌత్ సినిమా ఏకంగా నాలుగు అంతర్జాతీయ భాషల్లో డబ్‌ అయ్యి రిలీజ్ అవ్వబోతుంది.
ఆ సినిమా మరేదో కాదు.. ఉపేంద్ర స్వీయ దర్శకత్వంలో రూపొందించి నటించిన 'యూఐ'. దాదాపు ఎనిమిది సంవత్సరాల తర్వాత ఉపేంద్ర దర్శకత్వంలో సినిమా రూపొందింది. గతంలో ఆయన దర్శకత్వంలో వచ్చిన ప్రతి సినిమా కూడా ఒక్కో 'యానిమల్‌' అన్నట్లుగా ఉండేవి. కొన్ని కారణాల వల్ల దర్శకత్వంకు బ్రేక్‌ ఇచ్చాడు.
ఎట్టకేలకు ఉపేంద్ర మరో సినిమాతో దర్శకుడిగా ప్రేక్షకుల ముందుకు రాబోతున్నాడు. యూఐ అనే విభిన్నమైన టైటిల్స్ తో తన గత చిత్రాలకు ఏ మాత్రం తక్కువ కాకుండా సరికొత్త ప్రపంచాన్ని సృష్టించి ఉపేంద్ర ఈ సినిమాను రూపొందించినట్లు ఇప్పటికే విడుదల అయిన టీజర్‌ చూస్తూ ఉంటే అర్థం అవుతోంది.
ఈ సినిమాను పాన్‌ ఇండియా రేంజ్‌ లో సౌత్ లో నాలుగు, మరియు హిందీ భాషలో మొత్తం అయిదు భాషల్లో విడుదల చేయబోతున్నారు. నేషనల్‌ రేంజ్‌ లో అయిదు భాషల్లో విడుదల అవ్వబోతున్న యూఐ మూవీ అంతర్జాతీయంగా నాలుగు భాషల్లో విడుదల చేయబోతున్నారు.
చిత్ర యూనిట్‌ సభ్యుల నుంచి అందుతున్న సమాచారం ప్రకారం ఈ సినిమాను ఫ్రెంచ్‌, స్పానిష్‌, జర్మన్‌ మరియు ఇటాలియన్ భాషల్లో విడుదల చేయబోతున్నారట. ఆ భాషల్లో హిట్ అయితే ఇంగ్లీష్ లో కూడా విడుదల చేసే అవకాశాలు ఉన్నాయి అంటూ కన్నడ మీడియా వర్గాల ద్వారా సమాచారం అందుతోంది.
సినిమాకు హిట్ టాక్ వస్తే భారీ ఎత్తున విడుదల అవ్వబోతుంది కనుక కచ్చితంగా రికార్డ్‌ స్థాయి వసూళ్లు నమోదు అయ్యే అవకాశాలు ఉన్నాయి. అతి త్వరలో విడుదల తేదీని ప్రకటించబోతున్నట్లు తెలుస్తోంది. ఇదే ఏడాదిలో రిలీజ్ ఉంటుంది అంటూ మేకర్స్ ఇప్పటికే ప్రకటించారు.
