రెజీనా 'ఉత్సవం' మూవీ.. ట్రైలర్ చూశారా?

టాలీవుడ్ నటీనటులు దిలీప్ ప్రకాష్, రెజీనా కసాండ్రా జంటగా నటిస్తున్న చిత్రం ఉత్సవం. కళాకారులు, నాటకాల నేపథ్యంలో ప్రేక్షకుల ముందుకు రానున్న ఉత్సవం సినిమాకు అర్జున్ సాయి దర్శకత్వం వహిస్తున్నారు. ప్రకాష్ రాజ్, నాజర్, రాజేంద్ర ప్రసాద్, బ్రహ్మానందం, అలీ, రచ్చ రవి, రఘుబాబు, ప్రియదర్శి తదితరులు ముఖ్య పాత్రలు పోషిస్తున్నారు. ఇప్పటికే షూటింగ్, పోస్ట్ ప్రొడక్షన్ వర్క్స్ పూర్తి చేసుకున్న ఆ చిత్రం.. సెప్టెంబర్ నెలలో గ్రాండ్ గా రిలీజ్ కానుంది.

అంతరించిపోతున్న నాటక రంగం, కళాకారుల గొప్పతనాన్ని చాటి చెప్పేలా రూపొందిస్తున్న ఉత్సవం సినిమా నుంచి ఇప్పటికే వచ్చిన టీజర్, పాటలు.. ఆడియన్స్ లో క్యూరియాసిటీని క్రియేట్ చేశాయి. ఇటీవల సెప్టెంబర్ 13వ తేదీన మూవీ రిలీజ్ కానున్నట్లు ప్రకటించారు మేకర్స్. ఏపీ, తెలంగాణలో మైత్రీ మూవీ డిస్ట్రిబ్యూటర్స్ విడుదల చేయనున్నట్లు వెల్లడించారు. కర్ణాటకలో ఫేమస్ హోంబలే ఫిల్మ్స్ విడుదల చేయనున్నట్లు తెలిపారు. దీంతో సినిమాపై మంచి అంచనాలు నెలకొన్నాయి.

లవ్, ఎమోషన్స్, వినోదం అంశాలతో కంప్లీట్ ఫ్యామిలీ ఎంటర్టైనర్ గా రానున్న ఉత్సవం మూవీ ట్రైలర్ తాజాగా విడుదలైంది. "ఏం దురభిమాన దుర్యోధన.. ఏమైంది నీ అఖండ సామ్రాజ్య వైభవం.. ఎక్కడా నీ హంస తుళిక.. వినిపింపవే సుప్రభాత గీతికలు.. ఆక్రోశించుటమే కౌంతేయ కాదు.. నీకు మరణమే మేలు సుయోధనా" అంటూ బ్రహ్మానందం డైలాగ్ తో ట్రైలర్ ప్రారంభమైంది. మన బతుకులు కలలు కాదు.. కళలను గుర్తుంచే రోజులు రావా అంటూ ప్రకాష్ రాజ్ కన్నీరు కారుస్తూ రాజేంద్ర ప్రసాద్ ను హత్తుకుంటారు.

డ్రామాల వేసే వారితో నీ డ్రామాలేంట్రా అనే డైలాగ్ ఆసక్తి పెంచుతోంది. ఇంతలో హీరోహీరోయిన్ల లవ్ ట్రాక్ చూపించారు మేకర్స్. అనంతరం ఒక్కసారిగా ట్రైలర్ అంతా ఎమోషనల్ మోడ్ లోకి వెళ్లిపోయింది. హీరో, హీరోయిన్ల మధ్య ఓ విషయంలో గొడవ జరుగుతుంది. ఆ తర్వాత ఏమైంది? హీరో హీరోయిన్లు పెళ్లి చేసుకుంటారా? వంటి ప్రశ్నలకు సమాధానాలే సినిమాగా తెలుస్తోంది. ప్రస్తుతం ఉత్సవం ట్రైలర్ సోషల్ మీడియా వైరల్ గా మారింది.

టాలీవుడ్ సీనియర్ నటీనటులతో ఉత్సవం ట్రైలర్ బాగుందని నెటిజన్లు చెబుతున్నారు. మంచి కాన్సెప్ట్ తో తెరకెక్కిస్తున్నట్లు తెలుస్తోందని అంటున్నారు. హార్న్ బిల్ పిక్చర్స్ బ్యానర్ పై సురేష్ పాటిల్ ఇంపాక్ట్ ఫుల్ తెలుగు డ్రామాగా ఉత్సవం సినిమాను నిర్మిస్తున్నారు. రసూల్ ఎల్లోర్ సినిమాటోగ్రాఫర్ గా వ్యవహరిస్తున్నారు. అనూప్ రూబెన్స్ సంగీతం అందిస్తున్నారు. కోటగిరి వెంకటేశ్వరరావు ఎడిటర్ గా వర్క్ చేస్తున్నారు. మరి ఈ సినిమా ఎలా ఉంటుందో వేచి చూడాలి.