వైష్ణవి.. శ్రీలీల రేంజ్ ను అందుకుంటుందా?

తెలుగు సినిమాల్లో తెలుగు అమ్మాయిలు కనిపించరు. ఇది చాలా కాలంగా వినపడే మాట. ఒకవేళ తెలుగు అమ్మాయిల కు నటించే అవకాశం వచ్చినా, అది హీరోయిన్ రోల్ అయితే అయ్యి ఉండదు. హీరో చెల్లెలి క్యారెక్టరో, లేదంటే, ఇంకేదైనా సైడ్ క్యారెక్టరో వస్తుంది. అలా అని ఇప్పటి వరకు తెలుగు అమ్మాయిలు అసలు హీరోయిన్ గా సినిమాలు చేయలేదా అంటే, ఈ మధ్యకాలం లో కొందరు చేశారు. కానీ చిన్న సినిమాలకే అది కూడా ఒకటి, రెండు చేసి సైడ్ అయిపోయారు.

ఎక్కువగా, వేరే భాషల్లో అమ్మాయిలే ఈ ఇండస్ట్రీని ఏలుతున్నారు. అయితే, ఇప్పుడు కాలం మారింది. తెలుగు అమ్మాయిలు కూడా హీరోయిన్లు గా చేసి రాణించగలం అని నిరూపిస్తున్నారు. వారిలో ఇప్పుడు శ్రీలీల ముందుంది. ఈ తెలుగు అమ్మాయి మొదట వేరే భాషల్లో హీరోయిన్ గా చేసి అదరగొట్టింది. ఆ తర్వాత ఇక్కడ హీరోయిన్ గా వచ్చి, ఇప్పుడు మోస్ట్ బిజీ హీరోయిన్ గా మారిపోయింది. అయితే, ఇప్పుడు శ్రీలీల అడుగు జాడల్లో నడుస్తోంది బేబీ వైష్ణవి చైతన్య.

యూట్యూబర్ గా తన కెరీర్ ని మొదలుపెట్టిన ఈ అమ్మాయి తర్వాత సినిమాల్లో చిన్న చిన్న క్యారెక్టర్లు చేసింది. అక్కడి నుంచి ఇప్పుడు తన కెరీర్ ని సిల్వర్ స్క్రీన్ పై చూసుకునేలా మార్చుకుంది. బేబీ సినిమాతో బ్లాక్ బస్టర్ హిట్ అందుకుంది. కేవలం మూవీ హిట్ అవ్వడం కాదు, సినిమా మొత్తాన్ని తన భుజాల పై మోసింది. ఆ మూవీ లో తన క్యారెక్టర్ ని ఆమె చూపించిన విధానం, ఆ అమ్మాయి నటన కు అందరూ ఫిదా అయిపోయారు.

దీంతో, ఇప్పుడు ఎక్కడ చూసినా వైష్ణవి పేరే వినపడుతోంది. అందరూ, ఈ మూవీ పై ప్రశంసల వర్షం కురిపిస్తున్నారు. ముఖ్యంగా వైష్ణవి ని ఆకాశానికి ఎత్తేస్తున్నారు. ప్రస్తుతం ఈ బేబీ కి ఆఫర్లు క్యూ కడుతున్నాయని తెలుస్తోంది. దాదాపు, చాలా మంది చిన్న హీరోల సినిమాల్లో వైష్ణవిని అడుగుతున్నారట.

అయితే, క్యారెక్టర్ల విషయం లో కొంచెం జాగ్రత్తలు తీసుకుంటూ, మళ్లీ ఇలాంటి సినిమా కాకుండా, మంచి పాత్రలు చేస్తే, వైష్ణవి హీరోయిన్ గా క్లిక్ అయినట్లే అనే కామెంట్స్ వినపడుతున్నాయి. అంతేకాదు, మరో శ్రీలల కావడం పక్కా అని అంటున్నారు. చూడాలి మరి వైష్ణవి కెరీర్ ఎలా మారుతుందో.