దేవర: 4 గంటల్లోనే కన్నడ వర్క్ ఫినిష్

యంగ్ టైగర్ ఎన్టీఆర్ దేవర మూవీ కోసం కేవలం తెలుగు ప్రేక్షకులు మాత్రమే కాకుండా దేశ వ్యాప్తంగా అభిమానులు ఎగ్జైటింగ్ గా ఎదురుచూస్తున్నారు. కచ్చితంగా ఎన్టీఆర్ దేవర మూవీతో బ్లాక్ బస్టర్ కొడతాడనే నమ్మకంతో ఫ్యాన్స్ ఉన్నారు. తారక్ కి తెలుగుతో పాటుగా కన్నడంలో కూడా విశేషమైన ఫ్యాన్ ఫాలోయింగ్ ఉంది. కర్ణాటక ప్రజలు అయితే ఎన్టీఆర్ ని తమ వాడిగానే భావిస్తారు.

కర్ణాటక ఎప్పుడు వెళ్లిన కూడా జూనియర్ ఎన్టీఆర్ కి అద్భుతమైన ప్రజాధారణ లభిస్తూ ఉంటుంది. ఎన్టీఆర్ తల్లి కర్ణాటకకి చెందినవారు కావడంతో అక్కడి ప్రజలు తారక్ ని తమవాడిగా ఓన్ చేసుకుంటారు. ఇదిలా ఉంటే జూనియర్ ఎన్టీఆర్ హీరోగా తెరకెక్కిన దేవర మూవీ సెప్టెంబర్ 27న ఐదు భాషలలో రిలీజ్ కాబోతోంది. భారీ అంచనాల నడుమ ఈ చిత్రాన్ని థియేటర్స్ లోకి తీసుకొని వస్తున్నారు.

ఈ సినిమాలోని తన క్యారెక్టర్ కి తెలుగుతో పాటు కన్నడ, హిందీ వెర్షన్స్ లలో కూడా ఎన్టీఆర్ సొంతంగా డబ్బింగ్ చెబుతున్నాడనే సంగతి అందరికి తెలిసిందే. ఆర్ఆర్ఆర్ సినిమాలోని కూడా తారక్ తన క్యారెక్టర్ కి సొంతంగా డబ్బింగ్ చెప్పుకున్నారు. ఇప్పుడు దేవర సినిమాలోని క్యారెక్టర్ కి కూడా అలాగే సొంత గొంతుక ఇస్తున్నారు. జూనియర్ ఎన్టీఆర్ కన్నడ వెర్షన్ డబ్బింగ్ కేవలం 4 గంటల్లోనే పూర్తి చేసాడంట. ఈ విషయాన్ని కన్నడ పాటల రచయిత వరదరాజ్ ట్విట్టర్ లో తెలిపారు.

ఎన్టీఆర్ కన్నడ ఉచ్చారణ కూడా చాలా స్పష్టంగా ఉందని వరదరాజ్ ప్రశంసలు కురిపించారు. గతంలో ఆర్ఆర్ఆర్ సినిమాలోని భీమ్ క్యారెక్టర్ కి తారక్ 5 గంటల్లోనే కన్నడ డబ్బింగ్ కంప్లీట్ చేసాడని అన్నారు. ఇప్పుడు కేవలం 4 గంటల్లోనే కన్నడ వెర్షన్ డబ్బింగ్ పూర్తి చేయడం నిజంగా గొప్ప విషయం అని వరదరాజ్ ట్వీట్ చేశారు. దీనిని ఎన్టీఆర్ అభిమానులు ట్విట్టర్ లో వైరల్ చేస్తున్నారు.

ఎన్టీఆర్ మల్టీ టాలెంటెడ్ అంటూ ఫ్యాన్స్ గొప్పగా కామెంట్స్ చేస్తూ ప్రశంసిస్తున్నారు. దేవర మూవీకి కన్నడంలో కూడా మంచి ఆదరణ లభించే అవకాశం ఉందని సినీ విశ్లేషకులు అంచనా వేస్తున్నారు. త్వరలో కర్ణాటక వెళ్లి దేవర మూవీ ప్రమోషన్స్ లో తారక్ పాల్గొంటాడని తెలుస్తోంది. దానికి సంబందించిన టూర్ షెడ్యూల్ ఖరారు అయ్యిందని టాక్.